الإدارة فن

اليوم الرابع

الإدارة فـن

كتير مننا بيشتغلوا و فى اللى بيحب شغله جداً و اللى مش طايقه و بيروح الشغل كإنه بيأدى واجب أو بيعتبره فرض عليه، علشان كده كنت حابة أعرفكم أنواع المديرين و حابة كمان أشاركم و تشاركونى بإزاى نتعامل مع نوعية كل مديرمن اللى حقولكم عليها.

بصوا يا جماعة، أنا تقريباً بقالى أكتر من 13 سنة بشتغل، معلش هو الرقم لوحده نحس كفاية إنه يقفل أى بحد بس إحنا إتفقنا إننا نبقى متفائلين بالخير دايما، ف 13 ده رقم عادى زي أى رقم، المهم إنى قابلت فى سنين شغلى ديه شوية مديرين كده حاجة ميكس جامد جداً لأن كلهم ماشاء الله مفيهمش حاجة من بعض غير وظيفتهم اللى هى مدير.

طيب العلم بيقولك إيه هى وظيفة المدير، العلم بيقول إن المدير المفروض يعمل 4 حاجات و معلش حكتبهم بالإنجليش 

بيعمل planning, organizing, leading and controlling و كلها حاجات حلوة جدا بس المدير المحترف اللى يلعبها صح و لو لعبها صح هنا مبيبقاش إسمه مدير، ده بيبقى إسمه قائد.

 

طب خلينا فى المدير علشان إنت تقريباً مش حتشوف كتير من أخونا القائد ده، بص يا سيدى و بصى يا ستى

من أنواع المديرين اللى بسم الله ما شاء الله بننفرد بوجودهم عندنا بس هو "المدير الرغاى" اللى هو خالتى الكاكة، ده مدير بيحب يتكلم كتير أوى ويضيع الوقت فى إجتماعات على الفاضى وغالبا إنت مبتبقاش عارف إيه سبب الإجتماع أصلاً، و ده فى الغالب مدير عنده فراغ عاطفى وأحسن طريقة للتعامل معاه هو إنك تتجنبه وتتفادى بقدر الإمكان إنك تدخل معاه فى أى حوار جانبى بعيدا عن الشغل، يعنى كل ما يدخلك فى أى حوار غير الشغل .. تروح مفرمله و ترجعه تانى للشغل لحد ميفرهد منك.

نيجى بقى للنوع التانى من المديرين اللى هو "المدير العصبى"، وده لو دبانة عدت جنب وشه حيقعد يزقع، والمدير ده فى الغالب بيبقى ضعيف الشخصية و بيحاول يدارى مركبات النقص اللى عنده بالصوت العالى وإعطاء الأوامر كل شوية، و حتى حتلاقى الإيميلات بتاعته فى صيغة أمر و طلبات كتير وأغلبها مش مهم و تلاقيه برده بيدخل الشغل فى الأمور الشخصية و كل المهام سايحة فى بعض، بس علشان يخلى اللى قدامه يحس قد إيه هو شخصية مهمة وعشان بس يحس بأهميته ، فل أوي كلمة” يحس بأهميته” دى .. أمسك بقى فيها.. النوع ده بيحب فعلا اللى يمدحه يعنى لو إنت لازم ومجبر تشتغل معاه، علشان حياتك تبقى حلوة فى الشغل يبقى تسمع كلامه و تعمله و متديش رأيك فى أى حاجة عك هو بيعملها، سيبه على هواه و ربنا يصبرك عليه لحد متلاقى شغل تانى لأن ده فعلاً من تانى أسوأ أنواع المديرين اللى ممكن حتتعامل معاهم، بس كمان فى ميزة حلوة جداً فى التعامل معاه وهى إنك بتتعلم إزاى تتحكم فى أعصابك و بتزود مهارات الإتصال، كمان من كتر المهام اللى بيدهالك حتلاقى نفسك إتعلمت حاجات كتير فى وقت قصير جداً، فيا ريت تبص للموضوع من الجانب ده.

نيجى بقى للمدير اللى أنا بأموت و أشتغل معاه و هو "المدير الأنا"، ده بقى مدير عسل جدا جدا، ليه بقى؟

حقولك ليه، لأنه ببساطة حاجة دمها خفيف و كوميدى بجد حاجة زى على بيه مظهر كده، بيكون حاسس بنفسه جدا جدا لدرجة العظمة وموعوج كده و مش عاجبه حد، بس سبحان الله النوع ده بيكون قلبه أبيض و بيطلع منه أحلى كوميديا بجد، يعنى مثلا حتلاقيه كاتب إسمه على حيطان الشركة و لو حد زاره حيقوله، ده الناس يا سيدى الموظفين اللى عندى هما اللى كاتبين إسمى من كتر حبهم فيا، لا و حتلاقى صوره مغرقة الشركة وعامل لنفسه كده بالونة .. هو شايف كل الناس فيها عمالة تصفرله و تهتفله.. بس هو يا حرام اللى لوحده فيها، بجد الشخصية دي من المديرين مسخرة بمعنى الكلمة، و اللى يفهمها صح حيقعد بس يضحك عليها.. فإنت لما تتعامل معاه متخدش أى حاجة بمحمل شخصى و إديله برستيجه برده ميضرش.

نيجى بقى لأصعب نوع من المديرين ربنا يعفى عنا جميعا و يبعدنا عن نوعيته و هو "المدير المتسلط" وده بقى حاجة إستغفر الله العظيم 

يعنى علطول متشبث برأيه و شايف دايما إنه أكتر واحد بيفهم فى الكون و إن رأيه بس اللى صح و الناس كلها تحصيل حاصل فى وجوده اللا متناهى، و يمكن كمان يكون عنده هوس السيطرة و النوع ده من المديرين ليه حل و حله إنك تبقى كول طول الوقت يعنى إيه؟ يعنى مهما إتعصب و ضايقك تبقى بارد و متبينلوش أى إنفعال و نصحيتى للتعامل مع النوعية دى إنك تخليك دقيق جدا و خلى أى حاجة بينكم مثبتة بورق و متأمنلوش أبدا أبدا، ولو إداك أى حاجة تعملها لازم تعرف كويس هو عايز إيه و تسأله لأن الخطأ معاه مش وارد و مش مسموح بيه.

 

خلاصة الكلام، يعنى هى أرزاقنا كلنا فى إيد ربنا بس إنت فى شغلك حتتعامل مع ناس كتير وحتتعلم كتير، و لو كنت مدير أو مرؤوس راعى ربنا فى شغلك و إشتغل بجد و إحترم الناس حتلاقى الناس بتحترمك و إستحمل و كافح و حتلاقى ربنا بيرزقك من حيث لا تعلم.

صباحكم أجمل صباح فى الدنيا