الحب من طرف واحد

اليوم الثامن و السبعون

الحب من طرف واحد

أجمل حاجة فى الدنيا إنك تلاقى حد فاهمك بتحبه و بيحبك و تكون مرتاح و إنت بتتكلم معاه، و بتحس إن ده أكتر واحد قريب ليك فى الدنيا، يعنى بتكون على طبيعتك جدا و إنت معاه، و مهما كانت طبيعتك إنت مش بتتكسف منه و بتكون زى ما إنت، و هو ده أهم حاجة فى الحب "الصراحة و الطبيعية"، يعنى لو إنت فى علاقتك مع حد بتتكلف إعرف كده إن ده مش حب، اللى حيحبك ، حيحبك زى ما إنت و مهما كنت هو بيبقى شاريك و شايفك أحسن حد فى الدنيا.

بس للأسف الدنيا مبتبقاش كده مع كل الناس، يعنى فى ناس بتفضل تحب حد جدا و كل يوم بتتعلق بيه أكتر و يإما بيفاجئ إن الشخص التانى مش بيادله نفس مشاعره، يإما هو نفسه بيبقى خايف من إنه يواجه علشان ميتفجأش بالنتيجة أو حاسس إن النتيجة مش حتبقى فى صفه.

الموضوع بسيط جدا يا جماعة بس إحنا اللى بنصعبها على نفسنا، يعنى لو حضرتك معجب بحد و خايف تقوله كده و تبينله ده و مفكره هو حيحس لواحده، فده غلط جدا، و النصيحة هنا إنك لازم يكون عندك ثقة فى نفسك و متخفش يعنى لو إنت بتحب حد فبلاش تحب على نفسك كده و خليك شجاع و روح واجه و مش نهاية الدنيا يعنى لو مكنش بيقابلك بنفس الشعور و اتاكد ان طول ما إنت ماشى فى الدنيا حتشوف كتير و تحب و تتحب لحد ما نصيبك حيجيلك لحد عندك، اه هى الكابسة حتبقى وحشة إنما فى الاخر انت عرفت رايح فين وجى منين بدل ما تفضل مستخبى كده و عمال تتفرج، و ده كمان حيخليك توفر وقت و مشاعر طايرة فى الهوا على الفاضى.

فى مرحلة الرفض دى، و بعد المواجهة اللى حتحصل مع الطرف التانى، و لو هو قالك لأ صريحة و مفتحلكش بعدها أى باب، يا ريت بقى تبقى خفيف و تسحب نفسك من حياته و تحترم مشاعره، فبلاش بقى تحاول معاه و تقرفه فى عيشته علشان هو مش بيبادلك نفس مشاعرك، و بلاش كمان تجيلك افكار إنتقامية إنك تحاول تبوظله حياته أو صورته، لإن مش معنى إن حد معندوش مشاعر ناحيتك إنك حد وحش، فخليك واثق فى نفسك و إتأكد إن حتى توم كروز إترفض من بنات قبل كده، فمتخدش الحاجات دى على قلبك، و لو إنتى بنت كبرى دماغك أوى و بلاش الأفكار الجنونية اللى بتجيلك، يعنى بلاش بقى فكرة طب أنا حخيله يعرف قيمتى و اعرف سيد سيده و تتدبى و تتسرعى و تخشى فى علاقة كده و خلاص و تظلمى حد تالت ملوش ذنب و تظلمى نفسك لمجرد إنك مش قادرة تفهمى يعنى إيه حب.

و إعرفوا دايما إنك لو مكنش اللى قدامك بيحبك بنفس الدرجة اللى إنت بتحبه بيها أو أكتر، إن الحياة بينكم حتبقى صعبة، هو ممكن تكون وقتها بتحس بجرح كده و مشاعر مش حلوة و الدنيا بتقفل معاك، إنما إتأكد إن كل ده نصيب من عند ربنا و إنه ربنا لما بيبعد عنك حاجة إنت نفسك فيها، بيبعدها لسبب فى صالحك، و إنت مش حتفهم ده غير لما تمر بكام تجربة و تنضج معاها و تفكيرك يعلى مع كل تجربة فيهم، فحتتأكد وقتها إنك مش عيب إنك تحب بس العيب إنك تحب حد ميستاهلش حبك أو مش حاسس بيك، و الحب من طرف واحد ده بتضيع معاه طاقة ووجع قلب إنت أولى بيهم مع حد تانى، حد يستاهلك بجد.

تحياتى

هند مراد