إحسبها صح

اليوم الثمانون
إحسبها صح

لأن كل بداية و علشان توصل بتكون صعبة، فى شباب كتير و خاصة فى مقتبل حياتهم بيعانوا و بيكون صعب عليهم مواجهة البدايات، و مع الارتفاع الجنونى فى الاسعار و أن كل حاجة بقت بتجرى حوالينا بسرعة، فبقى مطلوب من شباب كتير حاجات كتير فى مستهل حياتهم، يعنى مطلوب يتعلم مهارات كتير علشان يواجه سوق العمل، يؤهل نفسه علشان لما يرتبط بحد، يساعده اهله فى بعض الأحيان، و غيره من متطلبات الحياة و أعباء كتير حتقع على عاتقه و هو لسة بيستقبل دنيا المسئولية.

و هنا بيجى أهمية حاجة مهمة جدا فى حياتنا كلنا و خاصة لو اتعودنا عليها و احنا فى بداية مشوار حياتنا، و هى ازاى ندخر، لإن الادخار ده عادة و لو معودناش نفسنا عليها مش حنقدر نعملها و احنا سننا كبير، طيب إيه نصايح الناس اللى  قبلنا علشان نعرف ندخر صح.

بصوا هو كان فى واحد اسمه وارن بافيت و ده أشهر مستثمر فى البورصة و ثالث أغني أغنياء العالم فى عام 2014، فكان ليه كده شوية نصايح تعالوا نستعرضها مع بعض علشان نعرف ندخر صح:
 اول نصيحة لوارن بافيت، فى دخلك، لا تعتمد على وسيلة واحدة و استثمر لتخلق مصدر آخر للدخل: يعنى ببساطة كده لو تقدر يكون عندك اكتر من شغل و خاصة فى بداية حياتك اعمل كده، أو لو كان مرتبك حلو ممكن تشيل منه جزء فى البنك أو تستثمره فى حاجة أو مشروع مضمون.

ثانى نصيحة، فى الإنفاق، اذا كنت تشترى ما لا تحتاجه فسيأتى عليك الوقت الذى تضطر فيه أن تبيع ما تحتاجه: ودى معناها أنك تبطل فشخرة كدابة و تعيش على قد امكانتياتك و على قد ما تقدر تعمل حساب لبكرة.

ثالث نصيحة،فى الادخار، لاتدخر ما تبقى بعد الإنفاق بل أنفق ما تبقى بعد الادخار، يعنى عود نفسك تتدخر و ادخر اكتر ما بتصرف، مش معنى كده انك تنتن على نفسك إنما معناه تحس بقيمة القرش، و انت حتحس بيه اوى لو بتتعب علشان تجيبه، بس انا فى الحتة دى من رأى انك توازن يعنى ادخر 20% مثلا و اصرف الباقى علشان متجيش على نفسك بزيادة، لكن لو عندك هدف مرتبط تحقيقه بفلوس فكده انت مضطر تيجى
 على نفسك علشان توصل لهدفك فى وقت اسرع.

 رابع نصيحة، فى المخاطرة، لا تختبر عمق النهر بكلا القدمين، يعنى لو حتستثمر فى حاجة جديدة و مجال انت مش على معرفة كاملة بيه، فبلاش تحط فيه كل فلوسك و  اختبر الأول بمبلغ صغير علشان لو لا قدر الله حيكون فى خسارة يبقى الخسارة متكونش كبيرة و النصيحة الخامسة شبه الرابعة شوية و هى فى الاستثمار، لا تضع البيض كله فى سلة واحدة.

أما آخر نصيحة، فى التوقعات، الأمانة هى هبة غالية جدا لا تتوقع أنها ستكون موجودة عند الناس الرخيصة، و دى معناها أن بلاش تثق فى ناس مش محل ثقة، و لا تبوح بأسرارك المالية لأحد ابدا إلا من كان محل ثقة بالنسبة لك، و تكون اختبرته قبل كده و متأكد من نزاهته.

الخلاصة، إن لما بيكون عندنا هدف و حطناه فى دماغنا و اشتغلنا بضمير عليه، حتلاقى الفلوس كده كده حتيجى و على قد تعبك فى الفلوس على قد ما خوفك على تعبك ده حيبان و حتحس بقيمته و حتعرف ازاى تحافظ عليه.
تحياتى
هند مراد