إسكندرية و المصيفين

اليوم الخامس عشر

إسكندرية و المصيفين

صباح الخير عليكم جميعا و كل سنة و أنتم طيبين كلها كام يوم و العيد الكبير يجى،  و مع العيد و الصيف عامة ً إسكندرية بتكون مليانة مصيفين كتير، أهلا بيهم و منورين، بس فى ناس منهم الصراحة مش من النوع اللى بينور خالص.

أهلنا و هما بيربونا و احنا صغيرين كان فى حاجات جميلة بيعلموهلنا و كمان كانت موجودة فى الكتب بتاعتنا و بندرسها و من ضمنها، آداب الزيارة، يعنى و انت رايح عند ناس حتى لو قرايبك ايه الحاجات اللى تعملها و ايه الحاجات اللى متعملهاش علشان تكون ضيف خفيف و متضايقش الناس اللى بتروحلهم.

و المصيفين دول زى الضيوف بالضبط يعنى اللى بيحصل منهم من رمى زبالة على الشواطئ و النزول بملابس النوم و بهدلة الشوارع و التصرف بهمحية، ديه كلها من السلوكيات اللى يرفضها أى مجتمع و أى دين فى العالم.

يا سيدى و يا ستى اسكندرية و اى بلد فى مصر فيها بحر،  ترحب بكم جميعا و لكن!

بس حيجرى إيه لو قلدنا الناس المتحضرة شوية، و مش حتتكلف حاجة على فكرة، يعنى لو عايز تاكل، كل اللى انت عايزه بس خلى جنبك أى شنطة ترمى فيها الزبالة اللى حتطلع منك، و انت مروح تروح زي الشاطر ترميها فى أى باسكت، خسرت حاجة ! و لا اى حاجة.

طيب نيجى بقى للمظهر العام، يعنى فى لبس بحر مش براند بس شكله حلو و مهندم، إنما الملابس الداخلية ديه بتاعت تحت الهدوم و مش المفروض نمشى بيها فى الشارع، و فى كمان عوامات سعرها معقول جدا و فى متناول الجميع، يعنى ايه السر فى كاوتش العربيات اللى ماشى بيه و مرازى بيه الناس اللى حواليك و مبوظ المنظر العام، نيجى بقى للملايات اللى بتتحط على الشمسيات و بتدارى شكل البحر و بتضايق الناس اللى قاعدة حواليك، أعتقد كده ديه ملهاش أى لازمة، يعنى انت مش فى معسكر و لا Camping فبلاش تقفل الرؤية على الناس اللى حواليك.

طبعا أكتر حاجة كمان و ديه عايزلها موضوع منفرد و هو التحرش اللى بيحصل فى شواطئ مصر كلها، و خاصة التحرش بالأجانب وده حقيقى بيهز صورة مصر كلها و بنعتبر إحنا دولة منفردة من نوعها فى الظاهرة ديه.

 فى بلاد الفرنجة بيحطوا للناس Books to read  و على الرغم من ان الناس بتكون على البحر يعنى وارد مثلا أن الكتاب يجى فيه ماية، لكن هما بثقافتهم و تقديرهم للقراءة، ده مش بيحصل.

الخلاصة، إننا نكون نضاف و نحترم المكان اللى احنا حنزوره سواء كانت اسكندرية أو أى مكان تانى، البلد فيها أماكن لو كانت موجودة فى حتة تانية فى العالم كانوا قدروها و حسوا بالنعمة اللى ربنا اداهالهم.

فخليك ضيف خفيف فى المكان اللى رايحه و اعرف ان نضافتك بتعكس أخلاقك و تربيتك.

تحياتى

هند مراد