إزاى تدير مديرك

اليوم الواحد و الثمانون

إزاى تدير مديرك

هو الموضوع من إسمه يبان عكس اللى بيحصل و اللى إحنا متعودين عليه، يعنى إحنا علطول أخدين على إزاى المدير يدير الناس اللى تحت منه، إنما تعالوا كده فى البداية نفهم معنى موضوع النهاردة و نحلله مع بعض، إزاى تدير مديرك معناها إزاى توصل لدرجة من فهم لدماغه و تعرف هو محتاج إيه و تعمله، و مش معنى كده إنك تتسلطط عليه إنما توصل لدرجة من قمة القدرة على التواصل معاه و تعرف تخليه يسمعلك و يثق فى قرارتك.

طبعا الموضوع ده بياخد وقت و جهد و بيتطلب يكون عند الموظف مهارات كتير و من أهما مهارة التواصل و الذكاء الإجتماعى، و المهارات دى مبتكونش موجودة عند أى حد أو ممكن تكون موجودة عند حد بس هو مش عارف يستغلها و يوظفها صح، علشان كده فى حاجات بسيطة حانصحكم تعملوها علشان توصل لدرجة تفاهم مع مديرك اللى تقدر بيها تنجحوا مع بعض و تنجحوا البزينس كمان معاكم:

أولا و لو كنت لسة جديد فى الشغل، حاول تراقب مديرك على قد ما تقدر و يار يت تسمع أكتر ما تتكلم، و أفضل راقب فى صمت كده و إعرف إيه الحاجات اللى هو بيحبها و إيه الحاجات اللى بيكرها، و حاول تكتب ملاحظتك دى علشان متقعش حاجة منك و تقدر تفهمه بالشكل للازم.

بعد بقى ما راقبت و عرفت الحاجات اللى بيحبها مديرك، و عرفت إيه الحاجات كمان اللى محتاجها الشغل و المشاكل اللى موجودة فيه، حاول بقى و بشدة إنك تبقى حل للمشاكل دى، يعنى ركز أوى فى تفاصيل كل حاجة حواليك شوف إيه أهم حاجات محتاجة تتحل، رتب أولوياتك، شمر بقى و إنزل إشتغل بجد و إحرق نفسك لحد ما تحل المشاكل دى و لازم ده يبقى باين و ظاهر لمديرك، و إعرف إنك مش بتستعرض إنت بتحل بجد لإن لو كان هدفك الإستعراض بس، فحضرتك أكيد حتتكشف قريب، فلازم تكون بتشتغل و بإخلاص علشان تكسب ثقته و متقعش بسرعة.

من الطبيعى بقى لو هو شافك بتعمل كده إنه يحاول يقرب منك، و يديك بعض النصايح حتى لو هو ما إشتركش معاك فى أى حاجة بس لأنك بتسمعله ده كفيل إنه يخليك قريب من درجة الثقة كتير، و حتلاقيه بعد فترة مش كبيرة إبتدى يثق فيك وياخد رأيك فى حاجات كتير، فإنت لازم تكون محل للثقة و أوعى تتصرف بغباء فى أى موقف فى المرحلة دى لأن إنت بتبنى أساس الثقة و مينفعش صورتك تتهز.

بعد ما توصل لدرجة ثقة كفاية و أصبح بيعتمد عليك فى معظم الأمور و ده علشان مجهودك و إخلاصك اللى بجد مش المفتعل زى ما سبق ووضحت، هنا بقى حتكون وصلت لدرجة إنه ما بينفعش يعمل حاجة الا ما يرجعلك و إعتماده عليك هنا يقدر يوصلك إنك فى حاجات كتير و قرارات حتكون واقفة على قاعدة منك معاه، و بكده أقدر أقولك مبروك إنت كده بقيت بتدير مديرك، و أنا مش قصدى هنا سيطرة أو تحكم، إنما إنت بقى عندك قدرة عالية على فهمه و توقع ردود أفعاله أكتر من ناس كتير حواليك.

الخلاصة، إن إخلاصك و تعبك و مدى تحملك لشغلك خاصة فى بدايته، بتبنى بيه بعد كده راحتك و تقبلك لشغلك و حالتك النفسية فى المكان اللى بتشتغل فيه، لان فى ناس كتير بتصحى من النوم و كانها رايحة السجن مش رايحة تشتغل، و من كتر ان مفيش تفاهم مع مديرها ممكن تضحى بمكانها و أكل عيشها علشان بس مش عارفة تفهم دماغه. فقدرتك على التواصل و صبرك هما دول اللى حيخلوا حياتك العملية أحلى بإذن الله.

تحياتى

هند مراد