إزاى تفكر بشكل أحسن

اليوم الثانى و السبعون

إزاى تفكر بشكل أحسن

ساعات فى مواقف كتير بنطحط فيها و بنكون محتاجين ناخد قرارات سريعة، بس السرعة فى معظم الوقت مبتبقاش فى صالحنا، يعنى علشان القرار يتاخد صح، محتاج ياخد وقت فى التفكير و دراسة كده و أفكار تجيبها شمال و يمين، لحد ما تقرر و تستقر على رأى وارد يكون صح ووارد يكون غلط، بس الحكاية ملهاش علاقة بطول أو قصر فترة التفكير فى إتخاذ القرار، الحكاية كلها بتعتمد على جودة التفكير مش الوقت أبدا.

و فى بعض الحاجات اللى ممكن تعملها تخلى تفكيرك أحسن زى، زى إنك تعود نفسك تفكر بسرعة، اه طبعا مش حتعرف تعمل كده بسرعة بس مع التجربة و التعود حتقدر مع الوقت تفكر اسرع، يعنى ساعات مثلا لو جيتى تختارى فستان سهرة بيعجبك حاجتين من نفس المحل، و اللونين حتى المودلين بيكونوا مختلفين تماما لكن لما تدربى نفسك على إنك تحطى وقت أقل للتفكير، حتلاقى نفسك بعد كده و إنتى بتشترى حاجة بتنجز جدا و مبتخدبش وقت كتير، و بتستفيدى بوقتك إنك تعملى حاجات تانية غير إنك تلفى فى المحلات.

كمان ممكن تخلى تفكيرك جودته أعلى، لو عودت نفسك تكتب أفكارك، يعنى كل فكرة تجيلك تكتتبها و بعدين ترتبهم مع بعض حتوصل كده لقرار أحسن من إنك تفكر من غير ما تكتب، يعنى مثلا لو عايز تختار كلية و مجموعك سماحلك إنك تدخل أكتر من كلية، يبقى تحط كل الكليات اللى إنت عايزهم جنب بعض  و تبتدى تكتب عيوب و مزايا كل كلية، و بكده حيبقى سهل تختار الأحسن بالنسبة لك و تفكيرك حيبقى مرتب جدا.

و إنت كمان بتفكر، إبعد عن النمطية فى التفكير و الحاجات التقليدية و حاول تبدع  طرق جديدة و حلول جديدة تخلى بيها قرارك أحسن، لأن كتير من الوقت الحاجات النمطية بتميل إنها تكون روتينية و مملة و كمان بتقفلك و إنت بتفكر، و علشان تفكر تفكير مش تقليدى، روح فى حتة كده تديلك أفكار و تشجعك إنك تبدع، كمان خد رأى ناس حواليك و يا ريت االناس دول يكونوا مش نمطيين، كده حتعرف تجيب أفكار مبدعة أكتر.

و اخيرا و دايما خليك واثق من نفسك و إنت بتاخد أى قرار، لان ده حيشجعك إنك تجرب، و تتعلم و تنمى قدرة التفكير عندك، و مش علشان خدت قرار غلط مرة تخاف تفكر، لا بالعكس ده يخليك تجمد و تقوى و تحاول أكتر لحد ما تفكيرك يضبط و تاخد قرارك صح.

تحياتى

هند مراد