قصة حياة مؤسس موقع Pay Pal إيلون ماسك

اليوم المائة و ثمان

قصة حياة مؤسس موقع Pay Pal إيلون ماسك

يمكن قبل كده شاركت فى عمل ملخصات لبعض الكتب المشهورة اللى ممكن تفيدكم فى مجال الأعمال أو الإدارة، و تكملة للمشاركة دى النهاردة حلخصلكم قصة حياة إيلون ماسك و اللى بيعتبر من أشهر الأسماء المشهورة فى عالم التكنولوجيا.

مين هو بقى إيلون ماسك؟

إيلون ماسك ولد فى عام 1971 فى جنوب إفريقيا من أم كندية و أب من جنوب إفريقيا، و بقى مليونير و هو عنده 20 سنة، تخيل بقى قد إيه إيلون ده شخصية عبقرية، و من مظاهر عبقريته اللى ظهرت عليه بدرى إنه إبتدى يدرس و يطور قدراته فى علم الكمبيوتر و الحاسوب من و هو عنده 10 سنين، غير كمان إنه إتعلم لغة البرمجة و هو فى السن ده، و صمم لعبة إسمها Blaster أو بلاستر يعنى بالعربى.

و هو فى سن المراهقة درس فى جامعة بنسلفانيا و بعدها إتخرج و إتنقل للعيش فى كاليفورنيا علشان يدرس طاقة الفيزياء بجامعة ستانفورد وكان عايز يعمل فيها دكتوراة ، و لكن فى نفس الوقتأ إعلنوا عن إنبثاق شبكة الإنترنت، فساب الدكتوراة و أسس شركة إسمها ZIP2 ودى عبارة عن دليل إلكترونى  للمواقع المحلية و حققت شركة ZIP2 دى نجاح هايل لدرجة إن فى شركة كبيرة إسمها Compac قررت تشتريها بمبلغ 341 مليون دولار منهم 34 مليون دولار فى شكل أسهم.

و فى سنة 99 برده، إيلون أسس و شارك فى شركة إسمها x.com و بعد سنة إندمجت الشركة مع شركة تانية إسمها Cnofinity و الشركتين معروف إسمهم دلوقتى ب Pay Pal، و سنة 2002 شركة Ebay  إستحوذت على شركة Pay Pal مقابل 1.5 مليار دولار.

تفتكروا إيلون يقف طموحه عند كده بس و على الرغم من نجاحاته دى كلها، إلا إنه كمان فى نفس السنة اللى هى 2002 أسس شركة تكنولوجيا الفضاء SpaceX بهدف بناء مركبات للرحلات الفضائية التجارية و علشان النجاحات اللى حققتها شركة ،SpaceX فى 2008 إستغنت وكالة NASA الفضائية عن مكوكها الفضائي واتعاقدت مع Space X لنقل المئونة والمعدات لمحطة الفضاء الدولية ISSو الشركة كمان بتنوي نقل رواد الفضاء في المستقبل.

كمان عمل إيلون ماسك حاجة جامدة جدا و هى تأسيسه لأول شركة سيارات كهربائية الأكثر أمانا في العالم (Tesla) بتكلفة أرخص بكتير من سيارات البنزين والوقود وفيها ايضا خاصية التعليم الذاتي والقيادة الذاتية و تسير لمسافة تتجاوز  200 ميل على شحنة بطارية واحدة، و  فازت السيارة TESLA  بجائزة سيارة العام 2013 من قبل مجلة موتور تريند Motor Trend .

وفي عام 2013 حققت شركة Space X إنجازضخم بإستخدام صاروخ فالكون 9 لوضع قمر صناعي متزامن مع الأرض ضمن مداره. وفي 2015 أطلقت الشركة صاروخ فالكون 9 أخر حمل على متنه قمر ديسكفر DSCOVR الصناعي، كمان الشركة فى 2017 نجحت في تحقيق عمليه إطلاق وهبوط ناجحين لصاروخ فالكون 9 تم تصنيعه من أجزاء قديمة قابلة لإعادة الإستخدام    .

كمان من إنجازات إيلون إنه وضع خطط شاملة لنظام نقل جديد شبيه بالقطار ولكن بإمكانه الدوران حول  العالم  في 7 ساعات و بتكلفة أرخص من بناء القطار بكتيروسيبدأ بتنفيذ أول تجارب له.

و الجميل بقى فى إيلون ماسك إنه إعتمد على التعليم الذاتى و علم نفسه بنفسه علشان يحقق كل الإنجازات اللى شرحتهلكم دى، و ده ممكن نتعلم منه إنه مش شرط حضرتك تاخد ماجستير و لا دكتوراة فى جامعات غالية علشان توصل للعلم، العلم موجود فى كتب كتير و دلوقتى بقى موجود فى مواقع كتير، فلو إنت عايز توصل إتعب شوية و دور على العلم اللى ينفعك فى شغلك و حياتك.

تحياتى

هند مراد