مسلسل Friends

اليوم المائة و السادس عشر

مسلسل Friends

يمكن كتير بيعدى علينا أيام صعبة جدا، لدرجة إن اليوم بيبقى قافل بشكل وحش و مع كل ضغوط الحياة اللى ممكن تقابلها من ساعة ما تصحى من النوم و لحد ما ترجع بيتكوا، بيعدى عليك أحداث كتير زى إنك تقفل المنبه و تغفل شوية و تلاقى نفسك إتأخرت فتبدى تلبس بسرعة و سواء كنت حتسوق و لا حتستخدم أوبر أو كريم، أو حتى حتستخدم المواصلات العامة فكل ده بيعدى عليك بضغط عصبى لحد ما توصل لمكتبك، وصلت المكتب.. حمد الله على السلامة ونورت ... إستلم بقى  يا معلم.. كم الشغل اللى فوق دماغك و اللى لازم يتسلم فى ميعاده، غير التليفونات و كم الناس اللى بتتعامل معاها فى اليوم و الذكاء اللى مضطر تتعامل معاه كل يوم، خلصت يومك؟؟ لأ حضرتك، ده لسة مخلصش لسة حتبدى يوم جديد فى البيت و مشاكله و مين عايز يعمل إيه و كم الأعباء المنزلية اللى فوق دماغك... إيه ده إنت لسة عايش!!

أحلى بقى حاجة فى اليوم ممكن تحصلك إنك تلاقى حاجة بتفكرك بأحلى أيام حياتك و خاصة لو كانت حاجة بتبسطك وقتها، حاجة كنت بتسمعها، كنت بتشوفها، كنت متعود عليها و فجأة إختفت، بالنسبة لى أنا كانت أكتر حاجة ليها ذكريات معايا  كنت بتابعها لفترة طويلة لأنها كانت لأكتر من موسم و عدت على مراحل مختلفة من عمرى، هو مسلسل Friends، هو مكنش مجرد مسلسل أكتر ما هو كان تعلق، يعنى فى حاجة كنت بحب أشوفها لمدة 40 دقيقة كل يوم و بتعدى مع كل حلقة أحداث كتير من حياتى، بفبقيت مرتبطة بيه لدرجة صعب أوى، و اليوم اللى مكنش بيجى فيه كان يوم غم جدا، و على الرغم أن المسلسل كان فى كتير من العادات و القيم اللى بعيدة عن مجتمعنا، بس كمان كان فى حاجات كتير إيجابية و كفاية إنه كان بيقدر يضحكنى و يخلينى مبسوطة.

عن شخصيات المسلسل بقى و الميكس الغريب اللى كانوا عاملينوا، شخصية مونيكا، الشخصية المرحة المتحولة و اللى عندها إرادة قوية لدرجة إنها تفقد كل وزنها و ميتبقلهاش مثلا غير 40 كيلو، غير هوسها الغير عادى للنضافة و نشاطها الدايم و أسلوب حياتها الصحى على الرغم من إنها كانت طباخة، نيجى بقى على تشاندلر، الشخصية العبقرية فى شغلها، اللى كان بيشتغل فى مجال البرمجة وحبه لشغله و إزاى قدر يعمل منه فلوس كتير فى وقت قليل و قدرته على الإدخار و هو فى سن صغير، يمكن فى بدايته مكنش موفق أوى فى حياته العاطفية و ده طبعا قبل ما يرتبط بمونيكا. و طبعا طبعا من الشخصيات اللى كنت بحبها جدا هى شخصية روس و اللى كان أخو مونيكا، شخصية مرحة علمية مميكس غريب كده ما بين المرح و الجد، و على الرغم إن كان واقع فى مشكلة لأنه كان مطلق و معاه طفل كمان طليقته و اللى مفروض إنها كانت بتربى إبنه كانت غير سوية، إنما هو كان بيحاول يبذل قصارى جهده علشان يربى إبنه، يعيش حياة عملية موفقة، و يعيش مع كل المعوقات دى حياة عاطفية مع حب عمره اللى هى رايتشل، و لو إتكلمنا عن رايتشل أنا بصراحة كلامى مجروح فيها، لأنها ببساطة بتمثل أغلب البنات السطحية، بنت بتحب تهتم بأناقتها، دايما مترددة فى كل قرارتها، هوائية، سطحية نوعا ما، مدللة،  مش بتعرف تعتمد على نفسها، غير موفقة فى حياتها العملية و مش طموحة بس هى جميلة أوى من برة و جذابة لأى واحد لو بيفكر يرتبط بشكل بس و مش مضمون، نيجى بقى للشخصية البونبوناية و هى فيبى، هى شخصية غريبة الأطوار، فى ملامحها، طموحها، حياتها العملية و عيلتها، كل حاجة كده فيها غريبة و متعرفلهاش هى مغنية و لا بتاعت مساج و لا بياعة ولا إيه، هى نباتية بس بتتعاطف مع اللى بياكلوا لحمة عادى، بتبان غريبة و لكن اللى يقرب منها يلاقيها أجدع واحدة ممكن يتعامل معاها، بتحترم فكر و ثقافة أى حد بس ممكن تشتموا عادى جدا، شخصية بسيطة و مش مصطنعة فى كل حاجة، أكلها لبسها جريها، اللى هو أنا كده و لو كان عاجبك، و أخيرا و ليس اخرا الأخ الإيطالى حبيب الملايين جوى، حبه للتمثيل و إصراره على إنه يكون ممثل، حبه للأكل، والحرية و الدماغ اللى لوحدها، و على الرغم إنه عمل مسلسل لوحده تحت إسم جوى، و لكن طبعا معرفش يحقق نفس شعبية مسلسل Friends.

و بكل الشخصيات و أحداث المسلسل بتلاقى نفسك و من غير ما تحس إنك بتدمنه و بتستناه بشكل غريب، و الجميل إنهم بقوا بيعرضوه تانى اليومين دول و بقت أكتر حاجة بستنى اليوم يعدى علشان أشوفها، يمكن تحسونى تافهة و لا ناس ممكن تنتقد ده، بس مش مشكلة رأى حضرتك لأنى بأعمل حاجة بتبسطنى و مش بتأذى حد، غير كده بشوف أصدقاء مرتبطين ببعض و بيعملوا حاجات علشان بعض و ده بصراحة حتى لو كان تمثيل إنما بقى شىء مش موجود كتير فى وقتنا ده، المهم لو إنت تافه زى، أدخل على اللينك ده و شوف معلومات مكنتش تعرفها عن مسلسل Friends:

https://goo.gl/auUTpm

تحياتى

هند مراد