الألم

اليوم الرابع و السبعون
الألم 

كام مرة فى حياتك وثقت فى ناس و الناس دى خذلتك، طب عمرك قابلت حد و اتعلقت بيه اوى، و هو كان جنبك اوى و حسسك بأمان من كتر خوفه عليك، أو زى ما كان بيمثل انه بيخاف عليك و انت صدقته و بعدين صحيت من النوم فجأة لقيته مش جنبك و زيه زى أى حد غريب أو حتى انت متعرفش هو راح فين زى ما تكون كنت بتحلم، طب عمرك وثقت فى حد معاك فى الشغل و امنته على أسرارك و لقيت كل حاجة انت قلتهاله الناس كلها عرفاها، طب جربت حد يخونك، حد حبيته بجد و وثقت فيه و بعدين فجأة اكتشفت انه وهم كبير و إنك و لا فارق معاه فى حاجة.

طبعا فى حاجات كتير بتالم و تولع القلب من اللى انا وضحته ،فى حاجات ممكن تحصلك فى حياتك مؤلمة بجد، تخليك تقع و تقع فى القاع كمان، فى حاجات صعب عليك تواجهها و تكمل عادى كأنها محصلتش، حاجات عقلك و قلبك بيرفوضوها و واقع انت مش عايز تبقى فيه، واقع اتفرض عليك أنت مخترتوش، إحساس صعب و حالة من الرفض المستمر، ليه انا، ليه كل ده مع بعض، انا ماذتش حد عمرى طب ليه بيحصلى كده، و مليون صراع و أسئلة جواك، و عمرك ما بتلاقيلها حل، دايرة مقفولة و بتلف فيها، و ناس مش عايز تشوفها و للأسف كل يوم بتشوفها و ناس تتمنى تلمح طيفها و عمرك ما حتشوفها، ليه الحياة صعبة كده .. ليه اللى انا عايزه مبخدوش. ..   ليس اللى مش عايزه موجود منه كتير و دايما بيطاردنى.

جوابى ليك حاجة واحدة، اصبر

أصبر علشان على قد تعبك ربنا حيعوضك
أصبر علشان كل حاجة مرة شوفتها حتشوف حاجات حلوة كتير بعدها
اصبر علشان اللى ربنا بعده عنك كان فيه شر ليك
أصبر علشان كل ضحكة اتحرمت منها ربما حيعوضك بسعادة عمرك ما تتخيلها
أصبر علشان تشوف حكمة ربنا فيك و عدله فى الدنيا

بجد إحساس الألم و قهرة القلب ده، إحساس صعب على أى حد يتحمله، بس لو تبص لبعد الالم، حتعرف إن قد ايه ربنا ده كبير و رحمته واسعة اوى و فرجه دايما قريب.

تحياتى
هند مراد