كان نفسى فى كلب

اليوم المائة و ثلاث

كان نفسى فى كلب

موضوع النهاردة عن صفة بنلاقيها فى حيوانات كتير و يمكن نتعلم منهم كمان إزاى الصفة دى تبقى عندنا، صفة جميلة أوى و اللى عنده الصفة دى أكيد أخلاقه بتكون عالية أوى، الصفة دى هى الوفاء، و طبعا أول حيوان بيجى فى بالنا لما نقول كلمة وفاء هو الكلب.

طيب يعنى إيه وفاء، وفاء يعنى إنك تحس باللى قدامك و تخلص له و تفضل حواليه حتى لو مطلبش منك كده و لو عمل فيك معروف حتى و لو صغير بتفضل شايلهوله و صاين العشرة و الإحسان طول الوقت، هو ده ببساطة معنى كلمة وفاء، يعنى بصوا كده على الكلب حتلاقيه بجد أحسن رمز للتعبيرعن الكلمة دى، لو صاحبه سابه و نزل يفضل يهوهو لحد ما نفسه يتقطع و أول ما يشوفه يطلع يجرى عليه و يفضل يطنطط و يجرى حواليه كأنه لقى كنز مش صاحبه، لما صاحب الكلب يتعب، بتلاقى الكلب قاعد زعلان و تحت رجل صاحبه و مش عايز يفارقه و يمكن كمان ما ياكلش إلا لما صاحبه هو اللى يأكله، و مهما كان شقى و عايز يطنطط إنما لو صاحبه قاله أقعد حيسمع كلامه و يقعد، لو إتعلق بيك و فكرت فى يوم توديه لحد تانى، شوف قد إيه حيفضل مكتئب و ممكن يموت لأنه بعيد عنك، هو ده الوفاء.

تعرفوا إن بجد كان نفسى أوى يكون عندى كلب و ألاقى كل الإهتمام و الوفاء ده منه، بس بحس إنى مش حكون قد المسئولية،  يعنى لازم أفسحه، لازم أكون موجودة معاه بإستمرار، لازم أوفرله العيشة اللى يستحقها، و بجد أنا ظروفى صعبة شوية على إنى أتحمل مسئولية بالشكل ده، بس إحساسى بالكلاب و الفرحة اللى بتبقى فى عنيا كل ما شوف كلب مش عارفة اكتب كلام عليها بصراحة، إحساس حلو أوى لما تشوف حد نقى أوى كده و بيحبك علشانك مش علشن حاجة تانية.

تعالوا بقى للبنى ادمين، شوف كده كم الوفاء و الإخلاص اللى حيظهر فيهم لما يحتاجوا منك حاجة .. يا سلام.. محلسة إيه، كلام ملزق إيه، و هووووووووب أول ما تخلص الحاجة اللى كانوا عايزينها منك، تلاقيهم فص ملح و داب و ممكن كمان تلف الأيام و تحتاج منهم حاجة حتى لو كانت بسيطة، و لا يعبروك، إنت حتى ممكن تتعب و لا حد منهم يرفع سماعة التليفون عليك، طبعا إلا من رحم ربى أنا مش بعمم و لكن السائد بقت النوعية دى من الناس.

عرفتوا قد إيه الكلاب دى جميلة و يمكن أحسن من ناس كتير مننا، فأنا بطلب منكم لما تيجى تشتم حد بلاش تقوله إنت كلب و لا إبن كلب و لا أى حاجة لها علاقة بالكلب، لأن بجد إنت كده بتمدحه مش بتشتمه و ياريت برده اللى عنده كلب يشرح لصحابه البنى ادمين قد إيه هو فى نعمة و يحكيله عن وفائه يمكن الصاحب ده يتعلم منه إزاى يكون زيه و لا حتى نصه.

تحياتى

هند مراد