التسلط

اليوم الخامس و السبعون

التسلط

ساعات بنقابل ناس و بنتعامل معاها و من كتر بساطتها، بنبقى عايزينهم يفضلوا حوالينا طول الوقت، الناس البسيطة المتواضعة دى و اللى مش بتحسسك بتكلف و إنت بتتعامل معاهم، بيكنوا مريحين لدرجة كبيرة بتسمح إنك تقرب منهم و بتحب تتعامل معاهم.

لكن فى ناس تانية كتير مننا بننفر نتعامل معاهم، و من ضمن الناس دي الشخصية المتسلطة، ودى شخصية شايفة نفسها صح طول الوقت، وإن كل حاجة بتعملها لازم تدرس فى الجامعات الدولية، و إن أى هبل بيطلع منها بيتسمى رؤية حتى لو كان عك زى إن الملوخية حتغلى 4 ج بعد سنتين، أى كلام و هرى، إنما بالنسبة للشخصية المتسلطة هى/و بيقولوا درر و إنت لازم تصدق و تؤمن و إلا تتحول لعدو لديد و زنديق و حقود، و كل الناس اللى حوالين الشخصية دى إديتها أهمية، كل ما تسلطها بقى أكبر و أكبر.

المشكلة فى الشخصيات المتسلطة إن بيجى عليها مرحلة بتكون مؤذية للى حواليها، و الأذى النفسى بيكون كبير أوى للشخصيات المحيطة بالشخصية المتسلطة، لان لو مثلا كان الشخصية المتسلطة ده مدير حد فى الشغل، فبيضطر يتعامل معاه كل يوم و يحتك بيه و يستحمل التسلط بكل أنواعه علشان لقمة عيشة و ده أكيد بياثر على الشخص ده بالسلب و حالته النفسية بتكون شبه مدمرة من كتر كمية التسلط اللى بيشوفها فى اليوم و بتتعبه نفسياً وبتاثر فى مستوى ثقته بنفسه و تعامله فى البيئة المحيطة ليه، كمان لو كان شريك حياتك من نوعية الشخصيات المتسلطة، حياتك كلها ممكن تتحول لجحيم و بتكره إنك تصحى أساسا من نومك الصبح، و لو لا قدر الله فى أطفال بينكم، هما كمان بيتأثروا و حالتهم النفسية مبتبقاش سوية، و للاسف الحياة بتكون بين الطرفين جحيم و اللى بيتعذب أكتر فى العلاقة اللى من النوع ده هى الشخصية اللى بتيجى على نفسها و تتحمل التعامل مع الشخصية المتسلطة.

طيب إيه اللى ممكن نعمله علشان نتعامل مع الشخصية المتسلطة، و منتاثرش نفسيا.

أولا و إحنا بتعامل مع الشخصية المتسلطة لازم نكون عارفين أن الشخصية دى عندها نقص و غير سوية فبلاش ناخد كل حاجة بتتطلع منه على محمل شخصى، يعنى زى كأنك بتتعامل مع واحد مجنون فأى هرتلة بتطلع منه مش محسبوة عليه لأنه مجنون و مريض فانت لو أقنعت نفسك اللى هو صاحب مرض و فهمت ده كويس يبقى الباقى سهل. كمان لازم تكون هادى و متفقدش أعصابك و لا تحسسه إن حركاته فارقة معاك أصلا، بالعكس خليك كول فى نفسك كده ومهما إنفعل حاسب انت على إنفعالاتك و سيطر كده و أوعى يستفزك بأى شكل من الأشكال، خليك دايما كول.

لو الشخص ده فى دايرة عيلتك او قريب منك بدرجة تسمح إنك تتكلم معاه بشكل مفتوح شوية حتى لو مش حيتقبل كلامك، حاول تعرض عليه فكرة إنه يكشف عند دكتور نفسى لان ده مش عيب و لا حرام و لازم يفهم قد ايه هو مكروه و محدش طايقه، علشان ده حيستفزه و يخليه يحس بالمشكلة اللى عنده و يستجيب لفكرة إن حد يساعده و ياخد بإيده ويعالجه.

و أخيرا لو الشخص ده بينفع تتجنه، إعمل كده و ريح نفسك من وجع الدماغ لان الحوار حتى مع الشخصيات اللى من النوعية ده حوار خاسر و فاشل و معدوم الهدف فاختار نفسك و بلاش تأذيها بإنك تعرف ناس كده من الأساس و مهما كانت المنفعة اللى حتيجى منهم فصدقنى مشاكلهم أكتر بكتير من قدرتك على التحمل.

تحياتى

هند مراد