الرحمة

اليوم الثالث عشر

الرحمة

صباح الخير والسعادة عليكم كلكم، طبعا كلمة رحمة جميلة كفاية أنها تخلى الموضوع حلو بجد، و صفة الرحمة ديه لو لقيتها عند حد، ديه حاجة كفاية أنها تخليه إنسان بجد ، يحترمه الناس اللى حواليه و يقدروه، طب هو يعنى إيه رحمة.

الرحمة ديه معناها الإحساس بالاخر، و مش بس تبقى بتحس بيه لا كمان يكون فى رأفة بيه و تحط نفسك مكانه فى كل موقف ممكن يواجه، و عامةً هى صفة تتحس أكتر منها كلام يتكتب علشان تعرف معناها، يعنى حاجة حد بيعملها قدامك فتقول كده من جواك، الإنسان ده رحيم أوى.

و الصفة اللى بتيجى مع الرحمة هى نقاء و صفاء القلب والنية، يعنى مثلا زى واحد شاف راجل أو ست سنهم  كبير وماشين فى الشارع و شايلين حاجات تقيلة، راح موصلهم للبيت، و لا واحدة ست حامل و وافقة فى المواصلات راح واحد جى مقعدها، و لا قطة جعانة فواحد جه و اكلها و لا كلب عطشان و واحد راح مشربه.

الرحمة و الإحساس بالاخر ديه أحسن نعمة ربنا ممكن ينعم عليك بيها، يعنى حتخسر إيه لو قلت كلمة حلوة الصبح للراجل اللى بيساعدك إنك تخلى بيتك نضيف ولا الراجل أو الست الطيبين اللى بيجبولك القهوة الصبح، كلمة تسلم إيدك يا حج و لا تسلم إيدك حبيبتى،  مش حتكلفك حاجة أساساً ولا حتخسرك كتير بس حتكسبك محبة ناس غلبانة و الحياة حاطة عليهم و يمكن كل حاجة حواليهم معاندة معاهم، فيمكن دعوة  منهم ممكن تفتحلك أبواب خير كتير.

كمان لما تكون رحيم بالناس، بتحس بسعادة غريبة بجد، سعادة من نوع تانى، سعادة عمرك ما حتلاقيها إلا فى عيون ناس طيبة بتتضحلك و بتدعيلك من غير سبب، ناس كل ذنبها فى الحياة أنهم مش لاقين حتى كلمة حلوة حد يقولها لهم.

متستهونش بكلمة حلوة ولا ضحكة فى وش حد كل ذنبه فى الحياة إن ظروفه وحشة شوية فأضطر يدورعلى أكل عيشه و يشتغل فى حاجات انت ممكن تشوفها شغلانات بسيطة، بس فعلا هى عند ربنا حاجة كبيرة.

و ربنا يملى قلوبنا رحمة و حنان و نستحق رحمة ربنا لينا. 

تحياتى 

هند مراد