الفرصة

اليوم المائة و إثنان و خمسون

الفرصة

كام مرة سمعت الجملة دى؟

الفرصة بنت حلوة راكبة عجلة !

سمعتها كتيرصح و لا حتى يمكن تكون أول مرة تسمعها، مش مشكلة .. المهم إنك بتقرا الجملة دى دلوقتى و بتدورها فى دماغك، و يمكن تكون إفتكرت كام فرصة عدت و فلتت منك علشان كنت مش مركز معاها، فرصة سفر، فرصة شغل، فرصة ترقية، فرصة جواز..... و إلخ إلخ من الفرص اللى ممكن تكون طيرتها من إيدك.

طيب اللى فات فات و عدى خلاص، إزاى بقى نتعامل مع الفرصة الجديدة اللى جايلانا، حديكوا مثال بسيط كده و تعالوا نكتشف مع بعض إزاى نستغل الفرص اللى بتجيلنا صح و نطلع إحنا الكسبانين، يعنى فرضاً دلوقتى حضرتك فى شغلانة محترمة و الناس بتشاور عليك و تقول أستاذ فلان راح أستاذ فلان جه و حضرتك مبسوط و السنين بتجرى و حضرتك خبرتك فى نفس المكان عمالة تزيد و تكبر ما شاء الله و إنت زى ما إنت فى مكانك .. محلك سر.. أستاذنا الكبير راح أستاذنا الكبير أوى جه،  و وسع يا جدع .. حتنفجر من كتر حجمك فى نفس المكان، طيب فكرت كده تقعد مع نفسك و تحسب حساباتك، يعنى ببساطة كده إنت لو فى نفس المكان لمدة عشر سنين، ألف مبروك يا سيدى حضرتك عندك خبرة واحدة بتتعامل مع ثقافة واحدة و شغل روتينى واحد لمدة عشر سنين بس فى الواقع إنت معندكش أى حاجة و إنت فى كذبة كبيرة إسمها الإستقرار، طيب واحد صاحبك كلمك و قالك الشركة الفلانية محتاجة حد فى خبرتك و كمان حتعمل حاجات مختلفة و حتتوسع فى علاقات و تعرف ناس أكتر، تبتدى حضرتك تدورها فى دماغك يمين و شمال، فوق و تحت، يجيلكك هواجس و مخاوف و تحس إن روحك بتروح منك لمجرد فكرة إن جالك شغل فى مكان تانى، إحساس إنك حتتسيب الشركة اللى بقالك فيها عشر سنسن حيقتلك.

بس تعالى كده نحسبها ورقة وقلم، المكان اللى إنت فيه حاليا جميل؟ اه يا باشا ده جميل و ميت فل و 10 اومال حضرتك أنا قاعد فيه بقالى عشر سنين بعمل إيه.... حلو أوى عندك.. إمسك هنا.. حضرتك قاعد بقالك عشر سنين بتاكل عيش بس مش بتتعلم، تعرف إن حيعدى عليك وقت و تتمنى تمشى من المكان اللى إنت فيه و تروح مكان تانى حتى لو حتدفع من جيبك، حتقولى بس أنا عندى إلتزامات و خايف اخسر القديم و مرتحتش فى الجديد، حقولك ببساطة فى حاجة إسمها تجربة و يجى هنا دور فن إستغلال الفرص، يعنى لو بتجرب حاجة جديدة متخسرش القديم، يعنى فى حالة الموظف أبو عشر سنين ده ممكن ياخد أجازة شهر من غير ما يفهم صاحب الشغل إنه جاله فرصة تانية، و يروح يجرب المكان الجديد و لو إرتاح كان بها و لو مرتحش يرجع مكانه معزز مكرم، إنما فن التجربة ده و متعة دى حاجة بيدفع عليها فلوس، و طول ما إنت عايش عافر و دور يمين و شمال عن فرصة تتعلم بيها حاجة جديدة، صدقنى المكان اللى بتدفن نفسك فيه و بتديله عمرك مش حيفيدك بحاجة و لو مش بتجرى ورا تطوير نفسك، حتفضل محلك سر، و قيس على كده أى فرصة بتجيلك و إنت بترفضها و مش بتحاول تستغلها لصالحك سواء فى حياتك الشخصية أو العملية.

فاتعلم فى حياتك دايما إنك تدور على الفرص و لو جاتلك فرصة أوعى تفوتها وخليك ذكى و إنت بتختار و خليك دايما فاكر إن الفرصة بنت حلوة راكبة عجلة ... حتجرى بسرعة لو مكلمتهاش.

تحياتى

هند مراد