شرح لقاعدة 20/80

اليوم المائة وواحد

شرح لقاعدة 20/80

فى يوم من الأيام، كان فى واحد إيطالى إسمه باريتو و الكلام ده كان فى  سنة 1897، باريتو ده كان عايز يربط النجاح اللى أى إنسان بيحققه بالمجهود اللى بيذله علشان يوصل للنجاح، فبعلمه و بحثه قدر يوصل لنظرية أو قاعدة إسمها 20-80، و النظرية دى ببساطة جدا بتقول إيه!!

بتقول إن 80% من النجاحات و الأهداف بيتم تحقيقها بالتركيز على 20% من الأسباب، إيه الكلام الكبير ده يا أستاذ باريتو.

ندى مثال علشان نقدر نفهم أكتر، يعنى لو إحنا فى شركة  فيها موظفين فحنلاقى إن نجاح الشركة دى بيتحقق من خلال 20% من إجمالى الموظفين،و كمان مثال، يعنى لو فى مجتمع معين و 20% بس منهم اللى متعلمين، فال20 % دول هما اللى حيقدروا يساعدوا باقى 80% من المجتمع علشان يتعلموا، كمان لو فى دولة حنلاقى إن مثلا 20% من مساحة الدولة دى هى اللى الناس عايشة فيها، 80% ما بين صحراء و طرق و أماكن غير مستغلة.

فاللى بيتضح من قاعدة 20-80 إننا نقدر نحقق نجاحات أكتر فى وقت أقل و بإستخدام موارد قليلة، و مش شرط بالنسب بتاعت القاعدة و لكن مضمون نظرية 20-80 بتقولك إن النجاح عامة و النتيجة اللى ممكن تحصل عليها فى أى حاجة  بتيجى من جزء صغير بس من الأسباب بتاعتها.

فى عالم بعد كده إسمه ريتشار كوتش فى  سنة 1998 شرح إزاى نستغل القاعدة دى فى 3 جوانب مهمة فى حياتنا، و هى:

- العمل

- العلاقات الشخصية

- أسلوب الحياة  

أولا فى العمل: قسم ريتشارد العمل إلى جزأين، جزأ مثمر و جزأ غير مثمر

يعنى مثلا فى الشغل فى حاجات ممكن ننجزها و بتكون النتيجة بتاعتها مثلا إنهاء صفقة معينة، أو ربح بيدخل للشركة، تقرير إتعمل و طلع فيه توفير مبالغ المفروض كانت حتبقى إلتزام على الشركة، و الجزء الغير مثمر من الشغل زى مثلا الوقت اللى بيضيع فى الفطار مع زملاء العمل، مواقع التواصل الإجتماعى، المكالمات الشخصية داخل العمل، و غيره من مضيعات الوقت، فللأسف و بعد دراسة لقوا إن الجزأ الغير مثمر ده بيمثل 80% من وقت العمل و إن الجزأ المثمر بيمثل 20% من وقت العمل فنصيحة ريتشارد إنك تشوف الجزأ المثمر فين و تستثمر فيه وقت أكبر و تفضل تكبر فيه على قد ما تقدر.

ثانيا فى العلاقات الشخصية: هنا وضح ريتشارد إن ممكن تكون بتعرف ناس كتير فى حياتك و لكن 20% بس منهم هو اللى بيأثر فيها، يعنى أن 20% بس من صحابك هما اللى بيعملولك سعادة و إنت وسطهم أو20% بس من صحابك لو إحتاجتهم حواليك حتلاقيهم جنبك، فريتشارد هنا بينصحنا إن بدل ما نضيع طاقتنا و وقتنا مع ناس ممكن تكون مصدر إزعاج لينا أكتر ما تكون مصدر سعادة، إننا من الأحسن نركز مع الناس اللى بتدينا طاقة إيجابية و دفعة أحسن فى حياتنا و ده حيوفر لنا وقت و مجهود و حياة أسعد.

ثالثا فى أسلوب الحياة: هنا وضح ريتشارد إننا بنضيع و بنحرق طاقة كتير خلال اليوم فى حاجات مش مفيدة و مش حتخلى حياتنا أحسن، زى لما واحد يكون لسة متخرج و بيدور على شغل، فبتلاقيه أنه مثلا بيضيع 80% من وقته و هو قاعد مع صحابه على القهوة أو بيتكلم فى التليفون أو بيلعب بلاى ستيشن، المهم إن 80% من وقته ضاعوا بدل ما يروح ينمى من القدرات و المهارات اللى عنده أو يكتر الوقت اللى ممكن يدور فيه على شغل أو يحضر مؤتمرات و يتعرف على ناس ممكن تساعده إنه يلاقى شغل بطريقة أسرع، و هنا بينصحنا ريتشارد إننا نثتثمر وقتنا و نغير من أسلوب حياتنا بالطريقة اللى نكون بيها منتجين اكتر.

أتمنى أكون قدرت أشرحلكم قاعدة 20/80 بطريقة سهلة

تحياتى

هند مراد