قوة الإرادة

اليوم الثالث و التسعون

قوة الإرادة

و أنا بتفرج على فيلم إكس لارج من كام يوم فى جملة كده علقت معايا و قلت أكتب عنها موضوع النهاردة، ساعة أحمد حلمى و هو عامل تخين أوى و بيقول لدنيا سمير غانم إن عىلى الرغم من إنك بتحبى تاكلى و بتحبى الأكل لكن مش باين عليكى، راحت رادة عليه و قايلاله، اصل أول ما بحس نفسى زدت شوية بعمل كنترول و ببطل أكل علشان عندى إرادة، و هو ده موضوعنا النهاردة عن قوة الإرادة.

قوة الإرادة دى ببساطة، يعنى إنت اللى تقدر تتحكم فى الأشياء مش الأشياء اللى تتحكم فيك، و يكون كمان عندك أهداف و حاططها قدام عينك دايما و بتشتغل بكل قوة عندك علشان تحققها، زى مثلا فى فيلم إكس لارج لما حس بالمشكلة  اللى عنده و قد إيه حتبقى عائق فى حياته، فحط هدف إنه يخس قدامه، و إشتغل على نفسه لحد ما قدر يحقق حلمه و يوصل للى هو عايزه، طيب فى ناس ممكن هنا تقولى أنا إزاى يكون عندى قوة إرادة، يعنى هى قوة الإرادة دى ممكن أكتسبها و مهارة ينفع أتعلمها و لا دى فطرة و موهبة ربنا بيميز بيها ناس عن ناس.

طبعا و أكيد فى ناس مخلوقة بقوة الإرادة و فى طبعها، يعنى هى مولودة fighter و عندها إصرار وعزيمة و بتفضل ورا حلمها لحد ما تحققه و مبتستسلمش بسرعة و نفسها طويل حتى لو واجهت الفشل مرات و مرات، و فى ناس تانية معندهاش ال Skill دى، و لكن أى مهارة فى الدنيا إنت ممكن تكتسبها لو إشتغلت على نفسك شوية و إتدربت التدريب الكافى اللى يخليك تكتسب المهارة، و صدقت إنك حتقدر توصل للى إنت عايزه و عشت جوا الحلم كأنه حقيقة وواقع، يعنى أول حاجة علشان تحقق هدفك إنك تصدقة و تؤمن بيه و تؤمن بنفسك ، تانى حاجة تعملها إنك تشوف إيه هى مخاوفك و تتحداها و تقاومها، يعنى مثلا لو أنا عايز تفتح مشروع بس خايف و عمال تقول أصل أنا القرشين اللى معايا حيضيعوا لو حطتهم فى Business، ده كمان ممكن يفشل و أبقى خسرت كل حاجة، لكن لو واجهت مخاوفك و جمدت قلبك و صدقت إنك حتنجح، حتلاقى نفسك كده ممكن تفتح  your own business إنما بجزء من الفلوس اللى معاك مش كلها، و حتلاقى نفسك بتتعب و بتعمل أقصى ما عندك علشان تنجحه و تثبت لنفسك إنك كنت غلط لما حكمت بالفشل على حاجة فى إيدك تنجحها و هى دى قوة الإرادة إنك تتحدى حتى نفسك.

و جزء كبير من قوة الإرادة هى قوة الثقة بالنفس، لأن لما تبقى واثق فى نفسك و إنك عملت اللى عليك، ده حيديلك دافعة للأمام حتى لو منجحتش من أول مرة أو كان النجاح بتاعك أقل من اللى إنت توقعته، و حتلاقى نفسك مع المحاولات المستمرة إنك بتبقى أقوى و بتقدر تواجه مخاوفك أحسن فى كل مرة عن المرة اللى قبلها.

كمان اللى بيقويك أكتر، هى إنك تكافئ نفسك بعد كل قرار صح و نتيجة سليمة إتوصلتلها، و تحط دايما لنفسك محفزات علشان تقويك و تشجعك إنك تحقق حلمك، حتى لو ما حققتش كل الحلم، كافئ نفسك إنك حاولت، و دايما إعمل اللى عليك و حارب علشانه و حتلاقى ربنا بيساعدك و يسهلك الحال بس أهم حاجة إنك تسعى و كك ثقة فى الله إنك حتنجح لإن إرادتك قوية و بتعمل اللى عليك.

تحياتى

هند مراد

أوعى تبقى زيهم

اليوم الثانى و التسعون

أوعى تبقى زيهم

في يومنا الطبيعى بقى بيعدى علينا أشكال و ألوان ناس مختلفين و للاسف من كتر ضغط الحياة علينا كلنا، بقينا بننفر من بعض، بنخون بعض، بنبنى أسوار و حواجز ما بينا من غير حتى ما نسمع بعض، و لو جينا إتكلمنا بنقاطع بعض، كل يوم بيعدى الأخلاق بتنزل معاه و فى ناس كتير إنعدمت عندها الأخلاق و الضمير كمان.

و طيبتك اللى مفروض هى صفة كويسة فيك، بقت بتؤخذ عليك و بقت الناس اللى حواليك تستغلها فيك أسوأ إستغلال، حضرتك كام مرة وقفت جنب ناس كان محتاجينك و قابلوا المعروف بالإساءة، أنا عن نفسى كتير جدا، طيب حضرتك كام مرة حد حكم عليك و فرض فيك سوء النية دون ما يواجهك، أكيد على الأقل مرة فى حياتك ده على الأقل إن مكنش العدد فى الليمون.

طيب هو أنا المفروض أكتب يافطة وأعلقها على صدرى لكل اللى بيتعاملوا معايا و أفضل أقول أنا طيب أنا حسن النية أنا مش إبن كلب و كل حد يتعامل معايا أفضل أديله فى مبررات لتصرفاتى، طب إيه تعب القلب و وجع الدماغ ده.

طيب هو أنا لو فضلت أتعب فى قلبى و أوجع فى دماغى الناس حتقدر ده؟

أحب أطمنك، لأ عمر ما حد حيقدر بعد اللى حصل فينا و فى الدنيا حوالينا بقينا صعب نثق أوى فى بعض، مع إن مفيش دين بيقولنا كده، يعنى تتفاؤلوا بالخير تجدوه، إنما دلوقتى تفئل بالخير و إعمل الخير كمان و خد على قفاك عادى.

علشان كده أحسن حاجة إنك تتبع إستراتجية أنا مش زيهم ، يعنى إعمل الخير و صفى النية و سيب الضماير على اللى خلق الخلق، لأن هو الوحيد اللى حينصفك و حيقف جنبك وقت الشدة و يرفع عنك الأذى، و مفيش حد غيره، فلو عملت حاجة و حد فسرها إن، اه ده عمل كده علشان ياخد بيه Credit  عند فلان و لا ده عمل الخير ده علشان بيمهد لحاجة تانية، فإنت فكك و خليك دايما على مبدأك الصح و متستناش أى حاجة حلوة من أى عبد، و إعرف إن جزاءك عند ربنا وحده و إن مهما اللى قدامك عمل علشان يإذيك، فأوعى تعمل زيه طول ما نيتك خير حتلاقى ربنا بيقف فى ضهرك و يحميك، و خلى اللى يقول يقول علشان لو إنت حلو حيتكلموا عليك و لو إنت وحش برده حيتكلموا عليك.

أنا عارفة إن الكلام سهل بس التنفيذ صعب، خاصة مع تكرار الألم من ناس كتير حواليك و صفاء النية، فساعات الشيطان ممن يدخلنا من سكة ما تخليك زيهم، حتخسر إيه بالعكس حتبقى زيهم مرتاح البال و لا شايل هم حد، بس لما يجى فى بالك الكلام ده إفتكر صورة السمكة اللى بتنط فى الماية و بتهرب من صحابها اللى أكيد ضايقوها و إفتكر إن ممكن بسببها ربنا كا رافع عنهم أذى و أول ما سبيتهم ربنا حينزل بسخطه عليهم، إفتكر كدا و خلى ده فى بالك و إن شاء الله حتحس بربنا حواليك و بيرفع عنك حاجات و إبتلاءات كتير مكنتش حتقدر عليها لو انت مش مؤمن بيه .

تحياتى

هند مراد

خالتي الحشرية

اليوم الواحد و التسعون
خالتي الحشرية

كل واحد مننا عنده ظروف و عنده أسرار و مش بيحب يبوح بيها لاى حد، يعنى فى حاجات عنك مش لازم كل الناس تعرفها، و تلاقى نفسك بتقول الحاجات دى للناس القريبين منك بس، و طبعا ده حقك.

لكن فى ناس مش بتحب كده و دايما حاشرة نفسها فى حياتك و عايزة تعرف كل صغيرة و كبيرة فى حياتك، بطريقة يمكن تكون مستفزة ليك فى معظم الوقت، و انت ساعات كتير بتبوح بحاجات كتير عنك علشان لما فى حاجة بتكون مستخبية على الناس الحشرية دى بيحكوموا عليك و لا اجدع قاضى و دايما بتكون فى وضع المتهم، و مش بيرتاحوا غير لما يعرفوا السر اللى انت مخبيه و مشاعرك مبتبقاش فارقة معاهم فى حاجة و لا انت شخصيا فارق معاهم فى أى حاجة، كل اللى يهمهم السر أو الحاجة اللى انت مخبيها و خلاص أى حاجة بعد كده شكرا و لا بتفرق معاهم فى حاجة، فبيبذلوا اقصى جهد ليهم علشان السر بس و أول ما بيعرفوه بيذيعوه على الهوا و بث مباشر كمان.

يعنى فى كتير من الناس عندهم ظروف صعبة و مبيحبوش يشاركوها مع الناس زى مثلا لما واحد يكون بيحب مراته اوى و طلعت مثلا مش بتخلف، فلما يجى حد حشرى يسأله مش حنشيل عيالكم بقى، فيقولهم ربنا يسهل ادعولنا، و لا بيدعوا و لا نيلة و كل ما يشوفوا الراجل مع مراته يعكننوا عليهم و يفضلوا يتطفلوا فى حياتهم لحد ما يضطر الراجل يجيب العيب فيه، و برده مش بيسيبوهم فى حالهم و بيعاملوه على أنه كائن ناقص و لا فى حاجة غلط و حاجة تقرف، و لا لما واحدة فى الشغل مثلا فى حالها و مش بتتعامل مع حد كتير إلا فى حدود الشغل، فيجوا مطلعين عليها انها مغرورة و لا بتتكبر على الناس، مع أنها ممكن تكون طيبة جدا بس حياتها الشخصية فيها مشاكل كتير فهى من كتر ما شافت بقت بتفضل العزلة فى الشغل و شايفة أنها بكده تقدر تقلل من الضغط عل نفسها و كفاية عليها المشاكل الشخصية، فقررت متحتكش بحد علشان وجع الدماغ و علشان على الأقل المكان اللى بتاكل منه عيش يكون مفيهوش مشاكل و قالوا و قلنا، لكن برده مش حتفلت من خالتي الحشرية اللى عايزة تعرف كل حاجة عنها، و لما تعرف و مهما كانت حالة البنت مأساوية و لا حيفرق معاهم و مش حيسبوها فى حالها.

طيب حل الناس الحشرية دى ايه، الحل هو تجنبهم و ما نريحهومش، هما مش حيسبوك و حيحاولوا يستفزوك طول الوقت و يحطوك فى مواقف بيكون مطلوب منك طول الوقت انك تبرر كل حاجة، بس صدقونى و بعد تجارب كتير الواحد شافها قدامه، أن مش فارق كتير اصلا لما تريحهم و تبوح بحاجة مش حابب تقولها أو لو قولتها، الناس اللى من النوعية دى كده كده حتتكلم عليك و مش حتسيبك فى حالك، فخليك فى حالك احسن و اوعى تقول حاجة تريح بيها اللى قدامك حتى لو حطك محل اتهام و لا تعبره و دى خلاصة الخلاصة، خالتي الحشرية موجودة فى كل حتة، فاعمل نفسك ميت لما تشوفها أو البس طاقية الاخفاء و ربنا يبعد عنا و عنكم كل شر.

تحياتى
هند مراد  

الظلم

اليوم التسعون

الظلم

كم نقسى على أنفسنا بعض الأحيان، عندما نرضى بظلم قد وقع فوق عاقتنا و إرتضينا به، و لكن ما البديل، هل الإنتقام سنحصل به على إنصاف لنا، أم نترك الأمر برمته و نجلس فى إنتظار المولى عز و جل ليثأر لنا، و يرنا فى من ظلمنا ما قد فعله بنا.

إن الشعور بالظلم و القهر الداخلى، هو شعور مؤلم و خاصة إن لم تكن قد أذيت أحد.  و لكن لابد أن تكون فى قناعة نفسك مقتنع أن الله يضعك فى بعض المواقف و الأزمات لسبب، ربما تجهل أنت السبب أو تعلمه بعد قليل أو لا تعلمه، و لكن سبحانه و تعالى لا يضعنا فى أمراً إلا لسبب يكون فيه خيرا لنا.

و لكن كيف نتصرف عندما يقع علينا ظلما من أحد ما، فمثلا ماذا سيفعل موظف يجتهد و يجتهد و يبذل قصارى جهده من أجل العمل، و غيره من الزملاء لا يبالى و إن تفجرت الشركة و تقطع أصحابها إرباً، و لكن نجد أن أصحاب العمل يفضلون من هو يأتى للعمل كل يوم ليمرح و يلهو و يضيع وقته و وقت غيره دون مغزى عن الشخص الذى يتقى المولى سبحانه و تعالى فى رزقه، كيف سيتصرف الإنسان المظلوم فى هذا الموقف، حيث أن أصحاب العمل أصبحوا يجيدون من يرموا أعباء و مشاق العمل و يسالوه دون غيره لأن عيبه الوحيد  هو إجتهاده و إخلاصه له، و إتقائه لربه فى المقام الأول، هل يتصرف الإنسان المظلوم كما يتصرف الاخرون، هل يترك العمل و يبحث عن عمل اخر، هل يتحدث مع صاحب العمل على الرغم من تأكده أنه على دراية بكل كبيرة و صغيرة فى شركته.

النصيحة هنا، أن لا يتفوه بكلمة لأحد و يعمل ما يقدم له و يقدمه على أكمل أوجه و كما يرضى الله و ليس حتى كما يرضى أصحاب العمل، و هذه الخلاصة و ما رأيته على مر السنين، أن الظلم نهايته سوداء دائما و أبدا و أن صبر الإنسان المبتلى بالظلم يأجره الله عليه أجرا لو علمه المظلوم لطلب يصبر أكثر و أكثر لأن بعد الشدة فرج و خير سينعم به الله على الإنسان المظلوم.

و كم من شركات و دول كانت تظلم و تبنى نفسها على أساس ظالم فاسد، فظلت تعلو و ترتفع فى عنان السماء و يأتى إنتقام المولى سبحانه و تعالى و تجدها تنهار بكل ظالم فيها و تهوى ، و يرى الله المظلوم الإنتقام و يتعجب لقدرته، و تراه أيضا يمن عليه بعطاء و خير لم يكن حتى يأتى بمخيلته، لصبره على الأذى و الظلم الذى وقع عليه و لإعتماده على إنتقامه وحده و ذلك ليس لضعفه و إنما لثقته الكبيرة فى ربه.

و لكم أتعجب لقوله تعالى و لا نزد الظالمين إلا ضلالا، فترى الظالم يتباهى بظلمه و يظن أن كل ما يفعله تجاه المظلومين ليس له إنتقام و يظل فى ضلاله، إلى أن يأتى إنتقام المولى عز و جل، فلو علم الظالم إنتقام ربه لتمنى ان يكون مظلوما دائما و أبدا.

اللهم يا سامع لكل شكوى ندعوك دعاء الغريب.. الغريق.. المضطر.. المظلوم اكشف ما بنا وتداركنا.. فإنا نلوذ بك فعليك كل إعتمادنا واليك قرارنا.. ومنك انتصارنا.. نتوسل اليك أن تفرج عنا ما أمسينا فيه وما أصبحنا عليه حتى لا نخاف غيرك، واحفظنا حال لا إله إلا أنت، سبحانك تعظيما لوجهك.. اصرف اللهم عنا شر عبادك.. وهب لنا أمنك وحمايتك.. ولطفك وكرمك وإحسانك.. وارفع مقامنا.. وفرج كربنا.. يا من إذا أراد شيئا فحسبه يقول له كن فيكون..

تحياتى

هند مراد