الذل

اليوم المائة

الذل

موضوع النهاردة عن حالة بيعيشها كتير من الناس، كل ذنبهم إنهم ممكن يكونوا محتاجين لمصدر رزق، أو ناس مش عايزة تخرب بيتها و عايزة تعيش وولادها حواليها، أو ناس الحياة بتفرض عليهم ناس تانية مجردين من الإنسانية و بيجرى الظلم فى عروقهم و بيستعبدوا اللى حواليهم و فاكرين إن الرزق فى إيديهم مش فى إيد الرزاق رب العالمين.

تعالوا كده نستعرض كام موقف لناس بتذل ناس، لما واحد صاحب شركة مستعبد الناس اللى عنده و مدخل كل حاجة فى بعض، و مدخل موظف عنده المفروض جى على وظيفة معينة بوصف وظيفى معين فى حاجات مش المفروض يعملها، يمكن مشوار شخصى، خدمة لواحد يعرفه، قضاء مصالحه و حاجاته الشخصية، و كله داخل فى كله و تلاقى صاحب الشركة قاعد فى الفراغ العاطفى و كل اللى تحته مسحولين فى خدمته و إرضاء أهوائه الشخصية و طز فى حياتهم الشخصية و طز فى ظروفهم و إن شاء الله يموتوا و لا فارقين معاه أصلا، أهم حاجة هو و مصلحته و شركته فوق الكل ، تفتكروا نهاية شخصية زى ده إيه، نهايتها تقدر تقراه فى الاية دى:

وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ ۚ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ

و حتشوفها بعينك، حيفضل يحط الناس فوق بعض و يعلى عليهم و بعدين حتلاقيه وقع واقعة كده لحد مايبقوا كلهم عليه و إنتقام ربنا و بطشه حيكون أكبر بكتير من اللى كان بيعمله.

ولا واحد تانى ذالل مراته علشان بيصرف عليها و على ولاده، و بيذلها بكده و كل يوم يقرفها و موريها المرار اللى فى الدنيا كلها، من ضرب و إهانة و ذل على الجنيه، و يمكن يكون بيعرف عليها ستات تانية و فاكر إن دى رجولة، و هى من غلبها مستحملاه، و مش عايزة تخرب البيت و تشرد العيلة اللى هو ناكرها أساسا، تفتكروا ده نهايته إيه و جزائه إيه فى الدنيا قبل الاخرة،  شوفتوا كام واحد مات و محدش راح جنازته و لا إترحم عليه، شوفتوا كام واحد إبنه بيضربه و يتطاول عليه و هو كبيرمن كتر المرار اللى كان شايفه منه و هو بصحته، شوفتوا كام واحد مرمى فى مستشفى عام لحد ما مات فى صندوق زبالة و مفيش حتى كلب عبره،  ده إنتقام ربنا يا حضرات فى الدنيا، غير اللى حيشوفوا فى الاخرة، فربنا يعافينا و يعفو عنا.

فأوعى غرورك و إحساسك بنفسك يهيألك إنك مصدر رزق للناس، و إفتكر إن ربنا بيرزقك علشان غيرك، و إنه ممكن فى ثانية يغير حالك لحال تانى و تتغير عليك الدنيا، و لا يبتليك فى الناس اللى حواليك و يحطك فى موقف إن الفلوس و الرزق اللى ربنا كان بينعم بيه عليك بقى نقمة و تبقى بتتمنى تزول بس ربنا يرفع عنك غضبه، خاف ربك و إتقى معاملة الناس فيه و إتفرج على كرمه، لكن لما تاخدك الجلالة و تحس إنك صاحب الرزق و إنك بتتحكم فى الناس من المنطلق ده، يبقى إتأكد إن نهايتك جاية جاية و كل واحد ذليته حتلاقى قصاده إنتقام من المولى عز و جل و لو بعد حين.

تحياتى

هند مراد