عيش بدماغك

اليوم التاسع

عيش بدماغك

إمبارح و أنا راكبة أوبر لاقيت الكابتن مشغل أغنية للأخ تامر حسنى، وعلى فكرة أنا مبسمعش تامر حسنى أوى يعنى، بس الأغنية اللى الكابتن ده كان مشغلها كانت حلوة و يمكن ديه اللى خلتنى أكتب عن موضوع إنهاردة. الأغنية إسمها عيش بشوقك ودماغك إملاها على ذوقك، أنا عجبنى الكوبليه ده أوى، لدرجة خلتنى أقول للكابتن والنبى عيد الحتة ديه تانى " أكيد الراجل قال عليا مجنونة، بس عادى أنا بحب أعمل اللى على مزاجى دايماً طالما مفيهوش أذى لحد ولا أذى لنفسى".

بصوا بقى الموضوع ده كبير شوية و مجتمعنا الجميل بيشوفه بشكل مختلف جدا عن أى حتة تانية فى العالم، يعنى عيش بشوقك بس لو إنت راجل تتجوز تتطلق تحب تموت تسافر تدرس .. طول ما إنت راجل عيش يا معلم.. لأ عيش بجد، يعنى كارت بلانش و تصفيق حاد طول ما إنت مفكش "ته مروبطة" يعنى مؤنث.

أنا بقى ليا تصور تانى خالص، طبعاً  فى حاجات أخلاقية وربنا بيحاسب عليها الراجل زى الست وإحنا كبار كفاية علشان نكون عارفينها و ربنا كمان لما بيحسابنا مش بيبص لنوعنا، يعنى إنت حتتحاسب سواء كنت راجل أو ست يعنى مفيش كارت بلانش حيمنع عنك حساب ربنا. فمتديش لنفسك الحق إنك تغلط وتعمل حاجات بحجة إنك راجل ومن حقك تعمل اللى إنت عايزه، لأ حضرتك إنسان و لو غلطت ليك حساب و حسابك عند اللى خلقك و سبحانه، هوعادل كفاية و حيديك العقاب على قد غلطك.

و هنلاقى إن فى ستات كتير علشان التفكير الذكورى الشرقى اللى مش مفهوم حبيتين تلاتة، إنهم ممكن يحسوا بالقهر و يجى فى دماغهم إنهم  يقلدوا الرجالة و ده اللى حاصل فعلا، يعنى حتلاقى فى ستات كتير بيقولوا إشمعنا هما طيب ما أنا كمان إنسان و من حقى أغلط و من هنا بتيجى الفتن، هو المفروض كل واحد فينا سواء راجل أو ست يعرف إيه هى الإلتزامات اللى عليه و إيه هى حقوقه و يعيش على أساسها.

طيب ، أنا مش حدخل فى موضوع الراجل و الست و التفكير الشرقى علشان ده عايز مقالات كتير و فيه حاجات كتير أوى جواه.

بس إزاى تعيش بدماغك بقى، تعيش بدماغك يعنى تعمل اللى بتحبه .. يعنى تعيش فى راحة بال.. اللـــــــــــه، كلمة راحة بال ديه مريحة جدا وحلوة كده و تحس فيها رنين غريب، اللى عايزة أوصلهولكوا إن الحياة ممكن تكون بسيطة وممتعة و بإيدنا ممكن نخليها كده، حتقولى الماديات و الناس الوحشة و البلا بلا بلا بلا بلا بلا.. حقولك بس يا متشاؤم و الله ربنا خلق كل حاجة حولينا حلوة و منتهى الإبداع طيب بص للسما كده، طيب بص للورد، طيب بص للبحر طيب بلاش، بص للعسل اللى ماشى جنبك ده. ضحكت و لا لسة ؟ّ

المهم بقى إنك تختار الطريقة اللى تعيش بيها وتخليك مبسوط و تراعى فيها الناس اللى حواليك يعنى حاول تتبسط من غير متضايق حد، يا سيدى كافئ نفسك من فترة للتانية..أنا بعمل كده على فكرة، ساعات كتير أروح نازلة وجايبالى طقم جامد جدا و برفان و شيكولاتة كتير طبعا بس عمرى ما جبت لنفسى ورد هو بيجلى بس ههههههه.

إعمل كده و جرب و قولى، شوف اكتر حاجة نفسك فيها إيه و إعملها، أكتر حاجة بتحبها إيه وهاتها لنفسك، حب نفسك كده و دلعها و متستناش حد يدلعك، لأنك طول ما إنت مش عارف تسعد نفسك عمر ما حد حيسعدك، سعادتك بإيدك صدقنى.

و يارب يسعد أيامكم كلها و تعيشوا كل لحظة فيها بذوقكم و من غير متضايقكوا حد.

تحياتى

هند مراد