اليوم الستون
أنا كل حاجة و عكسها
ساعات الواحد و هو بيدور جوة نفسه و فى وسط الزحمة، بيحس أن جواه شخصيات مختلفة، شخصيات غريبة، ساعات بتظهر و ساعات مبتظهرش و بتفضل مستخبية جواه، و من كتر اللخبطة اللى بقت فينا بنسال نفسنا سؤال قديم شوية ، سألته سعاد حسنى قبل كده لحسين فهمى فى ورقة ملفوفة و وقعت فى ايده، و ضحك ضحكة مكتومة كده، السؤال كان من انت؟!
جربت تقعد مع نفسك كده فى ساعة صفا و تسالها السؤال ده، انتى مين يا نفسى، انتى الشخص الطيب اللى بتظهر لكل الناس و لا الشخص اللى عنده أخطائه و شايلها فى بير و مش عايز حد يعرفها، انت الشخص اللى قريب اوى من ربنا، و لا اللى ساعات بيبعد عنه و يقصر فى حقه من غير سبب، انت الشخص اللى بيضحك بصوت واطى و هو جواه ضحكة تسمع العالم حواليه، انت الشخص اللي بيصرف كل اللى حيلته، و لا الشخص اللى بيصرف وهو جواه عمال يحسبها يمين و شمال علشان تعدى معاه، هو انت الشخص الوقور و لا الطفل اللى بيفرح اوى بأى لعبة ممكن يلعب بيها، هو انت الشخصية القوية اللى ماسكة نفسها، و لا انت الإنسان الضعيف اللى نفسه حد يطبطب عليه، هو انت الشخص الاجتماعى اللى عمال تعدى عليك ناس و لا بتلاقى نفسك اوى فى الوحدة و انت مع نفسك و بعيد عن الدوشة، هو انت اللى بتحب عيلتك و لمتها و لا بتحس ان حتى أقرب الناس ليك بقوا ملهمش طعم زى كل حاجة حوالينا، هو انت اللى بتخاف من الكلاب و لا من كتر ما تسمع عن وفاءهم نفسك فى كلاب الدنيا كلها تبقى عندك و حواليك، هو انت الإنسان الصحى الرياضى و لا اللى بتحب الأكل و بتحس انه نعمه و مينفعش نحرم نفسنا منها، هو انت اللى مبيحبش الدكاترة ولا اللى لو طلعتلك حباية تجرى على كل الدكاترة، هو انت الشخص المثقف و لا الشخص التافه اللى بيفكر هو لو النملة عندها ضوافر تحط مانيكير لونه ايه و امتى ميكى ماوس حيتجوز مينى ماوس و لا هما متجوزين اصلا، هو انت الإنسان العاقل المتزن و لا الإنسان المجنون اللى نفسه يجرب كل حاجة فى الدنيا و يطير و يمشى يصرخ يطلع كل الجنان اللى عنده، هو انت اللى بتعمل كل حاجة فى نفسك و لما يجى حد يعملها تفضل تحكم عليه و تقوله ده كده عيب.
انت مهما كنت حلو من برة و باين هادى، حتلاقى فى صراع داخلى جواك، صراع بيحاول يعرف انت مين، عايز ايه، رايح فين، و الصراع ده بيفضل معاك فترة لحد ما توصل لدرجة سلام نفسى مع نفسك كده و تبقى متسامح معاها و بتقدرها، و تحبها بكل مزاياها و عيوبها، لو عرفت تشوف نفسك صح و مهما كان عندك من عيوب، و مهما كان جواك من صراعات و حاجات عكس بعضها، ساعتها بس حتعرف تجاوب على سؤال سعاد حسنى و تاخد امتياز كمان.
تحياتى
هند مراد
أنا كل حاجة و عكسها
ساعات الواحد و هو بيدور جوة نفسه و فى وسط الزحمة، بيحس أن جواه شخصيات مختلفة، شخصيات غريبة، ساعات بتظهر و ساعات مبتظهرش و بتفضل مستخبية جواه، و من كتر اللخبطة اللى بقت فينا بنسال نفسنا سؤال قديم شوية ، سألته سعاد حسنى قبل كده لحسين فهمى فى ورقة ملفوفة و وقعت فى ايده، و ضحك ضحكة مكتومة كده، السؤال كان من انت؟!
جربت تقعد مع نفسك كده فى ساعة صفا و تسالها السؤال ده، انتى مين يا نفسى، انتى الشخص الطيب اللى بتظهر لكل الناس و لا الشخص اللى عنده أخطائه و شايلها فى بير و مش عايز حد يعرفها، انت الشخص اللى قريب اوى من ربنا، و لا اللى ساعات بيبعد عنه و يقصر فى حقه من غير سبب، انت الشخص اللى بيضحك بصوت واطى و هو جواه ضحكة تسمع العالم حواليه، انت الشخص اللي بيصرف كل اللى حيلته، و لا الشخص اللى بيصرف وهو جواه عمال يحسبها يمين و شمال علشان تعدى معاه، هو انت الشخص الوقور و لا الطفل اللى بيفرح اوى بأى لعبة ممكن يلعب بيها، هو انت الشخصية القوية اللى ماسكة نفسها، و لا انت الإنسان الضعيف اللى نفسه حد يطبطب عليه، هو انت الشخص الاجتماعى اللى عمال تعدى عليك ناس و لا بتلاقى نفسك اوى فى الوحدة و انت مع نفسك و بعيد عن الدوشة، هو انت اللى بتحب عيلتك و لمتها و لا بتحس ان حتى أقرب الناس ليك بقوا ملهمش طعم زى كل حاجة حوالينا، هو انت اللى بتخاف من الكلاب و لا من كتر ما تسمع عن وفاءهم نفسك فى كلاب الدنيا كلها تبقى عندك و حواليك، هو انت الإنسان الصحى الرياضى و لا اللى بتحب الأكل و بتحس انه نعمه و مينفعش نحرم نفسنا منها، هو انت اللى مبيحبش الدكاترة ولا اللى لو طلعتلك حباية تجرى على كل الدكاترة، هو انت الشخص المثقف و لا الشخص التافه اللى بيفكر هو لو النملة عندها ضوافر تحط مانيكير لونه ايه و امتى ميكى ماوس حيتجوز مينى ماوس و لا هما متجوزين اصلا، هو انت الإنسان العاقل المتزن و لا الإنسان المجنون اللى نفسه يجرب كل حاجة فى الدنيا و يطير و يمشى يصرخ يطلع كل الجنان اللى عنده، هو انت اللى بتعمل كل حاجة فى نفسك و لما يجى حد يعملها تفضل تحكم عليه و تقوله ده كده عيب.
انت مهما كنت حلو من برة و باين هادى، حتلاقى فى صراع داخلى جواك، صراع بيحاول يعرف انت مين، عايز ايه، رايح فين، و الصراع ده بيفضل معاك فترة لحد ما توصل لدرجة سلام نفسى مع نفسك كده و تبقى متسامح معاها و بتقدرها، و تحبها بكل مزاياها و عيوبها، لو عرفت تشوف نفسك صح و مهما كان عندك من عيوب، و مهما كان جواك من صراعات و حاجات عكس بعضها، ساعتها بس حتعرف تجاوب على سؤال سعاد حسنى و تاخد امتياز كمان.
تحياتى
هند مراد
.jpeg)
No comments:
Post a Comment