الأوقات الحلوة

اليوم العشرون

الأوقات الحلوة

صباح الخير عليكم جميعا، إتكلمت قبل كده على الأوقات الصعبة وازاى تقدر تعدى فترة ممكن تكون وحشة فى حياتك، النهاردة بقى وإحنا فى تالت يوم من عيد الأضحى، كنت حابة أتكلم فى حاجة حلوة، حاجة تخلينا ننسى شوية الفترات الصعبة اللى بتعدى علينا و تهون علينا شوية الأيام الصعبة اللى ممكن نكون عدينا بيها و مرت علينا فى حياتنا.

من الأوقات الحلوة اللى ممكن تعدى عليك، هى احتفالك بنجاح عملته، حتى لو نجاح صغير، كافىء نفسك لما تعمل حاجة صغيرة، يعنى لو اخدت كورس رسم مثلا و بعدها عرفت ترسم حاجة صغيرة، روح أتصور مع الصورة اللى رسمتها و اعمل البوم و حط فيه كل رسمة ترسمها بعد كده، صدقنى الصور اللى انت بتحطها النهاردة حتكون مصدر سعادة ليك بعد كده.

من الحاجات الحلوة كمان اللى ممكن تحصل فى حياتك، هو أنك تلاقى حد يفهمك، تلاقى حد عنده نفس اهتماماتك، حد بيشاركك أفكارك، بيشاركك فيلم حلو ممكن تشوفوه مع بعض، أو اكلة حلوة ممكن تاكلوها سوا، متستقلوش باللى بقوله لأن حتعدى عليك فترات فى حياتك و حتعرف قيمة انك تشارك حد لحظة حلوة و حتفتكر الكلام ده كويس، على فكرة انا مبتكلمش على أن الحد اللى تشاركه لحظة حلوة ده، يكون حد فى قصة حب بينكم، علشان ساعات لحظة حلوة مع حد صاحبك اوى احسن الف مرة من قصة حب متطلعش منها فى الاخر إلا بوجع قلب ينسيك و يقتل أى لحظة حلوة ممكن تكون عشتها مع حد كنت فاكر نفسك بتحبه.

من الحاجات الحلوة اوى بقى اللى ممكن تحصلك و تخلي قلبك مزقطط، إنك تقابل حد طيب، وشه طيب، عينه طيبة، قلبه طيب، حد بيحبك و يدعيلك مش شرط على فكرة تكون تعرفه اوى، بس انت حتحسه اوى، حتحس بدعوته و هو بيدعيهالك من بعيد، لو قابلت حد كده أوعى تخسره تحت اى ظرف و قرب منه على قد متقدر، ده ممكن يكون سبب فى حاجات حلوة كتير حتحصلك بعد كده.

تخيل ممكن فى ناس كتير حتتمنى إنها تكون لوحدها علشان تحس بلحظة حلوة، اه حيعدى عليك وقت فى حياتك و حتلاقى نفسك بتقول لكل اللى حواليك سبونى لوحدى، نفسى فى لحظة حلوة مع نفسى، نفسى أعقد معايا، يمكن ضغط ، يمكن ناس وحشة حتقابلها، يمكن قلة تقدير، يمكن نفسك تاهت منك وسط الزحمة، بس حيعدى عليك الوقت ده و تحس بتنهيدة و انت مع نفسك و تقول ياااااااااااااااه أخيرا لقتنى، انا موجود بس مكنتش شايفنى و كنت قربت انسانى.

و من أحلى وقت ممكن يعدى عليك هو السفر، ياااااااااااااااه يا عبد الصمد بجد احلى وقت و انت بتطنطط فى كل حتة و تكتشف امكان مكنتش عارفاها قبل كده و ناس و دنيا و عالم تانى غير اللى متعود تشوفهم و أماكن جديدة و أكل جديد و أغانى جديدة و ناس و زحمة و دوشة، تحس كده إن فعلا ربنا خلقلنا أماكن كتير فى بلاد مختلفة علشان نكتشفها و نتعلم من بعض و نفهم بعض.

أحلى وقت بقى ممكن يمر عليك بجد هو الوقت اللى بتضحك فيه من قلبك، سامع فيه ضحكة قلبك بجد، مش ضحكة صافرة بتجامل بيها حد و لا ضحكة بتراضى بيها حد معاك، لا ديه ضحكة بتراضى فيها نفسك، نفسك هى اللى بتضحكها بجد و مش مهم السبب اللى ضحكت فيه، بس حتلاقى الضحكة ديه إتحفرت جواك و حتفضل شايلها معاك لحد ما تضحك غيرها و تشيلهم فى مكان فى دماغك و يبقوا بيهونوا عليك ضحكات صفرا كتير مضطر تضحكها من ورا قلبك.

الخلاصة ، ان هى دنيا و حنعيشها مرة واحدة، ملهاش إعادة و انا عارفة إن ضغط الحياة بقى كتير والعيشة على اللى عايشنها بقت حاجة صعبة ، بس لما تمر عليك لحظة حلوة، أمسك فيها جامد و متخلهاش تهرب منك، و احفرها فى دماغك، علشان انت كده من غير ما تحس بتعمل ذكريات، ذكريات حتهون عليك وقت صعب انت مش عارف جاى امتى.

تحياتى

هند مراد