أنواع الموظفين

اليوم السادس

أنواع الموظفين

صباح الخير والسعادة عليكم جميعاً، اللى منكم متابع البلوجر حيعرف إنى إتكلمت عن أنواع المديرين قبل كده و إزاى نتعامل مع كل نوع فيهم، والنهاردة بقى خلونا نتكلم عن أنواع الموظفين و خلى بالك إنت بتقعد مع زميلك فى الشغل و تقابله أكتر بكتير ما بتقعد و تتقابل مع مديرك، فلازم يكون عندك شوية ذكاء إجتماعى وإنت بتتعامل مع زملاء العمل لإن الوقت اللى إنت بتقضيه فى الشغل ممكن يكون أكتر من الوقت اللى بتقضيه مع مراتك، صحابك، أو حتى أهلك فى البيت. 

أول نوع و ده أكيد عندك منه كتير و لازم حتقابله لو رحت أى منظمة تشتغل فيها، و هو "الموظف الدراما"، مين هو الموظف الدراما ده، حضرتك ده موظف تديله Task  أو أى مهمة  يشتغل عليها تلاقيه ردهالك تانى و معاها شوية مشاكل و زحلايق و تفسيح و عياط و حوادث، يعنى لو مثلاَ حضرتك جيت قلتله لو سمحت ممكن تخلصلى التقرير ده و تيجى تانى يوم تسأله فين التقرير، يقوم قايلك و الله يا أفندم وأنا بكتب التقرير وكل حاجة كانت ماشية كويس بس النور قام قاطع و مكنتش عامل auto save و مراتى ولدت فى نفس اللحظة اللى نور قطع فيها و ابنى فى العناية المركزة و أمى جالها الشلل الرعاش لما شافت اللى حصلنا.. دراما دراما يعنى، ده بقى حضرتك التعامل معاه لازم يكون حازم شوية، يعنى دايما تحطه تحت ضغط و متسمعش منه كتير وتديله المهمة فى صورة أمر علشان ينجز و يطور من نفسه لأن ده من النوع اللى ممكن يضيع الوقت و يستهلك منك طاقة كتير ولو إنت بتشتغل معاه فى نفس الإدارة أو إطلب منكم مشروع تخلصوه مع بعض لازم تقسم الشغل بينك و بينه و المدير اللى بيتابع المشروع يكون عارف كل واحد منكم بيشتغل على إيه.

تانى نوع بقى هو "الموظف الرويتر"، وده بقى موظف بيحب ينشر الأخبار فى الشركة و بيكون موسوعة فى حياة كل موظف فى الشركة وعارف كل كبيرة وصغيرة وبينشر الكلام بشكل رهيب والشائعات كمان، و الموظف ده عادةً بيكون دمه خفيف ومحبوب من الناس، لإنه إجتماعى بس ده بيكره يشتغل أوى، حتلاقيه فى كل مكتب شوية و عارف مين اللى بيشتغل ومين اللى مبيشتغلش، وفيه من الموظف الرويتر ده نوع مسالم و بيقى ملوش دعوة بالإدارة العليا و فى منهم نوع خطر وده اللى بيحاول ينقل كل الأخبار للإداراة العليا، و لأن أى مدير فى مكانه بيحب يعرف اللى بيحصل حواليه فتملى بيسمع للنوع ده من الموظفين و لإن أخونا الرويتر إجتماعى وحبوب، فحتلاقيهم كده لاقين بعض فى حتت كتير، وعلشان تتعامل مع الموظف ده لازم كلامك معاه يكون قليل جداً و أوعى تخليه يكرهك، هى معادلة صعبة شوية بس مع الوقت حتعرف تعملها بس اوعى تبينله إنك عارف إنه رويتر و فى نفس الوقت إتكلم معاه بس فى الحياة وحاول بذكاء تسحب نفسك من الكلام معاه فى أى حاجة عن الشغل أو زمايلك فى الشغل.

فى نوع كمان كده تحسه جاى من سنة 30 مثلاً، و هو "الموظف الروتينى"، وده حتلاقيه جايب الجرايد معاه أو بيشوفها أون لاين و لازم يفطر فى الشغل و يكون فول و طعمية و يحبس بكوباية شاى و بعدين يقوم يشتغل نفس الشغل بنفس الطريقة بنفس كل حاجة ..هو هو.. كل يوم.. يمكن بنفس الهدوم كمان، لو إنت بتشتغل معاه حتلاقيه موظف طيب و غير مؤذ تماماً، إنما بقى لو إنت مديره لازم تطٌلع الفنان اللى جواه، يعنى لازم تديله مهام متنوعة علشان تزود عنده ال Creativity  شوية و يطلع من القوقعة اللى حابس نفسه فيها.

فى نوع بقى من الموظفين و ده لو ربنا رزقك بيه تبقى إنت محظوظ جدا سواء كنت زميله فى العمل أو كنت مديره و هو "الموظف الحقانى" ، مين بقى الموظف الحقانى ده، ده موظف عارف إلتزاماته زى ما عارف حقوقه، يعنى حتديله مهمة حيخلصها بما يرضى الله وممكن كمان يبدع فيها و يطلع لنفسه منها مهمة تانية و يقعد يشتغل عليها و طول الوقت ربنا كارمه وعمال يشتغل و مش بيقول لأى شغل حد يدهوله لا، و إذا اتطلب منه إن يشهد بأى حاجة، بيشهد دايماً بالحق ولو شارك فى أى project حتلاقيه أكتر واحد فى المجموعة أو ال Team اللى شغال و شايل الproject  فوق دماغه، بس للأسف بيكون مستغل من جميع اللى حواليه و ساعات كمان مديره بيقعد يديله شغل كتير وممكن كمان ينسب شغله لحد تانى لإن عارف إن صاحبنا الحقانى أهم حاجة تهمه إنه يشتغل و خلاص، هنا بقى أنا مش حدى أى نصيحة للتعامل معاه بالعكس أنا حدى نصيحة للى حيتعامل معاه إنه يتقى ربنا فيه و يحافظ عليه و يديله حقه بما يرضى الله.

و فى النهاية أحب أقولكم إن إنت أرتضيت بشغل معين بمرتب معين و ساعات عمل معينة، فبلاش تتذمر دايما من شغلك أو تطلع الطاقة السلبية اللى عندك على زمايلك فى الشغل و إتقى ربنا فى شغلك حتلاقى ربنا كرمك من حيث لا تعلم و لو إنت بتشتغل و تكافح و اللى قدامك ظلمك، و الله و الله و الله و عن تجربة شخصية و تجارب شفتها كتير جدا، ربنا حيعوضك فى مكان تانى بناس احلى سواء كنت صاحب عمل أو موظف.
و كمان كمدير لازم تفهم كويس نوعية الموظف اللى إنت بترؤسه و تاخد بإيده و تطلع أحسن ما عنده و تحرص إنك تنمى من المهارات اللى عنده دايما.

و ربنا يوفقكم للخير دايما

و اللى مقراش منكم المقال بتاع أنواع المديرين، يدخل على اللينك ه و يقراه:

https://masha3ermagnona.blogspot.com/2018/08/blog-post_7.html