اليوم الخامس و الستون
غلظة القلب
بتقابلنا ناس كتير فى حياتنا عندها قدرة عجيبة فى أنها تشدنا ليها و من غير ما تبذل مجهود فى ده، ممكن يكون من الأسباب الرئيسية للشخصية الجذابة اللى بتشدنا ليها أنها عندها طولة بال و مبتسمة، و بتتعامل معانا برحمة و لسانها حلو كده، و لما يكون عندنا مشكلة اكيد اول حد بيجى فى بالنا نكلمه، هى الشخصيات اللى من النوع ده و تحسها غير أنها مريحة، إنما كتومة كمان، فده بيكون سبب كافى لأقبال الناس عليها و حبهم و ثقتهم في النوع ده من الشخصيات.
على العكس تماما، فى شخصيات كده سبحان الله بتقفلك أى باب مفتوح و هى بتكلمك، حتى لما بتطلب منك حاجة بتطلبها بعجرفة و قلة ذوق، وكأنك واجب عليك و فرض كمان انك تساعدها، و اكتر ناس بتكون قابضة للقلب كده، الناس اللى متعصبة و متشبسة برايها، يعنى شايفة نفسها هى اللى صح و الباقى كله ملوش لازمة، و لما تتكلم بتجبر الناس أنها تسمعها مش علشان بتقول كلام حلو إنما من كتر عنف الشخصية دي و فظاظتها.
و كتير كمان من كتر غلظة قلب الشخصية بينفر منها كل الناس، زى ابن عاق مثلا بابوه و امه، حتلاقى سبحان الله الناس بتكره و بتنفر منه و لو ربنا كرمه بولاد، بيطلعوا زيه تماما لا اكتر و لا اقل و بتلاقى نفس القصة بتتكرر، كمان من أشكال غلظة القلب، تمثيل الرجولة، يعنى تلاقى واحد ماسك مراته و هات فيها ضرب لمجرد مثلا أنها عملتله فطار و صحته من النوم يفطر، و لا ناس من كتر غلظة قلبهم و انعدام الرحمة، يروحوا رامين أهلهم فى دار مسنين و مكبرين دماغهم منهم، و لا يسألوا عليهم و لا يتقوا الله فيهم، و ده بيعتبر من أبشع أنواع غلظة القلب، كمان من غلاظة القلب، إنك تكون راجل و زى الشحط و تزق واحدة و انت ماشى علشان تعدى الاول، و لا تقعد و واحدة واقفة قدامك.
طبعا فى أشكال كتير من غلظة القلب ممكن افضل
احكيلكم عليه للصبح، بس الحل بيكون فى البداية و من التربية، يعنى ما تبقيش أم فاضلة و تميزى بنت عن ولد و انتى بتربيهم، و لا تعودى ولادك انهم يعتمدوا عليكى فى كل حاجة و ترجعى تشتكى أن بنتك و لا ابنك مش عارفين يشيلوا مسئولية بيت، و متفضلش تنفخ و تمرع فى ابنك و أول ما يشد حيله ويعرف يستقوى على حد يكون انت، فاتقوا الله فى تربية أولادكم و لو مش عارفين تربوا روحوا خدوا كورس أو متتجوزوش أو متخلغوش، و ده لمصلحتكم أولا، كمان لو عندك وجهة نظر و عايز تشاركها مع اللى قدامك، فا يا ريت تعمل ده و انت هادى و مبتسم و خليك مرن كده علشان اللى قدامك يتقبل كلامك و افتكر دايما قوله تعالى "لو كنت فظا غليظ القلب لانفضوا من حولك"
تحياتى
هند مراد
غلظة القلب
بتقابلنا ناس كتير فى حياتنا عندها قدرة عجيبة فى أنها تشدنا ليها و من غير ما تبذل مجهود فى ده، ممكن يكون من الأسباب الرئيسية للشخصية الجذابة اللى بتشدنا ليها أنها عندها طولة بال و مبتسمة، و بتتعامل معانا برحمة و لسانها حلو كده، و لما يكون عندنا مشكلة اكيد اول حد بيجى فى بالنا نكلمه، هى الشخصيات اللى من النوع ده و تحسها غير أنها مريحة، إنما كتومة كمان، فده بيكون سبب كافى لأقبال الناس عليها و حبهم و ثقتهم في النوع ده من الشخصيات.
على العكس تماما، فى شخصيات كده سبحان الله بتقفلك أى باب مفتوح و هى بتكلمك، حتى لما بتطلب منك حاجة بتطلبها بعجرفة و قلة ذوق، وكأنك واجب عليك و فرض كمان انك تساعدها، و اكتر ناس بتكون قابضة للقلب كده، الناس اللى متعصبة و متشبسة برايها، يعنى شايفة نفسها هى اللى صح و الباقى كله ملوش لازمة، و لما تتكلم بتجبر الناس أنها تسمعها مش علشان بتقول كلام حلو إنما من كتر عنف الشخصية دي و فظاظتها.
و كتير كمان من كتر غلظة قلب الشخصية بينفر منها كل الناس، زى ابن عاق مثلا بابوه و امه، حتلاقى سبحان الله الناس بتكره و بتنفر منه و لو ربنا كرمه بولاد، بيطلعوا زيه تماما لا اكتر و لا اقل و بتلاقى نفس القصة بتتكرر، كمان من أشكال غلظة القلب، تمثيل الرجولة، يعنى تلاقى واحد ماسك مراته و هات فيها ضرب لمجرد مثلا أنها عملتله فطار و صحته من النوم يفطر، و لا ناس من كتر غلظة قلبهم و انعدام الرحمة، يروحوا رامين أهلهم فى دار مسنين و مكبرين دماغهم منهم، و لا يسألوا عليهم و لا يتقوا الله فيهم، و ده بيعتبر من أبشع أنواع غلظة القلب، كمان من غلاظة القلب، إنك تكون راجل و زى الشحط و تزق واحدة و انت ماشى علشان تعدى الاول، و لا تقعد و واحدة واقفة قدامك.
طبعا فى أشكال كتير من غلظة القلب ممكن افضل
احكيلكم عليه للصبح، بس الحل بيكون فى البداية و من التربية، يعنى ما تبقيش أم فاضلة و تميزى بنت عن ولد و انتى بتربيهم، و لا تعودى ولادك انهم يعتمدوا عليكى فى كل حاجة و ترجعى تشتكى أن بنتك و لا ابنك مش عارفين يشيلوا مسئولية بيت، و متفضلش تنفخ و تمرع فى ابنك و أول ما يشد حيله ويعرف يستقوى على حد يكون انت، فاتقوا الله فى تربية أولادكم و لو مش عارفين تربوا روحوا خدوا كورس أو متتجوزوش أو متخلغوش، و ده لمصلحتكم أولا، كمان لو عندك وجهة نظر و عايز تشاركها مع اللى قدامك، فا يا ريت تعمل ده و انت هادى و مبتسم و خليك مرن كده علشان اللى قدامك يتقبل كلامك و افتكر دايما قوله تعالى "لو كنت فظا غليظ القلب لانفضوا من حولك"
تحياتى
هند مراد
.jpeg)
No comments:
Post a Comment