الجدعنة

اليوم الثانى

الجدعنـــة

تقريباً كده الناس اللى فى سننا و خاصة فى الفترة الأخيرة بكل اللى بيحصل فيها و اللى مش عايزة أتكلم عنه علشان كلامى حيبقى سخيف جداً، بس أغلبنا بقى شايف إن البلد بقت وحشة أوى و الناس كمان إتغيرت جداً ومبقتش زى الاول، يعنى فين الطيبة و الجيران الحلوة و لمتهم، العزايم اللى كانت بتبقى على الفاضى و المليان، طب بزمتكم بتحسوا بطعم العيد زى الأول! 

بس أقولكم حاجة و حاجة بجد، إحنا عندنا دفا مش عند حد، دفا مش من الشمس الحلوة اللى عندنا.. لا.. ده دفا فى أحساسيسنا و إحساسنا ببعض، اه انا معاكم فى ناس كتير إتغيرت بس لسة برده الخير فينا و جوانا و فى وشوش كتير مننا، اللى منكم سافر و إتغرب حيحس باللى بقوله أوى.

هو مش إنشا بس وسط أهلك بتحس براحة غريبة و أمان حتى لو ظروفكم وحشة، بتحس إن اللمة ممكن تعدى أى حاجة وحشة.

يمكن اللى حصلنا فى الفترة الأخيرة صعب على أى عقل يستوعبه، تخوين و نفاق و تغييرات كتير فوق الإحتمال، بس لسة فى ناس بتثق فى بعض و تحب بعض، فى الكلمة اللى صعب بجد تحسها إلا هنا فى حاجة غريبة بتشدنا لبعض مهما كانت ظروفنا وحشة، الكلمة دى هى "الجدعنة"، عارفين إيه هى الجدعنة، الجدعنة إن تلاقى الدنيا كلها مقفلة فى وشك و يجى حد و يفتحلك كل باب فيها، الجدعنة يعنى تبقى مش طايق نفسك و فى ثانية واحدة تلاقى ضحتك عالية و طايرة فى كل حتة، الجدعنة يعنى ضهر تسند عليه و يمنعك إنك تقع.

إحنا حلوين أوى ..ربنا خلقنا كده و نفخ فينا من روحه وعلشان حلاوتنا تبقى زايدة حتة محتاجين نحس ببعض أكتر و نقرب لبعض، محتاجين ما نخونش بعض و نثق فى بعض أكتر و نرجع عوايدنا الحلوة، يعنى لو كل واحد فينا بدأ بنفسه و فى المربع بتاعه، بدأ يصلح فيه و يجمع الناس حواليه حيحصل إيه يعنى.

جرب فى شغلك ... مع جيرانك ... مع صحابك... و إبدأ بالجدعنة، جرب بجد مش حتخسر حاجة ..جرب يمكن حالنا يتعدل و ولادنا يحسوا بشوية أحاسيس حلوة من اللى كنا بنحسها و إحنا صغيرين.

 

و صباحكم أجمل حاجة فى الدنيا

و مستنية مشاركتكم و رأيكم 

إستنوا حتقولوا إشمعنا صورة فيلم سلام يا صاحبى

بجد الفيلم ده عبقرى أوى و فيه جدعنة مش عادية 

و خاصة الحتة بتاعت إمضى يا أشول ... منتهى الجدعنة الصراحة :) :)