Who Moved My Cheese ملخص كتاب

اليوم السادس و التسعون

Who Moved My Cheese ملخص كتاب

كتاب النهاردة إسمه من حرك قطعة الجبن الخاص بى، و الكتاب بشكل عام بيتكلم عن التغيير و أهميته فى حياتنا، إزاى كمان نتعامل معاه، مؤلف الكتاب إسمه سبنسر جونسون و الكتاب تم كتابته فى عام 1998، و بيحكى قصة مكونة من 4 شخصيات، منهم بنى ادمين زينا كده و هما "هاو & هيم" و فأرين و إسمهم "سكورى & سنيف" و الأربعة دول كانوا عايشين مع بعض فى حاجة كده شبه المتاهة، و كانوا بيتغذوا على الجبنة اللى كانوا بيلاقوها دايما فى نفس المكان كل يوم و المكان ده فى حتة فى المغارة  إسمها "C  " و كل يوم الصبح الفأرين كانوا بيروحوا بسرعة على C علشان ياكلوا الجبنة بتاعتهم و كانوا دايما بيروحوا قبل هاو و هيم و بيسبقوهم، على عكس هاو و هيم اللى كانوا بيروحوا على مهلهم و بيلبسوا براحتهم و بعدين يروحوا براحة راحتهم، كمان كانوا بيحبوا يضيعوا وقت على الفاضى، و الأخ هاو من كتر الفراغ كان كاتب على الحيطة "أنا بحب الجبنة بتاعتى".

لحد ما جاه فى يوم، و كالعادة الفأرين راحوا علشان يأكلوا الجبنة بتاعت كل يوم، و فجاة ملقوش الجبنة، فإبتدى الفأرين سكورى و سنيف يمشوا من C اللى كان فيها الجبنة و يدوروا فى المتاهة على مكان جديد يقدروا يجيبوا منه جبنة، إخواتنا بقى هيم و هام لما راحوا C و ملقوش الجبنة فضلوا قاعدين فى C و هما مكتئبين ومش مصدقين اللى حصل، و راح الأخ هاو كاتب حاجة مهمة على الحيطة "كل ما كانت الجبنة مهمة لازم تحتفظ بيها أكتر" ، و فضل برده هيم و هاو يرحوا كل يوم ل C  يمكن يلاقوا الجبنة بتاعتهم و يستغربوا و يسألوا مين اللى حرك الجبنة بتاعتنا، و لكن هاو جاتله فكرة لما الجوع قرص عليه، و قال لهيم إيه رأيك نطلع برة C يمكن نلاقى الجبنة بتاعتنا، و لكن هيم رفض بشدة و أصر عدم الخروج برة C، كمان برر ده إن المتاهة دى خطيرة جدا و إنهم لما يستنوا ممكن يجيوا يلاقوا الجبنة بتاعتهم تانى، و فى الوقت اللى هيم و هام لسة بيفكروا يعملوا إيه كان الفأرين سنيف و سكورى إكتشفوا مكان الجبنة الجديد اللى إسمه N و كانوا بياكلوا و الدنيا ضبطت معاهم و كله فل، لا و كمان حظهم كان حلو أوى لأن المكان N كان فى جبنة أكتر بكتير من المكان C.

إخواتنا بقى هيم و هاو كانوا لسة متحركوش و كل هاو ما يقول لهيم تعالى نخرج برة C هيم يقولومه لأ، لحد ما هاو قرر إنه يسب هيم و يروح يدور على الجبنة لوحده، طبعاً هاو كان خايف جدا فى الأول و حاسس إن كلام هيم مممكن يبقى صح و المتاهة تطلع خطر عليه، و لكن جمد قلبه و فضل يدور و راح كاتب على الحيطة "ممكن أحقق إيه لو مخفتش"  و بعدها كتب & "عندما تتجاوز مخاوفك ستشعر بالحرية"، و ده اللى فعلا حس بيه هاو و هو بيدور على الجبنة، إحساسه بالحرية بعد ما إتخلص من الخوف اللى عنده، قدر يخليه يدور أسرع، و فعلا و هو بيدور لقى فتات جبن فى الأرض، و لأنه بيحب صاحبه هيم خد فتات الجبن و قاله تعالى بقى معايا ده فى جبن برة، راح هيم برده رفض إنه يروح معاه على الرغم إنه جابله الدليل على إن فى جبن خارج C و أصر إنه يفضل و ميدورش مع هاو.

هاو حس بالإحباط ناحية صديقة هيم، فقرر يسيبه و يدور تانى فى المتاهة على جبن، و فضل يدور و يدور، لحد فعلا ما لقى N اللى فيها سنيف و سكورى، و هنا كتب هاو شوية نصايح لصاحبه هيم علشان يقدر يتغير و يجى N المكان الجديد اللى فيه الجبن، و ده اللى إنت كمان تستفيده من القصة دى:

-          التغيير مستمر "كل شوية الجبنة حتتحرك": و ده معناه إن مثلا لو إنت بتشتغل فى حاجة، فإعرف إن الحاجة دى مش ثابتة، فحاول تغير و تطور من نفسك بإستمرار علشان تكون مؤهل إنك تعمل حاجة تانية فى أى وقت.

-          توقع التغيير "أفضل دور على أماكن جديدة للجبن": يعنى بعد ما إتأهلت و و طورت من نفسك، غير بقى اللى إنت فيه للأحسن، دور على فرصة أحسن و بلاش تفضل فى مكانك محلك سر.

-          تكيف مع التغيير "علشان تستمتع بسرعة بالجبنة الجديدة": يعنى بعد ما سبت الوظيفة القديمة مثلا و روحت حتة تانية، إثبت نفسك و حاول تتكيف مع بيئة العمل الجديدة علشان تترقى بسرعة.

-          إستمتع بالمغامرة اللى فى التغيير: يعنى لما تسيب حتة و تروح حتة تانية متفضلش تقارن و عيش اللحظة و إشتغل على نفسك أكتر علشان تطلع لقدام.

-          إفضل دور فى أماكن جديدة على الجبنة حتى لو لقيتها:  يعنى لما تطور من نفسك و تشتغل فى وظيفة أعلى، خليك طموح و طور من نفسك تانى علشان تلاقى وظيفة أعلى تانى و تانى و تانى.

 و يا رب أكون قدرت أفيدكم

تحياتى

هند مراد