متخليش حد يقلل منك

اليوم الحادى عشر

متخليش حد يقلل منك

صباح الخير عليكم جميعاً و أتمنى لكل اللى متابعنى إنهم يكونوا بخير، الموضوع النهارة ساخن جدا و يمكن معظمنا قابل ناس فى حياته بيحاولوا يقللوا منه، الصراحة أنا الأشكال ديه إتعاملت معاها كتير، و النوعية ديه من الناس بتكون فاكرة نفسها بيكاسو مثلا و لا أينشتين زمانها، وأول ما تتعامل معاها تلاقيها عمالة تقول فى كلام عميق و فاكرة اللى قدامها جاهل و مش حيفهمها، يعنى لو هو مثلاً مهندس حتلاقيه عمال يرمى فى كلامه كام مصطلح هندسى من اللى حافظهم و يحسس اللى قدامه إنه كائن فضائى ، و إن المفروض المصلحات الهندسية ديه الناس كلها عارفاها و إنك مش فاهم حاجة.

فسواء كنت عارف المصطلحات اللى عمال يتفشخر بيها أو لأ، أوعى تحسسه إنك مش عارف، و لو زنقك و سألك طيب يعنى إيه اللى أنا قلته، توهه وغلوش عليه و لو إنت معلم بجد، إديله واحد مصطلح من اللى إنت عارفهم كويس و إزنقه يشرحه، و فرهده قبل ما يطنطط عليك و لو قل أدبه و قال مثلاً إن اللى بيحصل ده غباء أو حتى قالك الكلمة دي صريحة إنت غبى، فردك لازم يكون زي كده، تقول اه أنا غبي لأنى اتكلمت مع شخص مثقف زيك، و هنا بقى ممكن تجيبله ورم فى دماغه أساساً.

بصراحة النوعية ديه من الناس نوعية  بتكون مقرفة فى التعامل معاها و تحس إنها منفوخة على الفاضى و إنهم كائن هلامى هش، زى قنديل البحر كده، حاجة بتلظ على الفاضى و مبيعملش حاجة مفيدة غير إنه بيقرص اللى قدامه مع كامل إحترامى لقنديل البحر، فحتلاقيه نفس القنديل بس ده بيرمى قنابل من لسانه كفيلة إنها تقتل مشاعر وأحساسيس أى حد.

التعامل بقى من النوع ده من الناس لازم يكون بذكاء لإنهم بيكونوا من نوعية الناس اللى بتحب الهجوم و مش بتدى فرصة للى قدامهم إنهم يردوا و لا يدافعوا عن نفسهم و دايما و مهما عملت ليهم عمرهم ما حيحسسوك بقيمتك ولا بقيمة الحاجة اللى إنت عملتها ليهم.

طبعا طبعا طبعا، شوف أنا قلت كام طبعا، لازم حضرتك تكون واثق فى نفسك جدا و ميهزكش كلمة أى واحد من الأشكال ديه يقولهالك، ولو إنت بتشتغل مع حد من النوعية ديه، يبقى سيب شغلك اللى يتكلم عنك و إثبت دايما بشغلك إنك الأحسن و دى حاجة حتخليه يرجع لورا و يحترمك رغما عن أنف اللى خلفوه، و خلى بالك إنك بترسم بنفسك إزاى اللى قدامك بيعاملك، يعنى لو قبلت بالإهانة مرة، يبقى إشرب نتيجة إختيارك وعيش فى دايرة التنازلات اللى حطيت نفسك فيها، و لازم تعرف إن الشخصيات اللى بتنزل من مستوى اللى بيتعامل معاه، ديه بتكون شخصية جبانة من جوه ومحتاجة اللى يلجمها طول الوقت، لأنها لو شخصية سوية وواثقة من نفسها حتثق فى نفسها و حتثق فى الاخرين بنفس درجة ثقتها بنفسها ، فخليك واثق من نفسك و دوس بقلب جامد.

و إعرف إن الشخصيات ديه حتستفز جدا لو واجهتا بالنقد اللى قالتهولك بضحكة منك، دول ممكن يموتوا فيها على فكرة، فخليك ناضج كفاية و متفهش من نفسك بإنك ترد على حد أساسا دماغه بايظة و حقودى.

 و اخر حاجة، خلى بالك لإنه بيحاول يرسم فى مخيلة الناس اللى حواليه إن ده طبعه علشان ياخدوا إنهم يتقلل من شأنهم علطول، و ديه طبعا صورة كدابة جدا بيحاول بيها إنه يخلى اللى قدامه يستسلم ليه و يعتبره امر واقع و يرضى دايما إن يتقلل من شانه.

الخلاصة فى الموضوع ده، هى إنك تكون واثق من نفسك و هادى فى التعامل مع الشكل المرضى ده.

و يومكم جميل

تحياتى

هند مراد