الضغط العصبى

اليوم الرابع عشر

الضغط العصبى

الفترة اللى إحنا بنعيشها ديه، فترة صعبة جدا و يمكن معظمنا عنده ضغط سواء فى شغله أو فى بيته أو حتى فى التعامل مع الناس اللى حواليه، و الضغط العصبى ممكن يسبب للى بيعيش فيه أمراض نفسية كتير و لو قدر يقاوم بيبقى حاسس كأنه عنده حمل كبير و الحمل ده دايما بيشده لتحت و مش مرتاح نفسيا خالص و المقاومة بإنك تتحمل فوق طاقتك و تفضل ساكت و منعزل بتكون  صعبة جدا على أى حد.

علشان كده ححاول أعرض بعض الطرق اللى من خلالها نقدر نتخلص من أى ضغط عصبى ممكن نتعرض له، و يمكن تخليك عندك شوية مقاومة علشان تعدى الفترة ديه من حياتك، و تعيش يومك بشكل طبيعي.

من الحاجات اللى ممكن تعملها و تخلصك من الضغط العصبى، المواجهة، يعنى تواجه الموقف أو الشخص اللى حطك تحت ضغط عصبى و تفهم أبعاد الموقف أو تفهم وجهة نظر اللى قدامك و مبرراته و أيه الدوافع اللى خلته يحطك فى موقف ممكن يتسبب فى ضرر نفسى ليك، و ساعتها بجد حترتاح و إذا عرف السبب بطل العجب، فأنت لو عرفت ايه السبب اللى خلاك تحت ضغط، حتعرف على الأقل تفكر فى حلول ليه و تشيل شوية من الأفكار السلبية اللى عمالة تاكل فى دماغك.

إنك تحسن من حالتك المزاجية و تعمل حاجات جديدة تشغل بيها تفكيرك ووقتك، ساعات كتير بيساعد على التخلص من الضغط النفسى، يعنى رتب لرحلة فى مكان جديد مرحتوش قبل كده أو قابل ناس جديدة و اتكلم معاهم فى أى مواضيع ، حتحس باختلاف اكيد و ده حيساعدك بشكل أو بآخر أنك تخف الضغط من عليك شوية.

فى حاجة كمان ممكن تعملها ، بس أنا مش بحبذ إنك تعملها إلا لما تكون بتثق فى حد أوى، إنك تفضفض مع حد و تحكيله إيه الضغوط اللى عندك، بس زى ما اتفقنا انه لازم يكون حد محل ثقة، حد انت ماَمن له و عارف كويس أنه حيشاركك بحلول تساعدك و تخفف من الضغط اللى عندك و ساعات كتير مجرد انك تميل على حد و تشاركه تفكيرك ديه لوحدها بتريح. و فى فيلم حلو اوى شفته كان اسمه I Love You Man، الفيلم ده فى حتة كانت بتعجبنى اوى، 2 صحاب ولاد اتعرفوا على بعض جديد بس كان فيهم واحد لاسع شوية فكان بيعلم صاحبه انه يصرخ فى حتة فاضية عند البحر علشان يطلع كل الطاقة السلبية اللى عنده، انا بقى بجد حموت و اصرخ فى أى حتة زحمة و فى وش كل واحد أو واحدة قرفانى.

ملحوظة: بلاش تعملوا كده، ليبقى Trend و تلاقى كلنا ماشيين بنصرخ فى وش بعض.

  كمان فى طريقة حلوة اوى للتخلص من الضغط النفسى، وهى انك تساعد حد متعرفوش، أو تعمل أى عمل تطوعى، فى ناس كتير الأعمال الخيرية بتديها تفاؤل و طاقة إيجابية. الرياضة كمان و خاصة اللى فيها حركة كتير بتخليك تطلع كل الطاقة السلبية اللى عندك، اديها كام بوكس فى وش اى واحد انت متضايق منه، و ده طبعا فى خيالك.

على فكرة فى ناس كتير أعرفها جالها سكتة قلبية فى سن صغير وفارقت الحياة من كلمة جارحة سمعتها من حد، فخلينا ناخد بإيد بعض و نحاول نحسن من تعاملنا مع بعض. بجد الدنيا مش مستاهلة انك تشيل هم و لا حد مستاهل انه ياخد جزء من تفكيرك و طاقتك، و خلى الحساب دايما عند ربنا و اقرب منه بصلاتك و اشتكيله، صدقونى ده احسن علاج للضغط العصبى.  

تحياتى

هند مراد