العيد فرحة

اليوم السابع عشر

العيد فرحة

كل سنة و إنتم طيبين وعيد أضحى سعيد علينا جميعا، فى العيد بيكون فى مشاعر حلوة و أحاسيس كتير و خاصة إحساس الأهل ببعض و الزيارات العائلية و طبعا فى أكل كتير، و أطفال مبسوطين بلبس العيد و الفسح و حاجات كلها حلوة.

لحد هنا حلو قوى العيد، بس تعالوا بقى للناس التانية، الناس اللى العيد بالنسبة لها زى أى يوم تانى، يمكن بيعدى عليهم بزعل و كسرة قلب. ناس طيبة بس مش لاقية حتى ربع كيلو لحمة ياكلوه، و لا حتى لبس كويس يسترهم، يمكن في منهم بيشتغلوا بس مع اللى بيحصل المرتب حتى مبقاش بيكفى تمن الماية و النور و العيش، هى طلباتهم مش كتيرة، يمكن الستر و الصحة تكون فى اكتر دعواتهم و مش عايزين غيرهم.

على فكرة الناس ديه فرض علينا نعملهم إعتبار و يكونوا فى حسابتنا، يعنى هو لما حضرتك بتساعد/ى حد محتاج ده مش معناه فضل منك،  إنما حق ليهم، حق علشان العدالة الالهية وقانون الكون اللى ربنا خلقه طلب مننا الإحساس بالاخر و قضاء إحتياجاته.

فالمطلوب مننا شوية إحساس ببعض، إحساس بواحد يمكن داخل عليه العيد و زيه زى أى يوم تانى، و ماشى منكسر، كل اللى محتاجه منك شوية عطف و طبطبة عليه، مش حيجرى ليك حاجة لو بصيت فى دولاب هدومك و طلعت اى طقم زيادة عندك و روحت كاويه و غسله، و حطه فى شنطة شكلها حلو و إديته لحد محتاجه، طب ده كفاية البصة اللى حيبصهالك و الله تسوى الدنيا و مافيها. و برده مش حيجرى حاجة حتى لو إنت مدبحتش تعمل حسابك فى كيلو لحمة زيادة تديه لحد محتاجه يمكن ميكونش شاف شكله حتى من كام شهر، شوف بقى و هو داخل بيته بالكيلو ده يمكن يفًرح معاه كل اللى فى البيت بأكلة حلوة، و يدعولك من قلبهم و كل ده بجد مش حيكلفك كتير يعنى لو إنت عامل حسابك فى 4 أو 5 كيلو لبيتك إعمل حساب حد تانى معاك و الله مش حتفرق معاك كتير بس حتفرق معاه هو كتير اوى.

فعلشان العيد يبقى فرحة بجد و نحس بيها كلنا مش بس فى ولاد لابسة حلو و بندليهم عدية، ولا فى الأكل اللى بناكله ولا بزيارتنا لبعض، إنما العيد فرحة علشان حققنا جزء من العدالة اللى المفروض تخلينا كلنا عايشين مبسوطين و نحس بالطعم الحقيقى للعيد و إن بجد

العيد فرحة

تحياتى

هند مراد