تذمر

اليوم المائة و إثنان و أربعون

تذمر

فى حياتنا اليومية و فى يومنا بيكون من الطبيعى إن يعدى علينا أشكال كتيرة من الناس، و بقى من الطبيعى كمان إن فى ناس بنتعامل معاها بتخلي يومنا صعب شوية، يعنى ناس مقرفة من الاخر و بيتعبوا الأعصاب، سواء مدير فى الشغل، صاحب شغل، قريب مقرف و غتت، و صاحب إنتهازى، زميل شغل وصولى، و هكذا من أشكال يصعب التعامل معاها و تقفلك يومك و ممكن تأثر على حالتك المزاجية بشكل سلبى و مش حلو.

فإنت لو إنسان عندك دم و من النوع اللى بيحس و فى حاجة حمرا بتجرى فى عروقه و شراينه أكيد الكلام ده كله حيأثر عليك، و حتلاقى نفسك من غير ما تشعر حالتك النفسية زفت، و عمال تاكل فى تفكيرك و دماغك و اللى قدامك و لا هو هنا، و السبب الوحيد إنك إنسان عندك دم و أحاسيس و بتخاف تزعل اللى قدامك.

بص بقى ياحبيبى و بصى بقى يا حبيبتى، الدنيا كلها مش مستاهلة إنك تهرش دماغك بحد و إن حد يجى فى تفكيرك أساساً و خاصة إذا كان الحد ده بيعك و مقدم مصلحته عليك، فإنت مطلوب من حضرتك تعمل حاجة سهلة أوى أوى، ألا و هى إنك تحب نفسك، أيوة حب نفسك علشان مفيش حد حيحبك قدها و زى غيرك ما بيحب نفسه و بيجى عليك علشان نفسه إعمل كده، فاللى يضايقك و لا تعمله إعتبار و إرميه من دماغك و على أقرب صندوق زبالة و حطه، كمان حضرتك لو حد عمال يأذى فى مشاعرك و فيك طول الوقت و إنت كيوت فى نفسك و مؤدب و مبتردش علشان إنت إبن ناس، فأحب أقولك مبروك عليك الضغط و السكر و القلب و أمراض نفسية أخرى، أنا عايزاك و عايزاكى تعاملوا الناس على حسب عقولهم و تقديرهم ليك، اللى يحترمك إحترمه و اللى ميحترمكش أوعى تحترمه و زعق و هلل فى وشه.. إتذمر و إعترض على طريقته الجارحة ليك، فوقه و عرفه حدوده و خليه يندم انه بس جاه فى دماغه إنه يتطاول عليك و لو من بعيد و أوعى تدخل فى صراعات نفسية مع نفسك و فى دماغك، لمجرد إنك بتتعامل مع إنسان مريض نفسى مش مقدر إنك إنسان متربى و محترم.

و لو إنت مجبر أوى تتعامل مع أشكال مريضة نفسياً و ضالة كده، يبقى متسمحش أبدا بالإهانة و لا إن حد يعلى و يتطاول عليك و لو لازم لازم ..إتذمر ..حتى لو إنت مجبر تعمله حاجة، يبقى الحاجة اللى بتاخد دقيقة تعملها، إعملهاله فى ساعتين و تلاتة، و وإعرف ان هو اللى عنده مشاكل نفسية و إتعامل معاه على إنه مريض زى اللى بتشوفهم فى مستشفى المجانين، يعنى لو مريض نفسى فى مستشفى شتمك، هل هو قصده يشتكم و لا حرام هو مريض و مش حاسس بتصرفاته.

الخلاصة، فى ناس فى الفترة دى ربنا إداهم من فراغ و حاسين دايما بالنقص سواء من ماضيهم أو بحاجة ناقصة فى حياتهم ربنا منعها عنهم، فمتخدش فى تعاملك مع إنسان ناقص على أن إنت اللى وحش و تحمل على نفسك اكتر من اللازم و زى ما قولتك فوق أمه و عرفه وضعه و لو معرفتش يبقى لازم تعرف تخلى نفسك أولا و تشيل الأشكال دى من دماغك.

تحياتى

هند مراد

خليه ينتن

اليوم المائة و واحد و أربعون
#طلع_التوتا_اللى_جواك
#استرجل_ياروح_امك

انتشر فى الأيام الأخيرة على مواقع اللاتواصل الاجتماعى، هاشتاج اسمه#خليها_تعنس، طبعا و أكيد إن اللى عمل الهاشتاج ده انسان بلا نخوة و لا يمت للواقع باى صلة، كما أنه من الواضح انه من النوع ذكورى البطاقة، عدم رجولى الانتماء، و بعيدا عن هذه الشخصية الهلامية الفظة، تعالوا كده نحلل الموضوع بشكل علمى و أبعاد أخرى و نثبت أن الراجل هو اللى بيعنس مش الست.

تعالوا كده ندخل فى حياة ذكورية باحتة و يوم فى حياة واحد شكله الخارجى راجل و محتواه كائن عالة على اللى حواليه و على المجتمع، يصحى هذا الكائن لينادى على أخته أو أمه لتحضير الفطور و لمساعدة الكائن العالة على إشباع حاجة من حاجته الأساسية ألا و هى حاجته إلى الطعام، ثم بعد ما يقوم بتناول فطوره،و يبدأ هذا الكائن بممارسة هوايته المفضلة و هى النظر إلى المراة و أخذ قرار النزول إما ليتسول مع أشباهه، أو إذا كان الكائن يذهب الى العمل فهو فى الغالب فى وقت متأخر دون أدنى تحمل للمسؤولية،  أو لمواعيد العمل و يظل يتملكع بعد تناول فطوره ما بين الصالة و الحمام و عند دخوله الحمام يجلس فيه ما يقرب الساعة و عند خروجه من يدخل بعده فهو فى تعداد الموتى مما يتركه هذا الكائن من قرف و روائح كريهة و ملابس قذرة و آثار همجية فى كل ركن من أركان الحمام، بعدها يتوجه إلى غرفته و يترك المزيد من الفوضى فى كل أنحاء المنزل و يظل يتمرقع فى جميع أنحاء المنزل و جميع مرايات المنزل و يظل يمشط شعره و يضع الكثير من الجل ليثبت شعره المعفن و يفقع مرارة جميع من حوله إلى أن يأخذ القرار و يلمس اوكرة باب بيتهم  و يغور فى ستين داهية ما يوعى و الاهى يتشك فى معاميعه.

و هنا تبدأ رحلة عذاب الأم و الأخت و رحلة الشقاء اليومى لتنظيف مخلفات الكائن العالة عويل المجتمع، فتبدأ رحلة التنظيف الدامية و محو آثار القرف و التوليع فى الملابس كريهة الرائحة، ثم النزول و التوجه إلى السوق و إحضار الخضروات و الفاكهة و ذلك لتحضير  الغذاء و الذى بكل أسى سيتناول  منه الكائن العويل عديم الأهلية، كثير الاعتمادية، فبعد الرجوع من السوق تبدأ رحلة تحضير الطعام و الوقوف بالساعات لتحضير وجبة الغذاء و شىء خفيف للتناول ما بين الوجبات.

و على الجانب الآخر يجلس حليتها على مكتبه ليعمل ساعة أو ساعتين و هذا هو صافى الوقت الفعلي الذى يستغرقه الكائن العويل فى العمل، ليعود بعدها إلى المنزل ماسكا ظهره و كانه سيلد بعد دقائق، و يتوجه إلى غرفته ليخلق الفوضى المعتادة من جديد و لكن هذه الفوضى أقل بقليل من فوضته و قرفه الصباحى المعتاد، ليذهب إلى سريره و كانه مريض قرح الفراش و يريح ظهره من آثار الولادة المتعثرة حين جلوسه على المكتب و العمل لساعتين لوحده روح عين أمه.
ثم يستيقظ حبيب قلبى ليبدأ فى التذمر و المألسة على اكل والدته أو زوجته و يتعوج على الأكل و بعدها يحلى و يطلب شاى، ثم يعاود مسيرته المقرفة و جولته ما بين مرايا الشقة و يعاود الفوضى اللامتناهية لينزل بسلامته مع رفقاؤه اشباه الرجال و يتسامروا على القهوة و ياخد له غرزتين بسيارته المقرفة شبه، و ربما يحتسى سجارتين من الحشيش أو البانجو مع أشباه الرجال امثاله، و يعود فى وقت متأخر بعدما  تكون أمه أو زوجته قد انهكت و استنفزت جميع  طاقتها من أجل هذا البغل اللى فى شكل انسان.

و يجى فى الآخر واحد عديم النخوة يقول خليها تعنس، حضرتك احنا اللى مفروض نعمل هاشتاج و نقول للذكر العويل المتعفن #خليه_ينتن.

هل تعلم عزيزى العويل أن مثلك فى بلاد أخرى يدفع مهرا بوزن العروس، و هذا ليس لغناه و إنما لأنه يعرف و يقدس دور المرأة فى حياته.

هل تعلم عزيزى المتعجرف أن فى بلد موازى، يشارك الرجل اللى بجد زوجته فى جميع الأعمال المنزلية و تربية الاولاد و هذا لا ينقص من رجولته أى شىء بل بالعكس.

هل تعلم عزيزى الجربوع أنك لا تحتسب فى بلاد العالم أجمع رجلا و أنك كائن منفر حتى للقردة أن تقترب من سحنة اللى جابوا اللى خلفوك. 

اكيد انا مش بجمع، لكن للأسف ده الصنف اللى مرمى فى السوق دلوقتى و منتن و عافف عليه الدبان و حاسب نفسه بنى ادم.

و لما يجى فى بالك سلوجان خليها تعنس، ابقى إفتكر أمك يا ننوس عين أمك.

تحياتى
هند مراد
 
  

بيدمروك

اليوم المائة و الأربعون

بيدمروك

موضوع النهاردة عن ناس ممكن تقابلهم فى حياتك و مبيكنش قصدك من معرفتهم غير كل خير، و نيتك السليمة دى هى اللى ممكن تخليهم يستغلوك و يحاولوا يحولوا نواياك الحسنة و حسن خلقك معاهم إلى مشاعر ضغينة و كره و حقد ناحيتهم.

طبعا إحنا مش ملاك و بتتفاوت درجات الخير اللى جوانا من شخص للتانى، و للأسف بقى الزمان ده لنظريات المؤمراة و التخوف و مبقاش حد بيفترض حسن النية فى حد، و لو فرض إن الشخص بيطلع سليم النية أو طيب بتحس إن دى صفة بقت لعنة على صاحبها، لأن بتلاقى اللى حواليه إتلموا عليه و حاولوا يستغلوه أسوأ إستغلال و خلوه يكره اللحظة اللى إتعامل فيها بطيبة، هو يمكن مش كل الناس كده، بس  للأسف الأغلبية بقت كده و بقت الحياة و الناس بتبص على الإنسان الطيب على إنه إنسان أهبل و مصدر إستغلال و صيدة لقطة لكل اللى حواليه.

فى ناس بقى من كتر ظلمها و الغشاوة اللى ربنا حاططها على عينها، بتفتكر إنها ماشية صح، وإنها ممكن تستغل الناس اللى حواليها و تأذيها و تدمرها و تدوس عليها علشان بس مصلحتها، الناس دى متغفلة و ناسية إن فى رب كريم، وإنهم مهما إفتروا فى الدنيا و ظلموا، هو قادر يدمرهم فى ثانية، كام مرة شوفت واحد ظلم مراته و ولاده و طغى عليهم إلا و كانت نهايته سودا زى قلبه، كام مرة شوفت واحد إشتغل واحدة إلا و بعدها ربنا كرمها و عوضها بالخير و هو لبس فى واحدة من شكله تستاهله، كام مرة شوفت ناس أصحاب شغل بتفترى على ناس شغالة عندها و تستغلهم وتدوس عليهم و تفرمهم فى الشغل و تحملهم فوق طاقتهم و تظلمهم فى مرتباتهم وتاكل عليهم فلوسهم اللى شقوا بيها و تلاقى بعدها ربنا بعدله خسف بيهم و بشركتهم الأرض.

الدنيا و اللى عليها مش مستاهلة، و علشان كده أوعى تأذى حد و فى نفس الوقت لو إنت طيب و على نياتك، متسمحش لحد يستغلك، خليك طيب اه، إنما فى حدود و إختار الناس اللى تبقى طيب معاه متمشيش توزع طيبة على اللى يستاهل و اللى ميستاهلش، و لو حسيت إن حد بيستغل طيبتك، إبعد عنه حتى لو إيه، إمشى  و دور وشك عنك، و حتعرف بجد قد إيه إنت فارق معاه لما يخسرك، مش حيعرف قيمتك غير لما إنت تغليها، إنما طول ما إنت ماشى فى سكة العطاء من طرف واحد، طول ما قدامها حتلاقى نفسك عمال تقدم فى تنازلات ويداس عليك و لاحياة لمن تنادى.

و لو إنت مفترى على حد لمجرد إنه كويس معاك و عنده أخلاق، إتاكد عزيزى المفترى إن الإنسان اللى إنت دمرته ده فإيده ينسفك و ينسف اللى خلفوك من على الوجود و إنما هو حكيم، عارف إن الدنيا ماشية بميزان عادل و بحكمة رب كريم، فإفترى كمان و كمان و هنيئا لك بعذاب و قهرة وذل من رب العالمين.

فعزيزى الإنسان اللى ما زال عنده دم .. اللى ربنا نفخ فيه من روحه.. متخليش حد يدمرك.. خلى كرامتك فوق الكل..أوعى تسمح لحد يكتب نهايتك..إوعى تسمح لحد يدمرك.. لو فى شغل سيبه و أمشى و أعرف دايما إن الرزق عمره ما بيقف على بنى ادم زيه زيك.. رزقك دايما على اللى خلقك.. لو متجوزة و جوزك مستغل طيبتك و إنتى اللى شايلة دول الراجل و طالعة بمنظرين و تلاتة و أربعة وكأنك عبد مش إنسان حر وليه حقوق و هو أبيض و فلة شمعة منورة و عايش دور الامر الناهى و مش شايل أى مسئولية.. دورى وشك و إمشى و إعرفى إن الدنيا فيها ناس كتير و عمرها ما بتقف على حد.. و صدقينى إنتى أقوى لنفسك و بنفسك.

تحياتى

هند مراد

لما الدنيا بتقفل

اليوم المائة و التاسع و ثلاثون

لما الدنيا بتقفل

يمكن تكون سنة فاتت بكل بلاويها و مشاكلها وعدت، يمكن كان نفسك السنة اللى جاية تبقى احلى، السنة إبتدت معاك وحشة اوى، كل الظروف ضدك، كل حاجة بتقفلك من إنك تكمل، كل حاجة بتقفلك من انك تكون موجود، إنك تبقى إنت، إنت اللى إنت عايزه مش اللى الظروف عايزاه يكون، كل أمل بيروح و بيضيع معاه فرصة، فرصة فى إن بكرة ممكن يكون أحلى، حاسس بتقل فى رجلك و كل خطوة تقيلة أوى و صعبة أوى عليك بتطلع من حاجة تخش فى حاجة تانية.. تعبت.. هو أنا إمتى حرتاح، لا و الجميل الكل بيحسدوك على طاقتك الزايفة و حيويتك الكدابة و معافرتك و حفرك فى الصخر، إيه ده ؟؟!! دول كمان شايفينك حلو و كيوت و مقضيها، إدوا لنفسهم الحق إنهم يحكموا عليك و إنت أضعف و أبعد إن واحد حتى يستحمل يعيش حياتك و لو ليوم واحد، إيه ده ده إنت بتسافر و مقضيها، و إنت مطحون و تعبان و بتضحك فى صورة ضحكة صفرا تضحك بيها على نفسك و تقنعها إنك زى البنى ادمين.

بيحكموا على ظروفك و يحطوا نفسهم مكانك و يعيشوا عليك، و غيرهم عارفك و عارف كل اللى عندك و بيرمى بزيادة عليك و يحط عليك كمان و كمان، و منهم بيعملوا نفسهم مش عارفين و مستهبيلين و يدورا وشهم عنك و أول ما يحتاجوا حاجة منك بيجوا عليك علشان نفسهم، و منهم مش عارف حاجة بتحاول تفهمه بتلاقيه بيبعد و مش عايز يسمع، ما إنت طاقة سلبية و من الناس اللى المفروض الكل ميقربلهاش، بتعمل بتضحك بتلاقيهم إتلموا حواليك زى النمل و إبتدوا طلبات و يرجعوا تانى يحطوا عليك، و تلاقى نفسك عمال تلف فى دواير زايفة، دواير فيها كل الناس إلا إنت.

بتقعد مع نفسك و إنت أبسط أمنية ليك هى إنت، يوم تخطفه و لو لوحدك تحس بيه بنفسك إنت، مفيهوش ناس مصلحجية و لا سلبية و لا إيجابية و لا شغل و لا مصالح و لا ناس حشرية و لا مسئولية و لا حسابات فى دماغك و لا فكر يشل  و لا ناس وهمية و لا ناس حقيقية ولا حد .. و لا حد... إنت بس .. إنت اللى عليك كل الأضواء.. تحلم تعيش.. تتنفس.. تحس إنك إنسان و ليه حق على نفسه، و أبسط حق هو إنك تعيش إنسان.

حاسس بالوحدة ..بالغربة .. بالخنقة، مفيش ولا إيد بتبطبط عليك، إتخنقت و زهقت من كل اللى حواليك، زهقت تبرر تصرفاتك و ظروفك للناس، قلوبهم حجر عليك و لا إنت فارق مع حد...

لا

إنت فارق على فكرة، فارق مع اللى خلقك، إنت عارف كده، عندك يقين بده، بس ناقصك إلإيمان، فامن بربك، أيوة إحنا لنا رب كريم .. رب حنون.. رب أحن علينا من أى حد، فرجك يا رب، إتولانا يا رب برحمتك، إرحمنا من دنيا العذاب.. إحمينا و قوينا علشان نعرف نكمل.. إبعد عننا الأذى و متحملناش فوق طاقتنا لحد ما يجى اليوم و نجيلك فيه، إرحمنا فى الدنيا و من الدنيا  يا رحيم يا رب.

فبفكركم و بفكر نفسى قبلكم إن لما الدنيا بتقفل، إجرى على اللى فى إيده مفاتيح كل حاجة، قرب منه و إطلب فرجه، و فرجه قريب بمشيئته.

تحياتى

هند مراد

ضلال المساعى

اليوم المائة و الثامن و الثلاثون

ضلال المساعى

فى الحياة عامة كده بنقابل ناس بنتعلم منهم دروس كتير، و مهما كانت الناس دى وحشة، ففى اخر المطاف إنت مجبر على إنك تتكعبل فى ناس وحشة فى حياتك، إنما إنك تفضل معاهم ده إختيارك و مش فرض عليك، و ساعات بقى من ضمن الناس اللى بتتكعبل فيهم ناس مشوشة كده و صعب إنك تحكم عليها، يعنى متبقاش عارف هى ناس وحشة و لا حلوة و مش عارف تحطهم فى خانة الناس الكويسين و لا الناس الأشرار، إتصدق إنت لما كمان تقعد معاهم تحسهم إنهم مبيبقوش عارفين نفسهم كويسين و لا إيه، و ده شبه موضوع النهاردة أوى، لإن موضوع النهاردة عن الناس ضالة المساعى.

طيب فى حد حيسألنى و يقولى أعرف الناس دى إزاى، أبسطهالك

بص الناس الضالة المساعى دى، ناس فى الظاهر حلوة و بتلمع و لكن لما تغوط و تتعمق فيها كده تطلع و لا بتلمع و لا نيلة، يعنى بتبقى زى البطيخة البايظة من برة خضرة و بتلمع و تغريك تشتريها و من جوة بتبقى قرعة و بايظة و ملهاش طعم، أبسطهالك تانى، زى مثلا واحد بيفضل ينصح الناس للخير و يجمعهم حواليه و يقولهم لازم نصلى مع بعض و نمتع عن كل حاجة تغضب ربنا و نتجنب المعاصى يا ناس، و سبحان الله تيجى تقرب منه تلاقيه فيه من المعاصى اللى يخليه يمشى حاطط وشه فى الأرض مش يعمل داعية، فربنا يعفينا جميعا و يعفو عنا يا رب.

المشكلة بقى فى الناس دى إن هى فاكرة إنها صح و إن كل اللى بتعمله ده خير و بتمثل دور الواعظة بشكل كبير و ممكن تلاقى كتير منهم بتطفلوا فى حياة الناس و بيفرضوا سيطرتهم عليهم، و محسسينهم إنهم هما اللى غلط و لازم يسمعوا كلامهم لإنهم صح و كأنهم موكلين عنهم، على فكرة مش شرط أبدا تلاقى الضال سعيه فى صورة واعظ إنما ممكن تلاقيه فى الشغل مثلا، لما مدير متعجرف من كتر تسلطه فاكر إن كل قراراته صح و إن كلامه كل درر و مفروض يدرس فى الجامعات الدولية، و ياخده منه إقتباسات كمان، مع إنك فى حقيقة الأمر لو دورت عليه، حتلاقيه كل كلامه هجس فى هجس و قرارته كلها عشوائية و أى كلام و ليست مستندة على دراسة علمية، و بيحب يسلط الضوء على نفسه بس بإنه يبان مختلف، يعنى لو الناس كلها بتقول يمين هو يقول شمال علشان يحس بالتمييز و العقل الألماظات اللى ربنا إداهوله هو بس دوناً عن مخاليق ربنا  كلهم، و طبعا قرارته اللى بياخدها علشان ينفرد قدام الناس و الناس تشاور عليه و تقول عبقرينو راح عبقرينو جاه، دى كلها قرارات فيستك و أى كلام، و بيلبس فى اخر الفيلم و فى الغالب بيلبس المريلة اللى بتتلبس من قدام و بيروح يعقد مع صحابه العباقرة اللى شبهه.

و أحسن حاجة للتعامل مع الناس الجميلة دى، إنك توجهها و ترشدها للصح و لكن لوأصرت على اللى فى دماغها فحاول على قد ما تقدر تبعد نفسك عنهم و لو مضطر تقرب، قرب بس بالشكل اللى ميسببش لك أذى،  سواء أذى نفسى أو معنوى.

و دايما إفتكر و فكر الناس بالأية الكريمة:

﴿قُلْ هَلْ نُنَبِّئُكُمْ بِالْأَخْسَرِينَ أَعْمَالاً (103) الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعاً (104)﴾

تحياتى

هند مراد