باى باى 2018

اليوم المائة و واحد و ثلاثون
باى باى 2018

يمكن يكون عندنا احاسيس و مشاعر ملغبطة كده مع كل سنة بتفوت من عمرنا، إحساس انما كبرنا، سنة عدت، سنة راحت،  سنة جاية، و العداد بيعد، و كل ما بيعد اكتر، كل ما بيزيد معاه توتر كتير مننا.

بس سبحان الله، زى ما كتير مننا بيتوتر، فى مننا برده ناس بتكون متسامحة مع نفسها، شاكرة و حامدة لكل لحظة بتعدى فى عمرها، بتستفيد من كل موقف بيعدى عليها فى حياتها، واثقة فى أن ربنا عمره ما حيضيع تعبها، طيب دى ناس حلوة اوى، ازاى بقى نقدر و احنا فى اخر يوم فى السنة نستقبل سنة تانية من عمرنا و نستعد أن شاء الله لسنة جديدة تبقى احسن من اللى فاتت.

أولا، لازم نشكر ربنا على نعمه الكتير و لو فى حاجات حصلت على عكس توقعتنا، برده نشكره و نحمده و نعرف أن الاختبارات اللى ربنا بيحطنا فيها، كلها خير لينا، ممكن تكون السنة اللى احنا فى اخر يوم فيها كانت صعبة علي ناس كتير  و انا منهم، بس الدنيا كده يوم حلو و يوم وحش و كله نعمة من ربنا و فضل، المهم الحاجات الصعبة اللى بتعدى علينا لازم نستفيد منها و نتعلم من المواقف الصعبة دى، و كل مشكلة بتقابلنا نتعلم معاها حاجة جديدة، فنعرف كده إن الحياة مدرسة و الشاطر اللى يتعلم منها.

ثانيا، اتعلم تبص على نص الكوباية المليان، يعنى مهما كان الموقف صعب خده على أنه تحدى و قاوم و تفاءل بالخير تجده، و خلى دايما عندك أمل فى بكرة اللى جاى، و متقفش عند موقف صعب مريت بيه، لانه كده كده حيعدى سواء تقبلته و لا متقبلتوش.

ثالثا، و دى أهم نصيحة منى، حاول تتغير و تغير من نفسك، يعنى متدريش عيوبك على نفسك، فلو كنت بتداريها على اللى حواليك، خليك على الأقل صريح مع نفسك، يعنى لو كنت انانى، حاول واحدة واحدة مع نفسك كده انك تحس باللى حواليك و درب نفسك على كده، مبقلكش انك حتعرف تعمل كده فجأة، إنما بالتعود و مصارحة النفس حتلاقى نفسك بتقدر تتغلب على الصفات الوحشة اللى فيك.

رابعا، اوعى تعيش فى الماضى، خلى الماضى فى الماضى،  اللى حصل حصل و فى حاجات تانية كتير حتحصل، فسيبك من اللى عدى و فات و خليك فى الجاى و اللى حيجى.

خامسا، حب الحياة، ايوة حضرتك حب الحياة، الحياة حلوة بكل حاجة فيها، بتبقى صعبة احيانا، بس حلوة، عيشها بكل حاجة فيها، و اعرف ان الحلو جاى جاى، بس انت اعمل حلو حتلاقى الحلو بيخبط على بابك و مهما طال الهم، فى يوم حتفرح، فعيش دايما على أمل أن فى يوم حلو جاى.

الخلاصة، 2018 خلاص باى باى، 2019 جاية و أهلا و سهلا، كل اللى عند ربنا و شايلهولنا خير لينا، و اللى عدى عدى على رأى عمرو دياب، نركز بقى فى اللى جاى، نخلى عندنا أمل، نشكر ربنا، و كل سنة و كلكم طيبين.

تحياتى
هند مراد

الناس المغيبة

اليوم المائة و ثلاثون
الناس المغيبة
فى ناس كتير بنتعامل معاها و بنشوفها حوالينا طول الوقت، الناس دى بتحاول تدينا طاقة ايجابية، و ده فى حد ذاته حاجة حلوة جدا، أن حد يكون مصدر سعادة ليك و يحاول يديك طاقة إيجابية و يخلى مودك أحسن، بس امتى بقى الموضوع ده بيبقى مش حلو، تعالوا نستعرض كده إن ازاى ممكن يكون فى ناس بتنشر طاقة إيجابية وهمية و مضرة.

الأول تعالوا نعرف ايه هى الطاقة الإيجابية الوهمية، الطاقة الإيجابية الوهمية، دى عبارة عن كلمتين مزيفين و منمقين كده واحد ملزق حافظهم و بيلف بيهم على الناس علشان يشتغلهم بحجة أنه راجل ايجابى و بيحب ينشر الطاقة الإيجابية على الناس اللى حواليه، زى مثلا لما دكتور بيدرس مادة معينة، و يفضل يقول للطلبة على قد ايه هو عظيم و قد ايه أن المادة اللى بيدرسها دى سهلة و إنه حل امتحانها و هو مغمض لما كان فى سن الطلبة، و كل محاضرة يفضل يتكلم عن إنجازاته و اعجازاته و ينسى المنهج لأنه تافه و سهل و بسيط و كل الطلبة تبدى تصدق من كتر اللى هو عمال يقوله فى ان المادة سهلة و مش مستاهلة شرح و لا مذاكرة و الطلبة عايشة فى الطاقة الإيجابية الوهمية و سايبة المذاكرة لحد و فجأة بيجى يوم الامتحان، اليوم اللى بيفاجئ فيه الطلبة أن كل اللى اتقالهم كدب× كده، الله ده حتى مش كدب ده عدى الكدب بكتيييييييييييير ده سراب و وهم و فطشة و فنكوش، هو ده باختصار معنى الطاقة الإيجابية الوهمية.

نيجى بقى للناس المغيبة، مين هى الناس المغيبة، الناس المغيبة هى الناس اللى بتصدق فى الطاقة الإيجابية الوهمية، الناس الضعيفة اللى أى حد يقدر يضحك عليهم بكلمتين، الناس اللى بتاخد المعلومة كده زى ما هى و من غير متشغل عقلها و تفكر، و تستخدم الحاجة إلى ربنا خلقها فينا و ميزنا بيها على بقية مخلوقاته. يعنى ممكن جدا بيوت تتقفل و علاقات تبوظ و شركات تنهار بسبب الطاقة الإيجابية الوهمية و الناس المغيبة، فتلاقى مثلا  لو انت شغال فى شركة و ناس مسيطرة فيها و اخدين مناصب حلوة، تلاقى الناس دى عمالة تدارى على غلط اللى تحتها و تبين الصورة حلوة و فلة شمعة منورة لصحاب الشركة، و كل ما صحاب الشركة يسألوا على حاجة، الناس دى تفضل تسوق و تجمل و تدارى فى حقايق ممكن تودى الشركة فى داهية و أن لو كانت الناس دى صارحت صحاب الشركة من الأول و محاولتش تذوق الواقع، كان الوضع اتلحق و  الشركة مغرقتش، بس ده مش ذنب الشخص المنمق بس، إنما كمان ده ذنب الشخص اللى سمح لنفسه يبقى مغيب، و ينفصل عن الواقع و يدى ودانه لغيره، و سمح لنفسه أنه يبقى فريسة سهلة لمجرد أنه مش حابب يسمع مشاكل و عايز فى فقيعة لوحده و وهم  زائف، زى بالضبط لما واحد يكون بيخون مراته و علشان يغيبها يفضل يقولها فى كلام مزيف و يجيب لها فى هدايا و يخرجها و كل ده كدب × كدب و  وهم × وهم.

علشان كده جميل انك تثق فى اللى حواليك، بس الاجمل أن الثقة تبقى مبنية على وقائع و دلائل و اختبارات حقيقية توضحلك معدن الناس اللى حواليك، يعنى لما تدى ثقتك لحد، اتأكد انك ادتها للشخص الصح، و دايما فكر و فكر و شغل عقلك، مش حتخسر حاجة بجد لو شغلته بالعكس حتكسب كتير اوى و أول حاجة حتكسبها هى نفسك و حتحمى نفسك من انك تبقى فريسة سهلة لغيرك  و انك تبقى مغيب عن الواقع اللى حواليك.

الخلاصة، الطاقة الإيجابية دى حاجة جميلة بس متخليش حد يخشلك بيها غلط، يعنى فرق بين الناس الإيجابية و الناس الوهمية و دايما دايما دور على الحقيقة و متديش ودنك لحد بسهولة، التغيب ده اختيار و لو انت اختارت تبقى مغيب ... تبقى اخترت نهايتك بايدك و ما تلومش حد غيرك.

تحياتى
هند مراد 

ضحكة أمل

اليوم المائة و التاسع و عشرون
ضحكة أمل
ساعات كتير الدنيا بتكون مقفلة فى وشك، بس بتحصلك حاجات ممكن تكون بسيطة اوى بس بتقلب الدنيا و تخليك فى مود احلى، يعنى ممكن تبقى متضايق و يعدى بيبي صغير يضحك لك أو يطلعلك لسانه فيخليك تفتسط على نفسك من الضحك و تلاقى نفسك مهما كنت مكشر إنما حاجة بسيطة زى ضحكة الطفل البريئة دى طلعتك من المود.

و على فكرة ساعات الحاجات البسيطة اللى ممكن متجيش على بالك انك تعملها هى اللى ممكن تديك أمل و نظرة مختلفة للحياة، يعنى على قد ما تقدر بسطها على نفسك و عيشها ببساطة، اعمل حاجة مختلفة تدخل فرحة لقلبك، يعنى جرب يوم اجازتك كده تصحى بدرى و تروح دار مسنين و لا دار اطفال أيتام و حتى لو ظروفك المادية مش قد كده حاول تطلع مبلغ و لو بسيط، و اتبرع بيه و لو الظروف المادية مش قد كده، يبقى انك تقضى يوم فى دار المسنين أو دار الأيتام يبقى احسن حل، علشان انت كمان ينفع تتبرع بوقتك و تقعد مع ناس كل حلمها أنها تتكلم مع حد و تفضفض له، كمان لو روحت جمعية خيرية و عملت عمل تطوعى بيتطلب منك بس مجهود بدنى، دى حاجة حتخليك مبسوط و حتحاول الطاقة السلبية اللى عندك لطاقة إيجابية و تشيل أى تفكير ممكن يجى فى بالك و حتحس براحة نفسية كبيرة.

ساعات كتير بجد مجرد إحساسك بحد محتاجلك و مشاركته بيخفف عنك أى حاجة أو شعور سلبى عندك، و بتحس انك ممكن تكون مصدر و سبب سعادة و ده لوحده كفيل انه يبعتلك ضحكة فى وشك، ضحكة كلها أمل فى أن فى حاجة حلوة حتحصل، زى ضحكة الطفل اللى ميعرفكش بس مجرد انه ابتسملك غير  كل حاجة و نساك أى حاجة ممكن تكون مزعلاك.

أقنع نفسك فى كل يوم و انت بتفتح عينك أن كل صبح بيجى معاه أمل جديد، فاستنى الصبح اللى معاه امل، اللى معاه صوت عصافير و حياة مستنياك تعيشها، تعيشها بروح حلوة بضحكة صافية، امن بالأمل حيجيلك و حيتحقق بإذن الله. 

إن يبقى فى ناس بتدى لبعض ضحكة أمل دى حاجة حلوة اوى، و الاجمل ان إحساس الأمل ده بتغير بيه روحك و بتدى نفسك دافعة لقدام، دافعة تخليك تحس أن بكرة ممكن يكون احسن، احسن علشان انت مؤمن بكده، مؤمن أن بعد كل ليل و عتمة بيجى نهار و نور و حياة حلوة، يمكن تكون حاجات فاتتك و حاجات جت بس مش فى وقتها، إنما فى حاجات جاية اجمل و اجمل.. عيشها ببساطة حتشوفها بتضحكلك ضحكة أمل.

تحياتى
هند مراد
 


     

كأنه حلم

اليوم المائة و الثامن و العشرون
 كأنه حلم
فى طريق الحياة و احنا ماشيين و بنعافر و بنجرى شمال و يمين، بتعدى علينا حاجات صعبة علينا نتحملها، أوقات صعبة اوى، حاجات تقيلة على القلب و على العقل حتى أنه يستوعبها، و مهما طال الهم و الحزن اللى بيعدى علينا، بيكون فى أوقات فيها كرم كبير و فضل من المولى سبحانه و تعالى.

 جربت كده تعدى بموقف و اختبار من ربنا و من شدة الاختبار و صعوبته بتحس أن ضهرك محنى، بتحاول تقوم تقف بس الحمل أكبر بكتير من قوة ضهرك، و كل ما خلاص قربت تفرد ضهرك، تلاقى الحمل بيزيد اكتر و اكتر، بتحس بأنك مخنوق.. وحيد.. عاجز ...كل حاجة صعبة و تخلص حمل، يترمى عليك حمل تانى، صعب اوى الاحساس ده صح، بس اكيد مريت بيه مرة أو كام مرة فى حياتك، و الزمن و الناس و الوقت اللى احنا فيه، بقوا صعب اوى علينا، إحساس الأمان بقى صعب اوى بجد و اللى حاسس بيه فى نعمة من ربنا، الثقة فى النفس و الثقة فى الناس بقوا اصعب، بس سبحان الله فى وقت المحن ده، كل ثقة حواليك بتتهز الا ثقتك فى الله بتفضل تزيد و تزيد علشان عارف و متأكد انه رحيم رؤف غفار ، بيدنا مع كل اختبار و صبر بنصبره جزاء.

اصعب بقى حاجة  فى أوقات الاختبار دى هو تعايشك مع الموقف نفسه، و تصديقك أن ده حصلك فعلا، ساعات كتير و ناس كتير بتخش فى أمراض كتير لعدم قدرتها على استيعاب و تعايش مع الأزمة اللى مرت فى حياتهم، و اكتر الأمراض النفسية بتيجى من أن حد أتعرض لازمة صعبة فى حياته و معرفش يتعامل مع الأزمة دى و يعيش معاها، زى مثلا لما واحدة تكون وثقت فى حد اوى و بعدين تلاقيه خاين و حب واهم، و أن الصورة اللى كانت بترسمها له فى خيالها كانت وهم كبير و كدبة اكبر، و لا لما واحدة تكون متجوزة و بتحب جوزها جدا و يطلقها علشان عرف واحدة تانية، تخيل الإحساس و وجع القلب اللى ممكن تحس بيه واحدة وثقت فى واحد و اديته حياتها و امنته على نفسها و طلع واطى، إحساس صعب حد يتعايش معاه و يصدقه بس بيحصل، و لا لما تفقد حد قريب منك، حد كان اقربلك من نفسك، صاحب عمرك اللى قضيت معاه أحلى و أوحش أيام حياتك، بير اسرارك، اللى لما كنت بتفضفض معاه بس بتقوم واحد تانى و نفسية تانية، انسان هو لوحده بس اللى معاه مفاتيحك و بيعرف يبسطك، حاسس بمدى الألم و الأسى اللى ممكن يحس بيه انسان لما يفقد صاحب عمره، مات و راح و مش حيجى تانى ده الواقع، بس عند صاحبه مش عارف هو بيحلم و لا ايه، لا صاحبه هناك و جاى تانى، ده بس سافر و جاى علطول، ايه ده ... وجع و إحساس بحرقة قلب مش عارف تستوعبها.

تفتكر ربنا مش عارف انك بتتالم. .. تفتكر اللى خلقك و نفخ فيك من روحه مش حاسس بيك... تفتكر أن ربنا مش حواليك... اكيد ربنا حاسس بكل حد فينا، أكيد ربنا له حكمة أكبر بكتير من الأزمة اللى حطك فيها، أكيد إن انت لو اطلعت على الغيب كنت حتختار الواقع، قرب من ربك، ادعيله، امن بيه، حس برحمته و كرمه عليك، حتعرف أن ربك رب حكيم .. كريم بعطاءه بس بيحبك فإبتلاك بيخليك تقرب منه.

الخلاصة، مهما كانت الظروف اللى حواليك صعبه أو الأزمة اللى بتعدى عليك، قرب من ربنا علشان إيمانك بيه هو اكتر حاجة حتقويك و تخليك تعيش مع الأزمة لحد ما تعدى منها بإذن الله، و ربنا يبعد عنا و عنكم كل شر.

تحياتى
هند مراد  

وهم الكراش

اليوم المائة و سبعة و عشرون
وهم الكراش
الحب كلمة حلوة اوى و سهلة، بس صعوبتها فى مضمونها، يعنى اللى يقولك بحبك بس من غير ما أفعاله توضح كده يبقى ده انسان هجاس و كداب كده الإبل.

فى ترند اهبل كده منتشر بين البنات اليومين دول و كلمة ملزقة كده كل بنت عاملة نفسها ستايل عمالة تقولها، و هى كلمة كراش، الكراش راح.. الكراش جه، الكراش كح، الكراش محن و كلام من النوع اللى يعلى الضغط ده، و تيجى حضرتك تبص للكراش ده تلاقيه عيل بأوصة و ملزق كده و بنطلونه واقع و معندوش صحة يرفعه، و لا الكراش دى لو بنت تلاقيها من النوع الشمال اللى بتشربلها علبتين سجاير فى اليوم و مصاحبة 1/2 و لاد الحتة و بتدخل بيتهم الفجر بحجة أنها عميقة و Open minded.

و لو ركزت حضرتك شوية كده و شيلت التفاهة من جواك، و بصيت على كراشك ده بطريقة عقلانية شوية، ممكن ترجع اللى بطنك من القرف و السطحية اللى انت فيها، يعنى الراجل يبقى كراش لما يبقى راجل بجد، ينفع يشيل مسئولية و يكون سند للبنت اللى معاه، و أفعاله أحلى بكتير من كلامه و شكله الملزق .. يعنى راجل بكل ما تحمله الكلمة من معنى أفعالا و شكلا، و كذلك البنت، فالبنت الكراش دى، هى البنت اللى ينفع تكون مسؤل منها اطفال، يعنى عندها مبادىء و أخلاق و جدعنة ينفع الراجل يتباهى بيها أنها أم ولاده، مش أم بسجاير و لا شيشية، و لا بتسهر مع ناس مشبوهة، يعنى بنت متربية صح و الخجل جزء منها، مش قبيحة و لسانها مفلقط مع أى حد.

فنصيحة لكل واحد أو واحدة و هما بيتحدف على حد، علشان شكله و عمقه و لا استايله المختلف، بلاش سطحية و فوق، النوع ده من الناس، نوع مقرف و الله انت تقرف حتى تمد ايدك تسلم عليه أو تجرى تغسلها بعد ما تسلم عليه، دايما فكروا بعقلكوا، و تخيل ما بعد مرحلة الاعجاب، يعنى حضرتك الواد الكراش ده، لو دخلتى فى علاقة معاه، حيحرقلك دمك كام مرة فى اليوم من البنات اللى بيعرفها و حيفضل لاممهم حواليه طول الوقت، و لا لما يعرف انك مدلوقة عليه و هبلة و بريالة حيستغلك ازاى، و لا تفتكرى حياخد علاقتكم دى على محمل الجد و هو متأكد انك بتموتى فى سطحيته و
إنه مهما عمل انت معمية علشان الثقة الزايدة اللى انتى زرعتيها فيه من كتر حدفتك عليه، فوقى بقى و إعرفى إن النوع ده مش من النوع المعمر اللى يفتح بيت، ده كبيره يروح   يشترى لبنان و يرجع ضهره واجعه.

الخلاصة، و انت أو انتى بتختاروا شريك حياتكم فكروا بعقلكم، و الله ربنا ميزنا بيه عن الحيوانات و مخلوقات تانية كتير، فكروا فى استاذ/ة كراش ده، فيما بعد الكراش period، هو الكائن ده ينفع يشيل مسؤلية و لا شكل على الفاضى، هو الكائن ده بيحبنى زى ما انا متنيل على عينى و بحبه و لا بيشتغلنى، فكروا بعقلكم تكسبوا و الله.

تحياتى
هند مراد
      

إدارة التغيير فى المؤسسات

اليوم المائة و السادس و عشرون

إدارة التغيير فى المؤسسات

قبل إلقاء الضوء على إدارة التغيير و الأيدولوجية الخاصة لعمل ذلك، دعونا نتطرق لمعنى إدارة التغيير فى المنشأت،

إدارة التغيير هو النظام التى تضعه المنشأة من أجل التحول من النظام الحالى والقائم إلى وضع جديد ترغب المنشأة فى الوصول إليه و الذي يتطلب معه إعداد وتجهيز ودعم للأفراد و النظم للوصول إلى التغيير المنشود، و ذلك لتحقيق أهداف معينة أو لتحسين الوضع الحالى بالمنشأة.

و عند قيام المنشأة بالبدء فى تنفيذ إدارة التغيير، قد تصادم ببعض المعوقات و من أهمها:

•  مقاومة أفراد المنشأة للتغيير بحجة أن تغيير نظم تم التعود عليها قد تعرض المنشأة لبعض المخاطر.

• غياب وعى الإدارة العليا بأهمية التواصل الجيد مع أفراد المنشأة و عدم قدرتها على توصيل أهداف التغيير بشكل واضح.

•  فرض نظم التغيير بشكل سلطوى و ليس قيادى.

• غياب الرؤية لدى الإدارة العليا حيث قد تبقى جهود التغيير مقتصرة على وجود قائمة من المشروعات المتفرقة وغير المنسجمة والتي تتطلب وقتا وجهدا ومالا دون عمل دراسة لذلك و معرفة العائد من هذه المشروعات و ربطها بأهداف المنشاة و كذلك ربطها بأهداف الأفراد العاملين بالمنشأة.

• عدم وجود نظام لتحفيز الموظفين العاملين على التغيير بالمنشأة، أو التحفيز الزائد خاصة فى المراحل الأولى للتغيير، مما يشجع بعض الموظفين على التراخى و عدم تقديم أداء جيد فى المراحل الأخرى للتغيير و ضعف التركيز و عدم الإلتزام بإستراتجيات التغيير.

• عدم تأثير التغيير على ثقافة المنشأة، فإن لم يؤثر التغيير فى جذور ثقافة المؤسسة، فلا فائدة له و لا جدوى منه حيث ستبقى عادات و سلوك الأفراد كما هى.

• حصول بعض الموظفين على معاملات خاصة و التفرقة بينهم لبعض المحسوبيات مما قد يثير الجدل بين أفراد المنشأة و يعرقل إدارة التغيير و يشتت أداء الأفراد.

و لتفادى كل ما سبق يمكن وضع إستراتجية لإدارة التغيير بشكل كفؤ كما يلى:

أولاً، تحديد المشاكل التى تواجهها المنشأة و معرفتها جيدا و كذلك تشخيصها بشكل فعال و دون أى محسوبيات.

ثانياً، يجب وضع أهداف التغيير و مشاركتها مع كل أفراد المنشأة فى جميع الإدارات و بمختلف الدرجات الوظيفية، و كذلك توضيح الرؤية من التغيير على أسس منهجية و توزيع المهام المطلوبة لتحقيق هذه الرؤية و الأهداف على جميع الأفراد العاملين بالمنشاة بمختلف درجاتهم الوظيفية.

ثالثاً، فى هذه المرحلة و تزامناً مع وضع الأهداف، يأتى دور تكنولوجيا المعلومات فى خلق نظم لتسهيل المهام و توفير الوقت و الجهد لتحقيق الأهداف، فعلى سبيل المثال، قد تستعين بعض المنشأت فى إدارة التغيير ببعض البرامج و النظم الحديثة فى إدارة الموارد البشرية لوضع المرتبات، متابعة أداء الأفراد، و وضع نظم المكافأت، و ما يتبع ذلك من مهام أخرى تحتاجها إدارة الموارد البشرية لتحسين و تسهيل دور الموارد البشرية فى إدارة التغيير مع باقى إدارات المنشاة، و مما سيكون له أثر فى أن ما يجمع من معلومات سيكون أكثر دقة كما ستفرغ هذه النظم الإلكترونية إدارة الموارد البشرية لعمل دورها الرئيسى و هو التواجد مع الأفراد على الارض و التفاعل معهم بشكل كفؤ و أكثر حرفية لتحقيق الأهداف المنشودة من التغيير.

رابعاً، يجب وضع خطة زمنية للوصول للأهداف على أن تكون هذه الخطة مفصلة و مبنية على رؤية معينة لعملية الإنتقال من الوضع القديم إلى الحالة المرغوب فيها بشكل منتظم.

خامساً، يجب من الإدارة العليا و خاصة فى المراحل الأولى من إدارة التغيير عدم الإنعزال و التواجد بشكل دورى مع أفراد المنشأة، و متابعة التنفيذ و الإطلاع على تقييم أداء الأفراد بشكل مستمر، كما يجب الإستماع إلى الأفراد و مقترحاتهم فهذا سيجعلهم أكثر راحة و تكيف مع التغيير.

سادساً، وضع بدائل بشكل مستمر حتى لا يتم تعطيل أو عرقلة لتنفيذ الخطة الموضوعة فى أى مرحلة ما عند التغيير.

و مما نستنجه أن النجاح فى إدارة التغيير فى المؤسسات يعتمد بشكل واضح و كبير على مدى كفاءة المنشأة و قدرتها على التكيف مع التغيرات التى تحدث فى سوق العمل و بناء المبادرات الإسترتجية و كذلك قدرتها على قياة الأفراد و توجيهم للمضى قدما بالمؤسسة نحو الأفضل و الحصول على ميزات تنافسية بشكل كفؤ و بطرق أسرع  و بالإعتماد على تكنولوجيا المعلومات.

تحياتى

هند مراد  

إن شاء الله و ألف ألف مبروك

اليوم المائة  و الخامس والعشرون

إن شاء الله و ألف ألف مبروك
بيعدى علينا مواقف كتير بتأثر فينا و تخلينا نتفاعل معاها و تأثر فى مودنا و نتعصب و نتعب و نخش فى مود صعب على النفس تحملها، يمكن ننعزل و نقفل على نفسنا، و لما نراجع اللى حصل بنفضل نحط لوم علينا اكتر، و نشيل نفسنا فوق طاقتها و ممكن يكون الموضوع مش مستاهل كله .

و أما الموقف اللى خلانا يجيلنا اكتئاب ده يعدى، بنقول الله طب ده الحل كان سهل اوى، فيها ايه لما أبقى فى مود أن شاء الله و الف الف مبروك، ده مود حلو اوى على فكرة، و اللى ميعرفش المود ده، اوضحولك عادى، ده مود لذوذ جدا، اللى هو لما حد يقولك حاجة و لا يستفزك تبقى انت كول فى نفسك كده و هادى، و لا كأن حد عمل حاجة و لا  حد بيستفزك و العكس تماما، برودك ده ممكن ينقط و يشل اللى حواليك و يجيللهم مرض البرى البرى كمان، و الله بجد احنا كلنا من فترة للتانية محتاجين نكون على مود أن شاء الله و الف الف مبروك، مثال يوضح المود، عصفورة الشركة جايالك و عمالة تذيع أخبار يمين و شمال و انت و لا انت هنا، و لا حياة لمن تنادى، طبعا الشخصية دى حتستفز لانها معرفتش تسحب منك أى انفعال أو اى كلمة تتمسك عليك، و هنا تبتدى الشخصية العصفورة  تقول اسمك فى جملة مفيدة و تحاول توقعك فى أى حوار علشان تجرى تروح تنقله، لو انت رايق بقى و حاطط نفسك على مود أن شاء الله و الف الف مبروك، يبقى انت معلم و قدرت بعون الله تشل العصفورة و تنقطها كمان و تروحها بيتها تنام نينا هو .

علشان كده نصيحتى ليك، انك من فترة للتانية انك تبقى كول و مهوى دماغك و مفضيها كده، و أبعد عن القرف فى كل أشكاله و ألوانه و لو إضطريت تتعامل معاه، تبقى بتتعامل معاه و انت على مود أن شاء الله و الف الف مبروك، اللى يتكلم عليك يتكلم، اللى عايز يوصل لحاجة و ياخدك كوبرى، و ماله حلوة وظيفة الكوبرى دى و مش عيب، اللى متنيل اديه متنيل لنفسه و اللى مش متنيل برده لنفسه، و انت فاصل كده و فى الرايق، طبعا احنا علشان بنى ادمين و عبارة عن شوية مشاعر فوق بعض، مش حنعرف نثبت على مود واحد نفس الوقت إنما نقدر نفصل و نروح لمود أن شاء الله و الف الف مبروك ده على فترات متباعدة، و الله لو قدرت تثبت المود ده يبقى انت 100 100 و إنما لو معرفتش يبقى لازم تروح تزوره من فترة للتانية و تعيش معاه شوية.

الخلاصة، احنا عمرنا فى الدنيا قصير مهما طول، كده كده سايبنها و ماشيين و كله رايح، فحاول متفقدش طاقتك فى تبرير و خناقات و هدر طاقة ملوش لازمة، خليك كول ... خليك إن شاء الله و الف الف مبروك.

تحياتى
هند مراد 
 
   

مش بياخدوا طاقتك، ده فضل من ربك

اليوم المائة وأربعة وعشرون

مش بياخدوا طاقتك، ده فضل من ربك

شىء جميل أوى إنك تكون محاوط نفسك بناس ناجحة و سعيدة فى حياتها، الناس دى أكيد بتتعلم منها كتير و يمكن ياخدوا بإيدك و يساعدوك و يدلوك على حاجات لو عملتها صح، يمكن إنت كمان تحقق حلمك و توصل زيهم.

طيب إيه رأيك  فى الناس اللى من كتر اللى شافته بقت حزينة و متشائمة و معندهاش أمل فى الحياة و شايفة الدنيا مقفولة و غامقة فى وشهم دايما، و إيه رأيك فى علم الموارد البشرية و علم النفس اللى بيقلك أوعى تقرب من الناس دى و إبعد عنهم لإنهم ذوى عدوى مريرة و الى يقرب منهم بيتعدى منهم بسرعة، من وجهة نظرى المتواضعة و مع كامل إحترامى للناس بتوع علم النفس و الموارد البشرية، إنما الكلام ده مش صح بدليل إن فى مقدمة موضوع النهاردة إنك ممكن توصل لما حد ناجح بيساعدك و بياخد بإيدك و بيدلك على حاجات تعملها ممكن ترفعك لفوق و على الرغم إنك مش ناجح و واصل زيهم إنما علشان قربك منهم و مراقبتهم و إنهم إدولك الفرصة إنك تتعلم منهم، فكل ده جنب بعض قدر يحولك من شخص عادى حزين مش ناجح لشخص ناجح و سعيد.

المقصود هنا، إن مش شرط إن واحد محبط مسكين شايف الدنيا صعبة لظروف معينة مر بيها، إنك تدور وشك عنك و تبعد عنه لتتعدى منه و يأثر عليك بالسلب و يدليك طاقة سلبية إنت كمان، إنما ممكن لما تمد إيد العون لأخوك أو إختك اللى عندهم ظروف وحشة تديلهم دافعة للأمام و تشجعهم على إنهم يحاولوا و يحاولوا، و يسعوا لحد ما يوصلوا بإذن الله تعالى، فشوف سبحان الله إنت ممكن تكون سبب ربنا حطه للإنسان التعيس المحبط ده علشان يسمع كلمة حلوة منك و لا تحفيز علشان يكون أحسن، و تكون سبب بعد ربنا إن الإنسان ده يتحول و يعمل فرق كبير فى حياته لمجرد إنك ما دورتش وشك عنه و مديتله إيد المعاونة.

و من هنا نقدر نستنتج إن عمر ما مساعدة حد حتخليك زعلان أو تاخد من طاقتك الإيجابية، إنما على العكس تماما، إعرف إن ده فضل من ربنا إنه إختارك علشان مساعدة حد فى حاجة و لو بنصيحة دى حاجة بتجلب السعادة للقلب و بتخليك مبسوط لأنك أثرت فى حياة حد و غيرت فيها و لو بحاجات بسيطة أوى، ربنا خلق الخير جوانا و خلاه حاجة من أسباب إنشراح الصدر، فبلاش نغير القاعدة الإلهية و نحورها علشان نظهر إننا عندنا عمق فى تفكيرنا، و صدقونى بجد إن الله فى عون العبد ما دام العبد فى عون أخيه، فمد إيدك للناس و بحب حتلاقى ألف إيد و إيد بتتمد ليك وقت ما تكون محتاج حاجة.

تحياتى

هند مراد