الواد وازيل

اليوم التاسع و الستون
الواد وازيل
انا عارفة فى صعوبة شوية فى قراية اسم موضوع النهاردة بس زى بعضه، حبسطهالكوا، موضوع النهاردة عن الشخصية المذكرة المؤنثة اللى هو كده حاجة مش مفهومة، يعنى شكله راجل او مش راجل اوى يعنى، إنما أفعاله كلها مؤنثة و في فيها ت مربوطة كتييييييييير.

لو تعمقنا اكتر فى شخصية الواد وازيل اللى هو مش مفهوم ولد ولا موزموزيل، حنلاقى كده فى ملامح و طباع مشتركة بينه و بين صحباته البنات كتير، زى مثلا بيحب النميمة موت زى عنيه، يعنى تبقى واقف معاه من هنا و يدوب تدور ضهرك عنه ينزل فيك طراخ طرخخخخخ و كلام من اللى قلبك يحبه و أول ما يشوفك يناديك باسم الدلع و هات يا مدح فيك، و ده طبعا صفة مينفعش تبقى موجودة فى اى راجل ابدا ابدا، غير النميمة فى صفات مشتركة كمان بينه و بين صحباته زى مثلا لو مع الواد وازيل ده واحدة زميلته فى مشوار للشغل، حيروح جى مطمن على نفسه و موصل نفسه الأول و تولع زميلته أهم حاجة هو روح بيتهم، طبعا ماهو يتخاف عليه إنما زميلته دى أرجل منه و حتعرف تتصرف. كمان لو فى مكان جمع بينه و بين أى زميلة له و ليكن فى مطعم، حيسيبها هى تحاسب عادى، لأن هو مش محسوب على الرجالة و لا على الستات و شخصية عالة على المجتمع كله، بس على فكرة الأشكال دى من الكائنات و بكل آسف  حتقابلك و حتبقى مضطر تتعامل معاها، إنما ازاى بقى تتعامل معاها؟!

أولا لازم تدبله حقيقته قدام نفسه و تفهمه أن حضرتك مش راجل خالص و تحرجه فى كل موقف انثوى يخرج منه و متعدلوش أى موقف ابدا، وواجه دايما و متتكسفش منه، لأنه هو اصلا وشه مكشوف لأبعد الحدود فاكسفه و احرقله دمه فى كل موقف، و يا ريت كمان لو تسيحله و تحذر الناس اللى تهمك لو حتدخل فى تعاملات معاه.

لو انت بتشتغل معاه أو عايش معاه ارمى عليه مسئوليات كتير و أفضل ارمى و لبسه علطول و خليه دايما متوتر و مشغول يمكن يسترجل شوية و ربنا يفك كربه.

  من الاخر كده و علشان مطولش عليكم، الرجولة كلمة وموقف و مش كل واحد شكله الخارجى ذكر كان رجلاً، علشان الحقيقة قد تكون مختلفة عن الهيئة و فى بنات لو اتعاملت معاها تحلف أنها بمليون راجل من كتر جدعنتها.

تحياتى
هند مراد