واجه خوفك

اليوم المائة و تسع و أربعون

واجه خوفك

كتير مننا بيخاف من حاجات معينة، زى تجربة ممكن يجربها، مكان بعيد ممكن يروحه، حاجة مختلفة ممكن يعملها، ناس غريبة ممكن يعرفها، و الخ الخ من الحاجات اللى ممكن تخوف حد يعملها،  بس حد بيزنيس جديد ممكن يدخل فيه، فكر كده شوية أن ايه اللى حيحصل يعنى لو واجه خوفه، ايه اكتر حاجة وحشة ممكن تحصلك

يعنى لو خايف تروح مكان مختلف و بعيد عنك، حيحصل ايه لو روحته، أنا حقولك، يا اما حتروح و المكان حيطلع فعلا وحش ،يا إما حيطلع حلو و لو كنت خايف تروحه قبل كده يبقى كنت حتضيغ على نفسك انك تجرب مكان جديد و تستمتع بيه و تعيش تجربة مختلفة فى مكان مختلف

طبعا انا مع ناس كتير حتقول ان ساعات مواجهة الخوف بيكون فيها بعض من الخطر، بس هنا فى مبرر حلو اوى و انت بتواجه خوفك من حاجة او من حد معين، ان احساس الخوف اوحش بكتير من احساس الخطر، لان انك تخاف و تفضل قلقان طول الوقت من حاجة معينة اكتر بكتير من انك تختار المواجه حتى لو خسرت حاجة قصاد انك واجهت خوفك

يعنى مثلا لو واحد معجب بواحدة اوى و خايف يواجها و فضل خايف و خايف، لحد ما فى يوم لقاها داخلة عليه بتعزمه على فرحها، طيب بزمتكم يعنى احساسه بعد الصدمة اهون و لا المواجهة كانت حتبقى احسن، على الاقل المواجهة بتخليك تعرف راسك من رجليك و تبقى عارف أولك من اخرك، و ده احسن ما تعيش نفسك فى قلق و توتر و كل ده ممكن يكون وهم كبير انت واهم نفسك بيه و ملوش اساس على ارض 

الواقع

طبعا علشان حد يقرر انه يطلع المارد اللى جواه و يواجه خوفه، ده حيتطلب انك تقعد تحسبها كده و تخطط و تدرس كل ابعاد مخاوفك، و تبدى واحدة واحدة تقسم الخوف الكبير الى مخاوف صغيرة علشان تبدى تكسر المخاوف الصغيرة واحدة ورا التانية لحد ما تلاقى نفسك كسرت خوفك كله و واجهته، يعنى مثلا لو انت عندك فوبيا من الاسانسير و عايز تتخلص من الخوف ده، جرب كده تطلع بسلم كهربائى لمدد كبيرة، جرب تتفرج على ناس طالعة و نازلة فى الاسانسير كتير، جرب تدخل الاسانسير و متركبش، و افضل جرب و جرب لحد ما توصل لمرحلة انك من كتر ما شوفت التجربة ،انك تتشجع و تعملها، يلا اركب و اطلع دور كده... الله ما الموضوع سهل اهو، اومال كنت مصعبها على نفسك ليه

كل حاجة فى اولها صعبة، بس انك تاخد فرار من جواك انك مش حتستسلم وحتقاوم، صدقنى ده حيقويك و يخليك تواجه اى حاجة، ابتدى بس انت و اعمل اللى عليك و توكل على الله و ان شاء الله حتقدر تقاوم خوفك، و افتكر دايما ان ممكن الخوف اللى جواك ده، تكون انت اللى عامله فى دماغك بس و هو مش كده فى الواقع

تحياتى

هند مراد

إزاى تسوق نفسك فى المقابلة الشخصية

 

اليوم المائة و ثمان و أربعون

إزاى تسوق نفسك فى المقابلة الشخصية

صباح الخير و السعادة عليكم جميعاً، موضوع المقابلة الشخصية ده موضوع بيقلق ناس كتير منا و مش شرط إنك تكون متخرج علشان تكون قلقان منه، يعنى ممكن يكون عندك عدد من سنين الخبرة الكافية إنك تاخد الوظيفة اللى إنت متقدملها و لكن للأسف مبيحصلش لإنك معرفتش تسوق لنفسك كويس.

إسمع بقى منى شوية نصائح بعد اللف على شركات كتير وعمل مقابلات كتير، لقيت إن أحسن طريقة علشان تخلى الشركة هى اللى تتمنى تشغلك إنك تعامل نفسك على إنك سلعة، معلش متفهمنيش غلط بس و إقرى للاخر، يعنى إيه اللى إنتى تقصديه من إنى أعامل نفسى على إنى سلعة، يعنى حضرتك تشوف إيه المميزات اللى عندك و تبتدى توضحها للى قدامك، بصوا هو أنا درست و قريت شوية حلوين فى التسويق، و كان فى نموذج كده و إنت بتعمل إعلان لازم تطبقه و إسمه " The Aida Marketing Model" 

إيه الكلام الكبير اللى إنتى بتقوليه ده، إبسطهالك

يعنى الإعلان علشان يبقى جامد والناس تشوفه و تاخد بعدهACTION ، بيبقى متوفر فيه شوية حاجات اللى هى فى كلمة AIDA:

أولا: حرف A من Awareness : يعنى إيه، يعنى من و إنت داخل الإنترفيو تكون محضر نفسك كويس جدا، لبسك .. برفانك.. كلامك.. حركاتك.. مواعيدك.. معلومات عن الشركة ..الجديد فى مجال شغلك .. ، كمان مهم جدا إنك تكون عامل السيرة الذاتية بتاعتك بشكل إحترافى.

و إعرف إن أى شركة لما بتعلن عن وظيفة، هى بيكون عندها مشكلة فى المكان ده و الشخص اللى طالباه يتعين ده المفروض إنه حل للمشكلة ديه.. يعنى دايما خليك إنت الحل فى الأسئلة اللى حتتوجهلك و ياريت تثبت ده بأمثلة فى أماكن إنت إشتغلت فيها قبل كده أو حتى إتدربت فيها أو حتى فى عمل تطوعى كنت بتعمله و دايما خليك مختصر و تبقى محترف جدا لو أظهرت شغفك للإنضمام بالشركة و لكن بشكل غير مبالغ فيه.

ثانياً: حرف I من Interest: طبعا لو قدرت تعمل Awareness ده بيأهلك كويس و يخلى اللى بيعملك المقابلة الشخصية مشدود للحديث معاك قدامك وعنده الإهتمام إنه يسمعك و مهتم بالكلام اللى إنت بتقوله، و لو إنت معلم بقى يا ريت ترمى كده وسط كلامك إنك بتحب تشتغل فى فريق و بتحترم الخبرات جدا و بتحب تتعلم من الناس الأكمتر خبرة و إدى مثال على حد إشتغلت معاه حتى لو فى نفس المستوى الوظيفى و إتعلمت منه إيه.

ثالثاً: حرف D من Desire: ديه بيكون فارق بينها و بين المرحلة اللى قبلها اللى هى Interest حاجت بسيطة بس خلى بالك لإن ديه مرحلة مهمة و ممكن تبوظ المرحلتين اللى فاتوا، ديه بقى المرحلة اللى الشخص اللى بيعملك الإنترفيو بيبتدى يرسم فيها صورة عنك و حتلاقيه بيتدى يطرح أسئلة كتير حتى لو كانت أسئلة عن الحياة فمهم جدا إنك تستخدم شوية مصطلحات جامدة فى المجال بتاعك و نتكون واثق فى نفسك.

رابعاً: حرف A من Action: هنا بقى بتعرف يا معلم حتى من ملامح اللى قدامك إنك إتقبلت و لا لأ، و ألف مبروك على الوظيفة الجديدة اللى تعبت علشان تاخدها و إتأكد إنك كل ما بتحضر أكتر و بتقرأ أكتر و بتاخد الموضوع بمحمل الجد مش إنك رايح تعمل اللى عليك كل ما نسب نجاحك إنك تاخد الوظيفة بيكون أكبر.

و ربنا يرزق كل واحد مجتهد بيدور و بيسعى بجد و خلى بالك الصبر فى مرحلة السعى للحصول على وظيفة بيقوى عندك حاجات كتير، أهمهم الإيمان بالله سبحانه و تعالى، و إن رزقك مكتوب مكتوب و محدذ حياخده منك بس لازم لازم تسعى و حتقع و تقوم و تقع فخليك جامد.

مع خالص أمنياتى بالتوفيق للجميع

هند مراد