الأوقات الصعبة

اليوم الثالث

الأوقات الصعبة

أقولكم حاجة بجد ممكن متصدقوهاش خالص، بس أنا عمرى فى حياتى كلها معشتش أسوأ من الشهر اللى فات ده، مش حخش فى تفاصيل كتير عنى بس أنا كان ممكن أفقد حياة أغلى الناس عندى و لسة فى إحتمال كبير إن ده يحصل.

كان ممكن أحط إيدى على خدى أو حتى أجن من اللى بيحصل، بس أنا و بفضل الله مستسلمتتش عشت حياتى عادى جداً و سبتها على الله تماماً، اَه طبعا جوايا بركان أفكار طيب لو حصل اللى فى بالى.. طيب ..لو راح منى طيب لو طول فى اللى هو فيه .. طيب طيب طيب...فقعدت أفكر كتير لحد ما لقيت إن أحسن حاجة إنك تعمل اللى عليك بجد ومتقصرش فيه خالص وتسيب الباقى على المولى سبحانه و تعالى، مش معنى كده إن يكون عندك لا مبالاة أو جلادة فى مشاعرك، لكن معناه إن يكون عندك إيمان.. إيمان بإنك قوى و حتقدر.. إيمان بربك و بنفسك إنك أقوى من كل الظروف، تحارب و تعافر اه بس تحبط لأ.

يمكن بتكون فى الوقت ده محتاج لناس تبقى حواليك و بيبقى عندك إحباط كبير لما كتير من الناس اللى حواليك بيخذلك، ناس كتير بتقف جنبهم و بيبعدوا عنك مع أول حاجة تحصلك، أو بيشوفوا إن اللى بيحصلك ده عادى و من كتر ما شايفينك قوى حتقوم لوحدك، ناس عمرك ما إتأخرت عليهم بأى حاجة و دايما جنبهم بس بتلاقيهم فى وقت شدتك هما كمان دايسين بنزين على الاخر وعايزين مصلحتهم و نفسهم و بس.

مش حتكلم على الناس الوحشة دى كتير، لأنهم بيشوفوا نفسهم عادي لا وكمان يمكن وهما دايسين بنزين بيشوفوا نفسهم بيساعدوك، المهم تاخد الناس دى على جنب فى أقرب مقلب زبالة و متفكرش فيهم خالص لأن سبحان الله ربنا بيظهرلك ناس فى الوقت الصعب ده متعرفش بيجوا منين، ناس ممكن متكنش عارفهم أصلا بس بيدعولك، و بيقفوا جنبك و بيحاولوا يدولك سلام نفسى كده من نوع غريب.

اللى عايزة أقولهلكم إن ربنا سبحانه و تعالى بيختبرنا و بيختبر إيمانا بيه فى مواقف كتير، ممكن بنحسها صعبة بس صعوبتها فى صبرنا و تقبلنا لقضاء الله، والرضا بيه و كل ما تصبر كل ما حتتفاجئ بكرم ربنا ليك. و أشكر كل اللى وقفوا جنبك و اللى موقفوش، خليك قوى من جواك وإعرف قيمة نفسك كويس أوى و متستقلش بيها لان إنت أحسن حد حيقدر يساعدك فخليك قوى و أجمد.