التقدير

اليوم التاسع و الثمانون
عدم التقدير
جربتى فى مرة تعملى اكلة جامدة جدا خدت منك وقت كبير اوى و مجهود علشان تعمليها، و بعدين مفيش حد شكرك عليها، طب جربت تسهر فى الشغل و تحرق دمك علشان يخلص و خلصته بشكل احترافي جدا، و مفيش حد أثنى عليك، طب جربت تعمل شغل ناس تانية، بس علشان انت خايف على مصلحة البزنيس، و بعدين حسيت و لا كأنك عملت حاجة أو أصحاب المصلحة حسسوك أن ده فرض عليك و إنك معملتش حاجة زيادة.

هل حسيت فى مرة بعدم التقدير، إحساس وحش صح؟

بس ممكن حد يقولى هى الأم لما بتعمل الأكل ده اصلا دورها و المفروض متستناش شكر من حد، أرد أنا و اقوله، حضرتك ده دور الخادمة مش دور أمك خالص، و أمك هنا لغة عربية مش قصدى بيها شتيمة خالص و الله اعلم، كمان لما تعمل شغل غيرك أو تعمل حاجة بشكل حرفى، يبقى من باب الذوق و الأدب انك تتقدر و لو حتى تقدير معنوى، و ده فى الشغل اسمه تحفيز، يعنى لما اعمل حاجة حلوة و انت قدرتنى و شكرتنى عليها، ده حيكون دافع ليا علشان اشتغل احسن و من هنا بيجى تحسين و تطوير الاداء، لكن لو انت اشتغلت بإخلاص و طلعت أقصى ما عندك علشان الشغل يطلع بالشكل اللائق و بعدين ملقتش تقدير، بتحس بإحباط و بعد كذا مرة حتلاقى نفسك ملكش نفس تعمل الحاجة لأن النتيجة تحصيل حاصل فى الاخر حيكون زيك زى غيرك اللى قاعد مبلط فى الخط و متنح و مبيعملش حاجة.

 علشان كده التقدير له دور مهم فى حياتنا كلنا، و فى كل حاجة، يعنى لو انت نازل الصبح و لقيت عامل النظافة بيشتغل بطريقة حلوة و الدنيا نضيفة، و جيت ضحكت فى وشه و قولتله الله ينور، حتلاقيه اتحمس كده و عنده استعداد يعمل شارعين جنب شارعكم، غير إحساسه بأنه حد مهم و له دور فى المجتمع زى أى حد.

الخلاصة، لو كل واحد فينا حد عمله حاجة حلوة و قاله شكرا مش حيحصل حاجة، كلمة جزاك الله خيرا اللى بتقولها لحد، ربنا بيجازيك عليها انت كمان خير و هلى فى بالك دايما الجملة دى "قدر تتقدر".

تحياتى
هند مراد

   

الإكتئاب

اليوم الثامن و الثمانون

الإكتئاب

حسيت مرة كده إنك مش قادر تتكلم و لا قادر تسمع حد قدامك، طب حسيت مرة كده إنك قافل من الدنيا كلها و عايز تبقى لوحدك و مش عايز تشوف حد و نفسك تقعد فى جزيرة معزولة عن كل البشر، طب حسيت مرة إن الحيوانات اللى فى الشارع و ضالة و ملهاش مأوى أنضف بكتير من الناس اللى بتتعامل معاهم و قريبين منك.

على فكرة لو حسيت بكل ده مرة أو كام مرة حتى، دى حاجة عادية و لكن بقى اللى مش عادى لما يبقى ده بقى أسلوب حياتك، يعنى إنعزالك، إحساسك بالغربة عن الناس اللى حواليك، نومك الكتير، إعتذارك للناس بشكل دايم عن التواجد معاهم والتواصل الإجتماعى، كل الحاجات دى إشارة لإن حضرتك عند إكتئاب أو أنك فى بدايته.

لو إنت حاسس إن دى مشكلة يبقى كده إنت قدرت تحل نص المشكلة، لكن لو شايف نفسك طبيعى و إن الناس اللى لازم تتغير و الدنيا جحيم و الأيام سودا و إحنا داخلين على وحل و كلنا حنموت و الدنيا فانية و إن إنعزالك ده هو حل المشكلة، أحب أقولك و أبشرك إن حضرتك كده داخل فى حيطة سد، يعنى داخل فى حتة غامقة صعب أوى تطلع منها لوحدك و لو لجأت لأخصائى يعالجك يبقى مبروك عليك الإعدام، لإن أنا شوفت ناس قريبين منى كتير جالهم كده و لما لجوأ للتدخل من أخصائى نفسى ، حالتهم ساءت وده لأن أى عقار مضاد للإكتئاب أثاره الجانية أكتر من فوايده بكتير، و لو دخل جسمك عقار من النوع ده بيبقى صعب تعيش من غيره و لازم تستمر عليه مدى الحياة او بيخرج من جسمك بصعوبة زى المخدرات، يبقى ليه توصل نفسك للمرحلة دى أساسا و إنت فى إيدك تنقذ نفسك.

لو إنت من النوع اللى لسة فى أول الأعراض يبقى فى حاجات حقولها لك و حتساعدك علشان تعدى مرحلة الإكتئاب دى:

قرب من ربنا و إدعيله فى كل صلاة و إستغفره و حس بيه حواليك، صدقنى حتلاقى نفسك بتتحسن مع الوقت، إقرا كلامه و أستوعبه كويس، و بجد لو وصلت لدرجة قرب من ربنا كفاية حتحس بيه معاك فى كل وقت و أحن من أى حد عليك، بس إنت إفتحله قلبك و قربله صح.

حاول على قد ما تقدر تقرب من ناس كويسة فى حياتك، ناس ناجحة و بتحب الخير لغيرها، قرب منهم و إندمج وسطهم لأن لو فى حياتك ناس من النوعية دى حياخدوا بإيدك و عمرهم ما حيسبوك لوحدك.

كمان على قد ما تقدر غير، غير الأسلوب اللى بتشتغل بيه، غير ديكور البيت و  ترتيب الأثاث فيه، غير الورد اللى دبل و حط ورد جديد، غير الناس اللى بتشوفها، غير الأماكن اللى بتروحها، أهم حاجة أو ما تحس إن الدنيا حتغمق فى وشك غير و إشغل نفسك بحاجات تانية.

الطبيعة، اه والله الطبيعة كمان لها تأثير حلو أوى على النفسية، يعنى شوف البحر و السما، إستمتع بالخضرة أخرج لأماكن مفتوحة و كفاية أماكن مغلقة و ريحة الشيشة اللى فى كل حتة و السجايرو القرف ده، وشم هوا نضيف ، شمه بقلبك و عينك قبل ما تشمه من مناخيرك، بجد حتفرق معاك أوى.

أبعد عن الحاجة اللى تزعلك و بلاش تواجها، لو حسيت إن فى حاجة بتزعلك أو شخص بيستفزك لدرجة ممكن تخليك مكتئب، يبقى أحسنلك تتجنبه أو تبعد عنه و لو قدرت كمان تتجاهل الشخص ده كأنه مش موجود إعمل كده  و حتحس بجد بفرق كبير و إن نفسيتك إبتدت تتحسن، لأن المجادلة و المنهادة مع أشخاص مستفزة بيستهلك مننا طاقة و بنحس معاه بكم من القرف إحنا فى غنى عنه.

جرب بقى تعمل الحاجات دى مع بعض و إن شاء الله أعراض الإكتئاب دى حتقل.

تحياتى

هند مراد

إعرف الصح و خليه جواك

اليوم السابع  الثمانون

إعرف الصح و خليه جواك

بصوا كده علشان متقولوش عليا بوشين، هو موضوع النهاردة  دى من الحاجات اللى مبعرفش أعملها بس أكيد لو قدرت أعملها حبقى أحسن، بس علشان اللى حيقرى الموضوع و يكون عارفنى من قريب ميستغربش، بس الواحد من كتر مراقبته  لناس ناجحة كتير فى حياتها لقيتهم بيعرفوا الصح و يخلوه جواهم، طيب إيه أصلا معنى إعرف الصح و خليه جواك، و إمتى ينفع أعمل كده؟ّ!

يلا نبتدى، معنى إعرف الصح و خليه جواك، هو إنك تبقى عارف حاجة و تبين للى قدامك إنك مش عارفها أو تدى Poker Face يعنى تبان محايد كده و متجادلش و لا تبين إنك موافق أو رافض لرأى حد معين أو لحاجة بتتعرض عليك، يعنى مثلاً حد قريبك جالك و قالك أنا حخطب فلانة و إنت معزوم على الفرح، مع إنك متأكد إن مثلا فلانة دى كانت مرتبطة بحد تانى، تفتكر حيبقى صح لما تقولوه إن الإنسانة اللى إختارتها من وسط الناس كلها دى كانت بتعرف واحد تانى؟ طب إيه رأيك لو قولتله و طلع عارف أصلاً و إنت كسفته، طب إيه رأيك لو قولتله و طلع مكنش عارف و إنت فاجئته و كسرت فرحته . مثال تانى، لو إنت فى الشغل عارف إن واحد زميلك إترقى و إنت بس اللى عارف ده و لسة الخبر متقالش لكل الموظفين اللى فى الشركة، بس حيتقال قريب و راح واحد زميلك تانى مجتهد جدا جدا و كان متوقع إن التريقة دى حتبقى ليه مش للشخص اللى إنت عارف إنه هو اللى حيترقى، تفتكر تقوله و تقفله حياته و تقفله منك و لا تستنى لما المعلومة توصله باى طريقة تانية؟

فإستراتجية إعرف الصح و خليه جواك ساعات كتير بتنفع علشان تعدى بيها مواقف كتير فى حياتك و تتجنب الحرج لنفسك أولا ثم للطرف التانى اللى ممكن تدمره من معلومة إنت ممكن تقولها له، كمان لو إنت متأكد إن الشخص اللى قدامك مش بيثق فيك بدرجة كفاية لدرجة إنه يستقبل منك معلومة أو خبر أو حاجة مهمة ممكن تأثر فيه أو فى حياته بشكل سلبى، فإعرف الصح و خليه جواك ده أحسن أسلوب ممكن تتبعه، كمان لو الشخص اللى قدامك عندى و متزمت و من النوع اللى معندوش قابلية إنه يسمع حد قدامه و بيشوف رأيه ايما هو اللى صح، فأكيد المجادلة مع شخص من النوعية دي حتبقى خسرانة و ملهاش أى مغزى، زى لو مديرك حياخد قرار غلط و إنت متأكد و معاك وقائع كمان بتثبت إن القرار اللى حياخده ده غلط بس هو من نوع المديرين المسيطر اللى مبيسمعش لكلام حد غير نفسه، فهنا أحسنلك إنك تعرف الصح و تخليه جواك.

بس إمتى بقى الإستراتجية دى بتكون غلط، الإستراتيجية دى بتكون غلط لما الطرف المتلقى ده يكون قريب منك أوى زى أختك، أمك، صاحب عمرك، شريكك فى الشغل، يبقى هنا لازم تزعق باللى إنت عارفه و تتحمل أى عواقب و تحارب علشان توصل الصح اللى جواك للطرف اللى إنت خايف على مصلحته، و أوعى تفكر تكون سلبى، لإن خسارتك فى حالة عدم مشاركتك للصح اللى إنت عارفه حتكون كبيرة أوى و مش حتعرف تعوضها و يمكن تكون خسارتك حتكون للشخص نفسه.

تحياتى

هند مراد

مواجهة التحدى

اليوم السادس و الثمانون
مواجهة التحدى
مع بداية كل يوم بيعدى علينا، بيكون معاه تحدى جديد بيقابلنا، و سواء وافقت و لا رفضت، التحدى بقى جزء من حياتنا و التحدى ده حاجة بتميز الإنسان قوى الإرادة عن الإنسان ضعيف الإرادة اللى بيستسلم للظروف بدون مقاومة و بيرضى بالأمر الواقع.

يمكن أكون باكتبلكم النهاردة و انا لسة جاية من عند دكتور العيون اللى نصحني انى بلاش أركز فى حاجة لفترة طويلة أو انى أركز فى أى شاشة مضيئة و ابطل قراءة كمان، يلا هى جات على القراية، المهم إن الكلام الحلو ده لمدة متقلش عن اسبوع و من الأفضل اسبوعين، انا بصراحة فكرت شوية كتير، و قلت طب ما اقولكم، بس انا نفسى حبقى متضايقة لما معملش الحاجة اللى بحبها كل يوم و لما الاقى عذر علشان اهرب من التحدى اللى انا قبلته من البداية و اصريت عليه ، فقررت اكتب على مهلى و أبعد الشاشة عنى على قد ما اقدر، فتقريبا انا كاتبة موضوع النهاردة فى ساعتين .

و انا عايزاكم تعملوا كده لما تلاقوا فى تحدى حيقابلكم فى اليوم، انكم تقولوله " أنت جيت يا رمضان" و تكملوا اليوم و تكملوا حياتكم و تخلصوا من تحدى و تستنوا تحدى تانى، علشان هى دى الحياة.

احنا اتخلقنا نوعين من البشر، نوع بيتعب و يعافر لآخر يوم فى عمره و نوع تانى مبيعملش حاجة غير أنه بيتفرج على النوع الاول، فبلاش تحط اللوم على الظروف و العقبات اللى بتقابلك فى حياتك، لأن فى ناس بتنجح و ظروفها أوحش من ظروفك، و دايما حط هدف قدامك و لو وقعت فى نص الطريق، قوم و لا كأن حاجة حصلت و كمل كأنك لسة بادى و متبصش وراك ،بص قدامك.. بص لهدفك.. و طول ما انت بتحاول حتقدر بس انت حاول و عافر.

انا طالبة منك كمان حاجتين، أولهم لازم يكون عندك ثقة فى المولى سبحانه و تعالى و تصدق و تؤمن فى قناعة نفسك أن الله لا يضيع اجر من احسن عملا، فاتاكد و ثق تمام الثقة أن على قد تعبك ربنا حيجازيك، و أن على قد التحديات و الاختبارات اللى حتعدى منها، على قد ما كرم ربنا ليك حيكون كبير. تانى حاجة عايزاك تثق فى نفسك و تعرف قيمتها، و تفكر نفسك دايما بأنك حتقدر و حتوصل حتى لو البداية صعبة بس طول ما انت مش من اللى بيتفرجوا، طول ما فرج ربنا قريب.

تحياتى
هند مراد
  

كيف تقلل من السلبية فى حياتك

اليوم الخامس و الثمانون

كيف تقلل من السلبية فى حياتك

كتير بتعدى علينا فى حياتنا أوقات بنحس معاها كده إننا قافلين من الحياة و مش قادرين نقاوم مشاكل الحياة و معندناش طاقة لمواجهة أى حاجة أو أى حد، يمكن كمان بنحس بنوع من السلبية و إننا مش عايزين نتصرف  و لا ناخد أى قرار وبنبقى كده متنحين.

على فكرة دى حاجة عادية ممكن تحصل لأى حد فينا نتيجة لضغط الحياة بس اللى بيفرق حد عن التانى هو إزاى ببتصرف و يواجه القترة دى فى حياته، يعنى فى ناس بتقدر تقاوم السلبية دى و ناس تانية ممكن تستسلم ليها، فمن أهم الحاجات اللى ممكن تعملها فى الفترة دى:

أولا: لازم تواجه نفسك بالمشكلة اللى عندك و خلت عندك شعور السلبية دى، يعنى لازم تحدد إيه هى المشكلة و إيه أبعادها و أثرت عليك فى إيه و تفضل تحلل المشكلة و تجيبها يمين و شمال لحد ما تعرف كل حاجة عنها.

ثانيا: بعد ما عرفت المشكلة، حدد و ركز على الحلول، يعنى مثلا أنا حاسس بسلبية تجاه مستفبلى و مش فارق معايا أشتغل فين و لا أشتغل أصلا ، إنما مثلا لو بصيت للموضوع على إنه مشكلة فى حياتك و ركزت فيه، حتلاقى مثلا إنك بتترفض فى شغلنات كتيرإنت بتقدم لها علشان معندكش مهارات معينة، فلازم بقى تعرف إيه المهارات اللى ناقصة عندك و حتؤهلك لسوق العمل و تبتدى تشتغل عليها، و إنت كده خدت خطوة ضد إنك تكون سلبى وواقف فى مكانك و ساعتها ثقتك بنفسك كمان حتكبر علشان إنت بقيت بتعرف حاجات أكتر.

ثالثا: خليك جنب ناس إيجابين و إبعد عن الناس السلبية فى حياتك، يعنى لما تلاقى حد بيفكر بسلبية مع كمان إن إنت سلبى عمرك ما حتعرف تخرج برة دايرة السلبية، لانك إنت كده لقيت حد بيشجعك على اللى إنت فيه، إنما لو حد إيجابى حيشدك ناحيته و بالتالى حيبقى أسهل إنك تطلع من دايرة السلبية اللى إنت حبست نفسك فيها.

رابعا: نظم أكلك و خليه صحى، حد حيسالنى إيه علاقة ده بإن أنا سلبى، حقول لحضرتك لأ ده ليه علاقة و علاقة كبيرة كمان، لأن حضرتك لو بتاكل صحى حتلاقى نفسك حركتك سهلة و عقلك نشيط وحاضر طول الوقت، إنما لما تلغبط فى أكلك وزنك بيزيد و بيجيلك شعور بتأنيب الضمير و بتحس بإكتئاب و إن حركتك تقلت وده لوحده كفيل إنه يحبطك وو يخليك سلبى، علشان كده حاول تختار أكل يكون صحى و فيه فايدة لجسمك و عقلك.

خامسا: دايما و إنت بتفكر فكر فى النهاردة حتقضيه إزاى و بلاش ترمى أى حاجة على بكرة، يعنى لو عايز تبتدى فى حاجة إبتدى دلوقتى حالاً و مش بعد شوية، عايز تاخد كورس .. عايز تنزل جيم.. عايز تبتدى رجيم، يلا إبتدى دلوقتى و متستناش لبكرة، لإن لو فضلت تأجل حاجات لازم تعمللها و تأجل و مبتخدش فيها خطوة، حتحس بإحباط و بعدين بسلبية.

سادسا: القناعة بأن الحياة متغيرة و مش ثابتة، يعنى ساعات حتبقى مبسوط و ساعات حتبقى متضايق، ساعات حتبقى نشيط و ساعات حتبقى كسلان،  ساعات حتبقى بتجرى و ساعات حتبقى نايم، كمان ساعات حتبقى سلبى و ساعات حتبقى إيجابى، و من الاخر أى حاجة متغيرة بتبقى تحت سيطرتك، يعنى إنت اللى بتتحكم فيها مش هى اللى بتتحكم فيك، فحاول على قد ما تقدر تكون إيجابى و إتجنب إنك تكون سلبى و يأثر عليك الشعور ده.

سابعا: إبعد و تجاهل عن اللى حيفكر فيه اللى حواليك، يعنى مثلا لو إنتى بنت و جالك فرصة عمل خارج البلاد و إنتى حاولتى كتير جوة بلدك لكنك مش لاقية نفسك و شايفة إن مستقبلك فى المكان اللى برة ده أحسن، فسيبك بقى من تفكير اللى حواليكى و الكلام اللى ممكن تسمعيه زى إنتى بنت و إزاى حتسافرى لوحدك، و لا إنك حتفشلى و لا أى حاجة محبطة ممكن تأثر فيكى و إتكلى على اللى خلقك لأن الناس بتفضل تتكلم بس عمرها ما حتبقى مكانك و لا حتدعمك زى ما إنتى حتدعمى نفسك، و لو مشيتى وراهم إنت اللى حتخسرى علشان كنتى سلبية و مقاومتيش.

و ياريت قبل ما تختار تكون سلبى فكر فى المعلومة دى كويس:

إن أكثر من 80% من رسائل العقل للجسد سلبية وتسبب 75% من الأمراض فكن حريصاً في ما تقوله لنفسك.

تحياتى

هند مراد