ملخص كتاب العادات السبع للناس الأكثر فعالية

اليوم الواحد و السبعون

ملخص كتاب العادات السبع للناس الأكثر فعالية

بعد ما قعدت مع نفسى شوية، قولت إيه المشكلة يعنى لو شاركت الناس اللى متبعانى حاجة قريتها وعجبتنى، يمكن ربنا يجعلنى سبب فى إنى أفيدهم بحاجة و لو بسيطة، فبصراحة لقيت من الكتب اللى قريتها فى حياتى و فادتنى جدا هو كتاب العادات السبع للناس الأكثر فعالية، للعظيم ستيفن كوفى، الكتاب ده إتنشر عام 1989 و تم بيع أكتر 15 مليون نسخة منه فى الولايات المتحدة بس ، و أكتر من 25 مليون نسخة حول العالم و ستيفن بصراحة له كتب كتير بهرنا بيها عن تطوير الذات "Self Development" فخلونا نستعرض ملخص الكتاب و نفهمه أكتر مع بعض و يمكن تلاقونى منزلة ملخص عن كتب تانية ليه فخليكوا متابعنى:

الكتاب بيستعرض 7 عادات بيشترك فيهم كل الناس الأكثر نجاحا فى حياتهم و العادات دي من الممكن تعلمها و إكتساب مهارات من خلالها علشان تبقى أكتر نجاحا فى المكان اللى إنت فيه و العادات هى:

1-  المبادرة "Be Proactive": و دي معناها إنك تكون سباق فى تفكيرك دايما وإنك تكون كمان إيجابى فى ردود أفعالك يعنى حتى لو حصلت حاجات عكس ما كنت مخطط لها، خد الجانب الإيجابى من الموضوع و إشتغل على حلمك أكتر و خد من أى حاجة إنت منجحتش فيها درس ينفعك بعد كده، و خليك دايما مستعد و متستناش الحاجة تجيلك لحد عندك، و اسعى علشان توصل لهدفك، و اوعى تعلق سبب نجاحك على روف وهمية و إفضل عافر لحد ما توصل.

2- إبدأ و النهاية فى ذهنك "Begin with the in mind":  و دى معناها إن دايما كده خلى فى بالك نهايتك، يعنى لو لا قدر الله ربنا إفتكرك، حتكون حابب الناس تفتكرك بإيه، و إيه الإنجازات اللى نفسك تحققها فى حياتك علشان الناس اللى حواليك تفتكرك بيها، و حابب الناس و هى بتترحم عليك تقول إيه، يعنى يقولوا ياه الراجل ده و لا الست دى كان صالح/ة أوى، أو كان راجل علم و مش بيبخل بعلمه على أى حد، أو كان راجل خلوق، أو كان قائد عظيم و بيحب يوجه اللى حواليه، فمن الاخر اللى نفسك الناس تقولوه فى حقك و إنت ميت إشتغل على إنه يبقى صفة فيك و انت عايش، و خلى بالك دايما وأتاكد اللى إنت بترسم الصورة اللى حتفضل ذكرى ليك و عايشة مع اللى حواليك.

3- رتب أولوياتك "Put First thing first": و دى حاجة مهمة فى حياة أى شخص ناجح، إنه لازم يحط أولويات لخططه و حتى لترتيب يومه و الحاجات اللى عايز ينجزها فيه، لأن اللى بيفرق الشخص الناجح عن غيره هو كم الإنجازات اللى بيعملها فى حياته و كيفية إدارته لوقته بشكل كفؤ و فعال، يعنى ببساطة كده و بدون تعقيد رتب أولوياتك على حسب أهمية الحاجة اللى عايزة تخلص الأول و شوف إيه أصعب حاجة و إبدا بيها و الأسهل واللى مش مهم سيبه فى الاخر، ولو عرفت تعمل كده يبقى أى حاجة بعد كد تبقى سهل لإن إدارة الوقت ده من أكبر التحديات اللى ممكن تواجهك علشان تبقى إنسان ناجح.

4- فكرة بطريقة مربحة لجميع الأطراف "Think win win": و دى معناها ببساطة كده إنك تتمنى الخير للى قدامك حتى وان كان خصم ليك و متحملش ضغينة لأى حد، و دايما إعرف إن جزء من نجاحك هو مساعدة الاخرين، و إن المشاعر السلبية اللى من ضمنها تمنى الفشل للطرف الاخر دى بتاثر عليك نفسيا قبل ما تاثر على الطرف التانى، ولو إنت صاحب شغل و فاكر إنك بتنجح لوحدك، يبقى إنت أكيد لازم تعيد حساباتك، لأن نجاحك ده بيكون سبب كبير منه هو نجاح الناس اللى تحت إدارتك.

5- حاول أن تفهم أولا قبل أن يفهمك الاخرون "Seek First to understand then to be understood": و دى معناها إننا نتعلم إزاى نسمع و بعد ما نسمع ندور الكلام فى دماغنا و بعدين نرد لان التفكير فى الكلام واستيعابه بيسهل كتير اوى من التواصل مع أى حد، لان الكلام الكتيرو المقاطعة المستمرة بدون الاستماع بيخلي فى دايما مسافة بعيدة بينا و بين الطرف الاخر، و فى مقولة شهيرة يمكن معظمنا يكون عارفها و هى "إذا كان الكلام من فضة فإن السكوت من ذهب".

6- التعاون الإبداعى "Synergize" :و ده معناه أقرب إلى فريق العمل، يعنى التعاون مع مجموعة من الناس عندهم مهارات مختلفة و كلهم بيشتغلوا على هدف واحد و بيتجمعوا مع إختلاف مهاراتهم و أشكالهم و ظروفهم و بيقدروا ينجزوا اللى هما عايزينوه مع بعض و يتعاونوا بشكل فعال علشان تحقيق الهدف و إخراجه فى أحسن صورة، و طبعا التعاون ده بيحتاج قدرة عالية على التواصل و التكيف مع الاخر.

7- سن المننشار"Sharpen the saw": وده معناه، إن الواحد مهما كان سنه و قدراته و معرفته، لازم يفضل يستثمر فى نفسه طول الوقت و يزود دايرة معرفته و ميوقفش قراءة و يفضل يدور على معلومات أكتر و يزود المهارات اللى عنده أكتر، علشان يقدر يواجه التغيير اللى بيحصل حواليه و يكون دايما مستعد للاحسن، و الكاتب هنا إدى مثل إن لو كان عندك 10 أشجار و إنت معاك منشار و إطلب منك إنك تقطع الشجر بالمنشار فى 10 ساعات، فإنت أكتر حاجة تركز عليها إنك تسن المنشار و تخليه حامى بدرجة كفاية فإدى لسن المنشار 5 ساعات وبدل ما كان حيتبقى عندك 5 ساعات لعشر شجرات، لا ده بعد ما سنيته حيقدر يقطع 20 شجرة فى 5 ساعات.

يارب تكونوا إستفدتم من ملخص الكتاب، وده لينك الكتاب الأصلى للى حابب يقراه كله:

http://www.stafforini.com/docs/Covey%20-%20The%207%20habits%20of%20highly%20effective%20people.pdf

تحياتى

هند مراد