الروتين

اليوم التاسع و العشرون
الروتين 

الحاجات بتبقى جميلة اوى اول مرة تشوفها، الناس كمان بيتبقى حلوة اوى لما بنتعامل معاهم اول مرة، بس خلاص بقى لما بتتعود على حاجة مهما كانت حلوة و حد مهما كنت بترتحله، بتتحول الجاذبية اللى كانت فى الأول إلى تعود و بعد التعود بيجى بقى الروتين، اللى بيتحول بعد كده لملل و حاجة ملهاش طعم،  متعرفش هى حاجة حلوة و لا حاجة وحشة، حاجة كده متعرفش توصفها من كتر ما هى حاجة عادية و مملة بتخليك تحس انك فى دايرة مقفولة و عمال تلف على الفاضى  و مش باين للف ده نهاية.

طيب بعد ما عرفنا شوية عن الروتين، ازاى بقى نقدر نتغلب عليه و نعدى مرحلة الروتين فى حياتنا و نمنعه انه يتحكم فى رتم حياتنا اليومية.

علشان تكسر الروتين لازم تعمل عكسه، يعنى لازم تعمل حاجة جديدة و تفك الدايرة اللى عمال تلف فيها لوحدك، يعنى متخليش حاجة تتمكن منك و تبقى ال comfort  Zone بتاعتك، ببساطة كده متتعودش على حاجة و تبقى بعد فترة مملة، خليك دايما مقاوم لاى حاجة حتخليك تلف فى دايرة، اطلع برة الدايرة و اهرب لو حتقفلك فيها، يعنى لو الحاجات اللى بتعملها فى شغلك لقيتها حتكرر بشكل روتينى مفيهوش ابداع، اخلق انت الابداع، زوق المهام اللى بتعملها و خلى شكلها احلى علشان تحس بالتجديد و ان شغلك مش ممل.

لو حسيت بفطور و ملل فى علاقتك مع الحد اللى انت مرتبط بيه، جدد من شكل العلاقة، جدد من نفسك، جدد من دمك، اخرج برة نطاق المفروض، خلى كل يوم جديد مع الشخص اللى معاك، روحوا حتت مختلفة، غيروا من شكلوا باستمرار، غيروا من الناس اللى بتشفوهم، غيروا من لبسكم .. صدقونى حتفرق معاكم كتير.

انت ممكن تغير الروتين فى حاجات بسيطة بس صدقنى حتفرق معاك كتير، يعنى لو متعود تسوق عربية و معندكش وقت تمشى، أتحدى الروتين و اركن بعيد شوية و امشى شوية، لو متعود تركب الاسانسير، جرب تطلع على السلالم و غير اللى انت اتعودت عليه، لو متعود تاكل كتير قبل ما تنام، جرب تاكل فاكهة و زبادى و إكسر اللى انت اتعودت عليه، صدقنى حتفرق، فكرة بس إنك بتخرج عن المالوف حتخليك احسن.

و انت بتكسر الروتين اعرف انك بتتحدى نفسك، بتتحدى فكر و بتكسر فى حواجز و بتبنى دنيا جديدة و احلام و أمل و أيام أحلى. 

هو كسر الروتين صعوبته فى اول مرحلة، و هى الخروج منه و الخروج من الComfort  Zone بس صدقنى اول ما حتقدر تعمل كده، مبروك انت بقيت حر و مش مقيد بحاجة تخنقك.

الخلاصة و ببساطة كده، الروتين ده حاجة احنا اللى بنعملها مش فرض علينا، و الخروج منه قرار برده و سهل تعمله لو انت مؤمن انك تقدر.

تحياتى

هند مراد