الناس الصعبة تستحق الشكر

اليوم المائة و التاسع عشر

الناس الصعبة تستحق الشكر

موضوع النهاردة كده من إسمه، يمكن يبان غريب شوية أو صعب إستيعابه من الوهلة الأولى كده، إنما لو فكرت فى الإسم شوية و ركزت حتلاقى إن فعلا و صح جدا إن الناس الصعبة تستحق الشكر.

طيب ما تيجوا كده نوضح الموضوع أكتر شوية، يعنى لو فكرنا كده وإسترجعنا الذاكرة عن الشخصيات الصعبة اللى قابلتنا فى حياتنا، و إزاى إتعاملنا معاهم و إزاى غيروا فينا كتير، حنلاقى اه فعلا بجد لازم أشكر كل حد كان صعب فى التعامل معاه، مش علشان هو صعب و لا علشان الطاقة اللى إستهلكها منك علشان تعرف تفهمه و تتعامل معاه ، إنما علشان الدرس اللى إتعلمت منه و ساب أثر فى حياتك كلها.

يعنى تعالى كده لو إنت شغال مع مدير ليك مهيبر طول الوقت و طلباته كتير و كل ما تخلص Task يروح رامى Tasks بعدها لدرجة تخليك مش عارف تفرد ضهرك و طول الوقت محمل بمهام و طلبات مبتخلصش، إنما بص كده للجانب الإيجابى للموضوع، إن حضرتك مع كل Task بتاخدها بتكتسب و تتعلم معاها حاجات كتير و مع الوقت حتلاقى نفسك الحاجة اللى كانت ممكن تاخد يومين معاك علشان تخلصها، بقت بتخلص فى ساعتين، و لما يعدى عليك الوقت و تسيب المكان اللى كنت وقتها عمال تلعن و تسب فيه حتلاقى نفسك بتتنهد و تسحب نفس عميق و تقول ربنا يمسيك بالخير يا مديرى، ده إنت علمتنى حاجات كتير أوى و لولاك و لولا القرف اللى كنت بتحطنى فيه مكنتش حعرف أوصل للى أنا فيه دلوقتى.

تعالى بقى إنتى كمان و إرجعى بذاكرتك لورا شوية، فاكرة البنى ادم الواطى اللى كنتى مرتبطة بيه، عملك البحر طحينة و شغلك إسطوانات من اللى قلبك يحبها و إتشقلطلك علشان بس تبصيله، و هوب أول ما حس إنك بتحبيه و إنه عرف يعلقك بيه، إبتدى يتعوج و يتنمرد و يتشرط عليكى، لا و كمان بقى له قيمة و راح جى مرتبط بأقرب الناس ليكى و اخدتى إنتى الصابونة اللوكس المعتبرة يا حرام، بس تعالى معايا كده شوية، فكرى فيها بالراحة، الواد ده معلم، مش علشان الحركات الواطية اللى عملها، إنما علشان الدرس اللى إداهولك، يعنى حضرتك دلوقتى بقيتى أقوى و بتنتقى الناس اللى حتى بتكون فى دايرة معارفك، عارفة مين يقرب منك و مين تعرفيه من بعيد و مش أى حد تتكلمى معاه، شوفتى بقى كان لازم درس يعلم فيكى علشان تبتدى ترتبى حياتك صح.

حتى الأهل لو كانوا صعبين بيدوا درس لينا بيستحقوا الشكر عليه، جربت كده تتحشر فى جوازة حد و توفق راسين فى الحلال و تكون طرف مع حد قريبك فى إختيار شريك حياته، اهلا بيك، الشريك اللى إختاره طلع مش ولا بد و جابوا الذنب عليك و يمكن يقاطعوك، إشكر الظروف الصعبة بقى و إبقى حط لسانك جوة بقك و متفتحش صدرك مع حد و خاصة لو كان قريبك إلا إذا كنت متأكد من اللى قدامك 100%.

و من المواقف اللى إستعرتضها و اللى أكيد فى منها كتير، بتبين إن مش كل جرح بيوجع و بيألم فى جروح تانية كتير بتخف بس بتسيب أثر بتخلينا نفتكرها بيه و نفكر كويس قبل ما نخش فى حاجة ممكن تسبب لنا جرح تانى شبه اللى إتجرحناه. فإتعلم بقى إن الحياة مش دايما فيها ناس حلوة حنقابلها، إنما فيها الحلو و الوحش، فلو قابلنا حد وحش ده مش عيب، ده درس بيخلينا أقوى و أجمد.

تحياتى

هند مراد