الفنكوش

اليوم المائة و ست

 الفنكوش

 فى حاجات كتير بقت بتحصلنا و من الحاجات اللى بقت بتحصل كتير و فى الظروف اللى بنعيشها فى الفترة الأخيرة، بقينا بنقابل ناس كتير من النوع الهجاس، اللى هو السيط و لا الغنى، يعنى يفضل ماسك ودنك و أدي هجس من هنا للصبح.

 الناس دى ممكن تشوفها فى واحد إعلامى متعاقد مع قناة معينة و ماسك ودن الناس و هات هجس شمال و يمين، و ده طبعا اكتر نوع احنا عارفينه و منتشر، كمان ممكن تلاقى النوع الهجاس ده فى راجل سياسى، يفضل يوعد و يوعد و كله هجس × هجس و لا حاجة بتتحقق و عمال بس يهجس ليل و نهار و انا بنهار و كده، ممكن تلاقى النوع ده كمان من الناس فى صحابك، اللى هو يفضل ماسك ودنك و يلا بينا نعمل كذا و كذا و نروح هنا و هناك و أول ما يجى وقت التنفيذ، تلاقيه فص ملح و داب، كمان ممكن تلاقى النوع ده من الناس فى مديرك فى الشغل، يفضل يقولك خلص ا task دى وحنقلك نقلة تانية خالص و لا اعمل ال project ده و حرقيك و ازودلك مرتبك و لا خلص الشغل ده و الشركة حتروح فى حتة تانية خالص و لا فى كوكب تانى اصلا، و فى الآخر و لا حاجة بتحصل و انت مكانك و الشركة مكانها محلك سر، و طبعا حتلاقى الشخصية الهجاسة الفنكوش دى فى أشكال و أماكن مختلفة، انا قلتلكم بس أمثلة منها و لكن العدد فى الليمون و حدث و لا حرج. إزاى بقى حضرتك تتعامل مع الشخصية الهجاسة الفنكوش دى، اغلب الشخصيات الهجاسة دى بيكون دمها خفيف و اجتماعية و لها Fans كتير و لكن ده برده مش حيمنعك انك تلاقى طريقة انك تتعامل معاها.

و من أهم الحاجات اللى تعملها علشان تعرف تتعامل مع الشخصية الهجاسة انك متجاملوش، يعنى لو كان بيهجس اسمع منه و مش لازم تسيحله بس متجاريهوش فى الكلام و سيبوا يتكلم و يفشر و خلى وشك من غير انفعالات كده و متريحوش بأى تعبير فى وشك و إفتكر تانى اوعى تجاريه، و علشان هو كداب و انت متاكد من كده تجنب التعامل معاه فى حاجات مهمة زى شغل أو جواز أو غيره، و اوعى اوعى تصدق و تامنله، اسمعه اه، إنما الل تسمعه من الودن دى طلعت من الودن التانية، و لا كأنك سمعت حاجة أبدا و لو عرفت متجاملوش يبقى انت كده 100 100 ، يعنى سيبه يرغى و خلاص فى أى كلام و لا تناقشه حتى و لا تجادله.

 يعنى تجاهل كل حاجة بيقولها تماما و فى المطلق. و لو انت بتشتغل مع حد من النوعية دى، خلى بالك جدا لان ممكن يوديك فى داهية من فشره و لو بسلامة نية فدايما خليك مصحصح معاه و اوعى يحطك فى جملة مفيدة يعنى دايما خليك حويط معاه و تقيل فى كلامك و اسمع بس و اوعى تديله أى معلومة. و بكده تقدر تعيش و تتعايش مع الشخصية الفنكوش بسلام و بهدوء، و اعرف ان مهما كان الشخصية اللى قدامك صعبة أو غريبة، بس اكيد ليها مفاتيح علشان تعرف تدخلها، و الدنيا مليانة ناس حتتعامل معاهم مش شبهك، فعلشان حياتنا تبقى أسهل لازم على الأقل نعرف نتعامل مع اللى حوالينا.

تحياتى

هند مراد