زمان وأنا صغير

صباح الخير عليكم جميعا، من زمان أوى كان نفسى فى حاجات كتير أعملها، فيها حاجات عاقلة وحاجات مجنونة زى كل حد فينا بس أنا كنت مختلفة عنكم شوية، لأن مكنتش بشارك حد أفكارى ومن هنا و بعد وقت كتير أوى جاتلى فكرة إن أكتب كل الحاجات اللى كان نفسى أعملها وكل الحاجات اللى كان نفسى أحققها مش بس كده، نفسى أتكلم عن مواضيع تهم الناس وعن حاجات حققتها و نجحت فيها وعملت كده إزاى، نفسى أتكلم عن حاجات فشلت فيها و إزاى عديت مرحلة الفشل، المهم إنى نفس أشارك الناس أفكارى، وكمان نفسى يتفاعلوا معايا يمكن نقدر نفيد بعض لأن زى ما إحنا شايفين الدنيا بقت بتاخد الناس من بعض أوى، بقيت بتشوف صحابك أون لاين أكترما بتشوفهم بجد حتى لو كانوا حواليك، بقيت من كتر الضغط مش عارف هو ده صاحبى و لا تهيؤات. حكون معاكم فى 365 يوم ب 365 موضوع، التحدى كبير و مش ساهل بس بوجودكم معايا و مشاركتكم حقدر و حنقدر كلنا نتواصل مع بعض و نوصل لبعض مشاعرنا المجنونة اللى ممكن تخلى يومنا أحلى و حكون مبسوطة أوى بمشاركتكم ليا و إنكم تقوليلى إيه المواضيع اللى حابين نتناقش فيها. 

يلا نبتدى

الموضوع الأول

زمان و أنا صغير

و أنا صغيرة كنت طفلة تقدر تقول عليا مش عادية، كنت شقية جدا وأحب الإطلاع و القراءة جدا جدا بس كان عندى حلم غريب، إنى أكون زى أخويا الكبير يعنى أخد نفس التعامل، نفس الإمتيازات والحقوق، يمكن ده عيب فى مجتمعنا الشرقى إنهم بيفرقوا بين الولد والبنت فى التربية.  يعنى الولد ياخد مصروف أكتر، حماية أكتر، دلع أكتر، لعب أكتر و البنت مسكينة بتسكتها أى لعبة أو أى حاجة بسيطة.

 بس أنا فى الموضوع ده كنت عندية جدا و بحب اخد حقى يعنى دايما كنت بتمرد لما بابا و ماما كانوا بيميزوا أخويا عنى، ولازم اخد حقى طبعا مش فى كل الأحوال كنت بقدر لان هما الكبار وانا الكائن الصغير اللى ملوش حق الإعتراض و إنهم دايما شايفين إن هما اللى صح علشان هما اللى أكبر. أنا مكنش بابا أسلوبه بيستفزنى أوى زى ماما لأن ماما المفروض إنها تبقى حاسة بمشكلة التمييز دى أكتر لأنها ست وعايشة نفس المشكلة، لكن ما علينا، اللى كان بيحصل إنها كانت بتميز دايما أخويا الولد والصراحة ده كان ترند فى العيلة كلها، أى ولد هو كائن "مميزمرفه مدلل" و بدون ذكر أسباب و كان أكتر وقت بحس بكده وقت المصيف، الولاد متجمعين يلعبوا و ينزلوا المايه والبنات بيساعدوا مامتهم فى عمايل كل حاجة و لوإتبقى وقت يبقوا يمرحوا، انا بقى كنت سوسة جدا اقعد شوية مع البنات و بعدين اختفى واهرى نفسى لعب لحد مايجوا البنات و يلعبوا تانى معايا بس كنت شايفة ده منتهى الظلم. 

هو حرام يعنى أن كلنا نشارك بعض فى كل حاجة يعنى الولاد يرتبوا سرايرهم و يعملوا الفطار مع البنات و لا ده عيب على أى ولد.  و ده خلى أحلامى مختلفة عن كل بنت يعنى كنت بحلم إنى أكون كبيرة و أقدر أشيل مسئولية كل حاجة لوحدى و مش بس كنت بحلم أنا كمان كنت بدعى بكده، الحمد لله أنا بصلى من وأنا عندى 6 سنين فكنت حتى و انا 6 سنين بدعى و اقول يارب انا عايزة اعتمد على نفسى و أكون قوية و كان، و الحمد لله يعنى أنا مش حقول سنى و ده عادى على فكرة بس بقيت مستقلة كفاية لدرجة تخلينى مش محتاجة لأى حد و معتمدة على نفسى تماما يمكن كمان يكون مسئول منى ناس و لكن مش محتاجة لحد الحمد لله.

الخلاصة و إنتوا بتربوا ولادكوا لو سمحتوا بلاش تفرقوا مابين البنت و الولد ، انا عارفة إنهم بطبيعة جسمانية مختلفة و لكن بلاش نزرع الضعف فى قلوبهم و ندمرهم نفسيا ، الحكاية بسيطة جدا ربوا ولادكم على التعاون و المحبة وإننا واحد و ربنا بيفرقنا بعملنا الصالح.

مستنية رأيكم و إقتراحاتكم و تابعونى بكرة