الابتلاء

اليوم المائة و ثلاثة و عشرون
الابتلاء
أحلى حاجة فى الدنيا هى الأيام الحلوة اللى بتعدى علينا، ضحكة بنخطفها وسط زحمة الحياة، لمة حلوة و دفىء عيلة، لحظات و لو مش كتيرة بتهون علينا صعوبة الحياة و قسوتها.

لكن ساعات ربنا بيحطنا فى اختبارات و الإختبارات دى ممكن تكون صعبة شوية، يمكن يكون الاختبار ده فى شكل إبتلاء، بيصعب علينا فى الأول استيعابه و بعد شوية بيصعب علينا التعامل مع الابتلاء ده، و  وجع قلب و مشاعر صعبة على النفس تحملها، و بيجى فى بالنا دايما، ليه انا يا ربى، ليه حصلى كده، يمكن تكون ماشى جنب الحيطة بس سبحان الله تحصلك حاجة تخليك تقول ليه انا، يعنى ممكن تكون متعلق بحد اوى و شايفه أجمل حد فى الدنيا و ابتدى كمان هو يقرب منك، و خلاص قررتوا ترتبطوا ببعض، و جهزتوا كل حاجة و خلاص و قبل شهور من فرحكم، تموت اللى كنت حترتبط بيها و هنا و فجأة بتحس إن الدنيا وقفت هنا، مش عارف تستوعب الموقف، مش عارف انت صاحى و لا نايم و لا بتحلم و انت فى العزا، مين الناس دول و ليه هما هنا، ليه بيقلولى البقية فى حياتك، ليه هى مش حواليا، ليه مش بتكلمنى، و ما بين مليون ليه، بتعدى فترة عدم الاستيعاب إلى فترة انا كنت بعمل كل حاجة معاها و تبدى مشاعر الاشتياق و الحنين إلى الشخص اللى كنت مرتبط بيه، و مش بتعرف تتقبل فكرة حتى انك مش حتشوفه تانى، و بعدين بتبدى تتعود على الغياب بس فى حاجة مكسورة جواك، و جرح و مكان فاضى محدش حيعرف يملاه، و 100 إحساس و مفيش كلمة واحدة عارف توصفه بيها .

اكيد ربنا مش حابب يعذبنا و يقهرنا، و اكيد ربنا له سبب و حكمة فى أى إبتلاء بنتعرض له، بس درجة إيمانك بربك هى اللى حتخليك تعدى مشاعر و أسئلة غريبة بتيجى فى بالك،  بس بعد فترة، ربنا حيوضحلك حاجات كتير كانت بتيجى فى بالك و حيكرمك على قد صبرك، انا عارفة إن موضوع الصبر بيكون صعب على النفس و خاصة لو كان الابتلاء فى أشخاص قريبة منك أو زوال نعم مينفعش تعيش من غيرها، بس حاول تقرب من ربنا على قد ما تقدر و حتلاقيه كريم عليك، و خلى بالك أن الصبر وقت الابتلاء باب ربنا بيفتحوا ليك علشان تقرب منه و تلجأ له،  فأحسن ظنك بربك و ادعيه و حيستجيب أن شاء الله.

الخلاصة، مهما كانت درجة الابتلاء و شدته، أتعامل معاه على أن ربنا عايزك تتقرب منه، و اعرف انك لو قربت من ربك وقت البلاء فأنت بترتقى بنفسك اوى و دى فرصة علشان تقرب من ربنا و تتوكل عليه، و ربنا يبعد عنا و عنكم كل سوء.

تحياتى
هند مراد
         

سنة فاتت

اليوم المائة و إثنان و عشرون

سنة فاتت

كلها كام يوم و السنة تنتهى بكل اللى كان فيها، و سواء السنة دى كانت حلوة أو وحشة، فهى خلاص بتخلص و ماشية، عدت حلوة بقى أو عدت وحشة مش مهم، المهم إنها بتعملنا باى باى و سنة جاية مكانها و إن شاء الله السنة دى تكون أحلى علينا كلنا.

عاوزاكم تعملوا حاجة بسيطة، و مش حتاخد منكم وقت، هات ورقة و قلم و إكتب كل الحاجات الحلوة اللى قابلتك السنة دى، كمان إكتب كل التحديات اللى وقفت قصداك و خلتك مش عارف تحقق هدف أو حلم كنت بتحلم بيه، إبتدى بالحاجات الحلوة علشان تديك دافع و تحمسك، و بلاش تقولى مفيش حاجة حلوة حصلتليى، علشان أكيد أكيد فى حاجة حلوة حصلت بس ممكن تكون إنت شوفتها غلط، يعنى مثلا لو لسة ملقتش شغل، أو رحت عملت إنترفيو و متقبلتش متبصش للموضوع على إنه حاجة وحشة بالعكس جدا، يمكن يكون ربنا شايلك شغل أحسن و بعد حاجة فيها شر عنك، او يمكن يكون ربنا عمل كده علشان يكون عندك وقت تكتسب مهارات معينة و يجيلك شغل أحسن من اللى كنت بتفكر فيه، فدايما خلي عينك على الحاجات اللى بتحصلك فى حياتك و بصلها صح، و بعد ما تكتب الحاجات الحلوة بص بقى على التحديات اللى قابلتك و كانت سبب ف  أن هدفك متحققش، أكتب التحديات دى و شوف إيه الأسباب اللى منعت تحقيق الحلم من عندك، و إيه الأسباب اللى انت مكنتش جزء منها، شوف كده الحاجات اللى فيك و محتاجة تتغير، و شوف ازاى تخلى الظروف اللى خارجة عن إرادتك احسن، أكتب انت إتكلمت ايه من غلط عملته، أكتب كمان حلول لحاجات الغلط اللى انت عملتها، أكتب كل حاجة بوضوح و صراحة، انت بتتكلم مع نفسك فلازم تكون حيادى و واضح و اوعى كمان تيجى على نفسك بزيادة  و تظلمها، بعنى خليك محايد و حقاني مع نفسك وواجه نفسك صح. 


بعد ما خلصت الحاجات الحلوة و التحديات اللى قابلتك، و كتبتها و كتبت كمان ازاى تكون احسن فى مواجهة مواقف قابلتك، أكتب بقى أهداف كبيرة و حاجات نفسك تحققها، أكتب كمان ازاى توصل لهدفك، و حاول تكسر الهدف الكبير الى أهداف صغيرة، و حبهم فى ورقة كبيرة و خليها جنبك، بس خلى بالك بلاش تبالغ فى حاجات تبقى صعب انك تحققها أو توصلها، يعنى حاول تخليك واقعى و لازم تكون عارف قدراتك و متحملش نفسك بحاجات صعبة و فوق قدراتك و فوق احتمالك، يعنى متعقدهاش على نفسك و خليك صادق معاها، و إعمل List كده حلوة و خليها جنبك دايما فى ورقة و على موبايلك و صدق فى نفسك و امن إنك حتحقق أحلامك طول ما بتشتغل عليها بجد.

الخلاصة، ربنا بيدينا نعم كتير و خير أكتر بس إحنا طماعين و عايزين أكتر، فأحمد ربنا على النعمة اللى إنت فيها و خليك طموح مش طماع و إشتغل على طموحك و إتعب بجد لحد ما توصل للى إنت عايزه و إحلم و إحلم و حتوصل إن شاء الله، بإيمانك بربك و إيمانك بنفسك، و خلى كل سنة فى القاعدة اللى إنت حتقعدها مع نفسك علشان تحاسبها، خليها قاعدة فخر و إمتنان للى خلقك و لو محققتش حاجة بس حاولت صدقنى ده كافى إنه يخليك سعيد و عندك طاقة إنك تعافر و تفحت فى الصخر علشان حلمك يبقى حقيقة.

و سنة سعيدة علينا و عليكم أجمعين و أحلام محققة للجميع

تحياتى 
هند مراد

صاحب بالين كداب

اليوم المائة و واحد و عشرون

صاحب بالين كداب

فى مجال الأعمال بشكل عام، أصحاب الأعمال و المديرين بيختاروا دايما الموظفيين متعددين المواهب و اللى عندهم مهارات كتير، يعنى بيحبوا الموظف اللى يكون بيشتغل معاهم يكون عنده خلفية عملية وعلمية فى مجالات مختلفة، و طبعا هنا المثل المعروف و الشهير إن صاحب بالين كداب ده بيكون مش صح، لإن صاحب بالين هنا ده بيكون موفق جدا و بتتهافت عليه الشركات.

لكن تعالوا بقى فى حياتنا العادية و نشوف المثل ده إيه حكايته، يعنى نفترض كده إن فى واحدة أو واحد عجبهم شخص أوى و حسوا إنهم منجذبين ليه بشكل أو باخر، و إتشدوا ليه و بقوا مهتمين يعرفوا كل حاجة عنه و يمكن يقربوا منه، و لكن فجأة و بدون أى مقدمات بيظهر فى حياة الشخص المعجب الولهان ده شخص تانى، بيشده برده ليه و بيحس إنه معجب بيه أوى و بيوصل لمرحلة مبيقاش عارف هو معجب بالشخص الأول و لا الشخص التانى، و بيتدى يقارن فى مخيلته بين الأتنين اللى هو معجب بيهم، و يشيل من هنا مميزات و يحطها هنا و يفضل يعصر دماغه و يحطهم كمان فى مواقف علشان يثبت لنفسه و يقنعها إن لازم يكون فيهم واحد أحسن من التانى، لازم يتشد لواحد فيهم أكتر علشان يعرف ياخد قرار، و يفضل يضغط عل أعصابه و عليهم و مش عارف يوصل لقرار.

طيب تعالوا كده واحدة واحدة نحلل الشخصية اللى بتعجب بإتنين فى نفس الوقت، يمكن الكلام ده حصل لناس كتير و أنا واحدة منهم، بص ياسيدى و ياستى، موضوع إنك تعجب بإتنين فى نفس الوقت ده عادى جدا على فكرة، بس اللى مش عادى إنك تعلق حد بيك و إنت مش متأكد من مشاعرك، حيجى واحد و يسألنى سؤال و و يقولى طيب أنا أتاكد من مشاعرى إزاى؟

أقول لحضرتك، إعرف كده و علطول إنك أول ما حتبتدى تقارن حد بحد تانى حتى لو كانت المقارنة دى Silent و فى سرك، إنك مش فارق معاك حد فيهم و إن مشاعرك سطحية، إنت معجب بشخص فى حاجة ملهاش علاقة بيه هو نفسه و حاجة مش فى جوهره كإنسان بتربطك بيه مشاعر حب حقيقية، يعنى ده بيبقى إعجاب بشخص مثلا علشان شعره حلو، عينه حلوة، بيتكلم حلو، فى وظيفة حلوة، Body Builder، كده يعنى، يعنى كلها أسباب سطحية للإعجاب و إن إعجابك ده مينفعش تسميه حب أبدا، لأن مشاعر الحب دى بتبدى بإعجاب و بعدين و مع مواقف كتير بتقلب بشعور كده بيكون معاه إنك بتكون متقبل الشخص اللى بتجمعك فيه مشاعر حب و بتاخده كده Package يعنى عيوبه اللى ممكن الناس كلها تجتمع عليها إنت مبتشوفهاش أصلا أو بتشوفها و بتتقبلها و عمرك ما يجى فى بالك لو إنت عندك مشاعر حقيقية لحد إنك تحطه فى وضع مقارنة مع حد تانى، و لو ده جاه فى بالك حتلاقيه دايما هو اللى بيكسب.

الخلاصة، إن فى الحب فعلا صاحب بالين كداب، و عن تجربة شخصية و تجارب ناس كتير حواليا، إن الحب ده حمادة و الإعجاب ده حمادة تانى خالص، فلو حضرتك عجبك إتنين فى نفس الوقت، ما تتعبش نفسك و تضغط على أعصابك و تفضل تقارن و تحط لوم على نفسك، سيبك منهم هما الإتنين و إهرب من الدايرة دى بسرعة و صدقنى مع الوقت حتعرف معنى اللى أنا بقوله ده كويس.

تحياتى

هند مراد

الغيرة الرجالى

اليوم المائة و العشرون

الغيرة الرجالى

بنسمع كتير جدا من الرجالة عن قد إيه الستات بتنفسن من بعض، و بيفضلوا يغيروا من بعض على الفاضى و المليان، و إزاى الستات مشاعرها عاملة زى البالون و منفوخة على الفاضى، يعنى تتطلع تطلع و تنزل على مفيش، وده للاسف إنطباع أغلب الرجالة عن الستات و عن إزاى هما بيتعاملوا و ينفسنوا من بعض.

عزيزى الرجل، لو حضرتك ده إنطباعك عن المرأة وإنت شايف إن المراة شخصية ضعيفة و مذبذبة و متقلبة المشاعر، يبقى لازم تعيد تفكيرك أو تبص لنوعية الستات اللى حواليك كويس، لإن ببساطة كده المرأة القوية و التى تثق بنفسها جيدا، لا يمكن أن تترك ذلك الإنطباع لدى الرجل، فالمرأة القوية متعددة الصداقات، تستطيع أن تثق بصديقاتها دون الشعور بأى ضغينة تجاهها أو دون أن تحمل لها فى قلبها غلا أو غيرة كما يسميها البعض، و لكن لأن معظم االرجال يزرعون ذلك فى المرأة التى يتعاملون معها، فتشعر المرأة بأنه فعلا لا يمكن الوثوق بصديقاتها أو أى إمرأة تحيط بها، فيزرع الرجل أن هذه المرأة تحاول التقرب منى و التودد لى، كما أنها تبادلنى نظرات و مش عارف إيه، لحد ما يخلى الست تشك فى اللى حواليها و بعدين يبتدى يقول و يردد الستات بتغيير من بعض، و كذلك الحال بمعظم الرجال.

طيب ما تيجى نشوف موقف كده و نبين لكم فيه العكس، يعنى نبين إن الرجالة هما اللى بينفسنوا من بعض و بيغيروا من بعض، إيه رأيكم فى بنت جامدة جدا، طب إيه رأيكم البنت دى جاية من بلاد الفرنجة و أمورة قوى، تعالوا بقى نشوف اللى حيحصل البنت دى بتكلم واحد و الواحد ده علشان يبين قد إيه هو جامد جمود التنين، رايح اخد صاحبه معاه علشان يستعرض قدام صاحبه ده قد إيه هو مدوخ البنات برة، البنت إبتدت تتكلم معاهم هما الأتنين عادى جدا و مش مبينة إهتماها بحد فيهم أصلا، اللى حيحصل إيه، الأتنين حيبتدوا يظهروا عضلاتهم و يبينوا إنهم جنتل، يعنىى ساعة لما يجيوا يحاسبوا على أى حاجة مثلا، كل واحد حيبين إنه جنتل أكتر من التانى و يسيب تيبس أكتر، و لو البنت طلبت تقابلهم هما الأتنين، بتلاقى إن كل واحد حيحاول يبين قد إيه هو لارج فى نفسه و فى هداياه و كده، و يبتدى صراع لا متناهى من الإستعراض و الفشخرة، لحد البنت ما تزهق منهم هما الأتنين و تقلبهم و تصاحب البواب أحسن.

الخلاصة عزيزى الرجل أبو شنب، الغيرة دى مشاعر زى أى مشاعر و سهل جدا تتحكم فيها، و هى مشاعر غير متعلقة بجنس معين و غير مقصورة على أشخاص بعينها، إنما المواقف اللى الواحد ممكن يتحط فيها هى اللى ممكن تولد عنده مشاعر الغيرة، يعنى متفضلش تتكلم على ممثلة قدام مراتك و تقولها شوفى عاملة إزاى و حلوة إيه و الكلام الملزق ده و متتوقعش منها إنها تضايق، لأن ببساطة هو ده حيكون نفس شعورك لو مراتك قاتلك بص الممثل ده جامد و أمور و من غير كرش طب بص عينه و عضلاته، يعنى اللى إنت حتحس بيه من مشاعر غيرة، هى كمان حتحس بيه، فبلاش تحضر العفريت و ترمى اللوم على الست بس.

تحياتى

هند مراد